Mo ē e alolofa iā Ieova le Atua ma naunau i lana Afioga, le Tusi Paia:

Na fetalai Iesu: “E iloa e outou le upu moni, e tuusaʻoloto foʻi outou e le upu moni.” (Ioane 8:32) Seʻi mafaufau i le taimi faatoʻā e maua ai le upu moni mai i le Tusi Paia! O se fiafiaga le iloaina e mafai ona tatou aʻoaʻoina le upu moni a o iai i se lalolagi ua tumu i pepelo.​—2 Timoteo 3:1.

E finagalo Ieova ia tatou iloa le upu moni. E tatou te mananaʻo foʻi ia taʻu atu i tagata le upu moni ona e tatou te alolofa iā i latou. Peitaʻi, e tele mea e aofia ai i le auauna i le Atua. E tatau ona tatou fai le mea sili e mafai ina ia ola e ōgatusa ai o ni Kerisiano, ona e tatou te matuā talisapaia mataupu silisili a Ieova. Na faamatala e Iesu se auala tāua e faamaonia atu ai i le Atua e tatou te alolofa iā te ia. Na fetalai o ia: “Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa.”​—Ioane 15:10.

E alofa tele Iesu i lona Tamā, ma e na te faia mea uma e finagalo i ai lona Tamā. Pe afai e tatou te faaaʻoaʻo iā Iesu i le auala e tatou te ola ai, o le a alofa mai Ieova ma o le a tatou maua le fiafia moni. Na fetalai Iesu, “afai ua outou iloa nei mea, e fiafia outou pe a outou faia.”​—Ioane 13:17.

E matou te faamoemoe o le a fesoasoani lenei tusi iā te oe ina ia ola e tusa ai ma le upu moni mai le Tusi Paia, ma avea ma uō a le Atua. E matou te tatalo ia tuputupu aʻe lou alofa mo le Atua, ma tumau “i le alofa o le Atua . . . lea e iʻu ai i le ola e faavavau.”​—Iuta 21.