1. O le ā na manatu mamafa i ai Iesu i le pō a o leʻi maliu?

 I LE pō a o leʻi maliu Iesu, na ia silafia o le a ia tuua ona soo, ma na manatu mamafa mo lo latou lumanaʻi. Na faapea atu o ia i ona soo: “E lē o ni tagata o le lalolagi outou.” (Ioane 15:19) Mulimuli ane, na tatalo o ia i lona Tamā ma faapea atu: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioane 17:15, 16) O le ā na uiga i ai Iesu?

2. O le ā e faasino i ai “le lalolagi” lea na taʻua e Iesu?

² O le upu “lalolagi” o loo faasino atu i tagata e lē iloa le Atua ma o loo pulea e Satani. (Ioane 14:30; Efeso 2:2; Iakopo 4:4; 1 Ioane 5:19) E faapefea ona lē avea i tatou “o ni tagata o le lalolagi”? I lenei mataupu, o le a tatou talanoaina ai auala nei: E tatou te tumau faamaoni i le Malo o le Atua ma solitū, e leai sa tatou vaega i faiga faapolotiki. E tatou te teena le agaga o le lalolagi. E onomea o tatou laʻei ma teuga ma paleni le vaaiga i tupe. E tatou te ofuina foʻi le “ofutau” ua saunia mai e le Atua.​—Tagaʻi i le Faaopoopoga 16.

3. O le ā le vaaiga a Iesu i faiga faapolotiki?

³ A o iai Iesu i le lalolagi, na ia mātauina le tele o faafitauli o tagata ma e leʻi faigofie o latou olaga. Na matuā manatu mamafa o ia iā i latou ma fia fesoasoani atu i ai. Pe sa avea o ia o se taʻitaʻi faapolotiki? E leai. Na ia silafia o le mea o loo manaʻomia moni e tagata, o le Malo o le Atua. O Iesu o le Tupu o lenā Malo, ma o le autū o lana talaʻiga o le Malo. (Tanielu 7:13, 14; Luka 4:43; 17:20, 21) E leʻi auai Iesu i faiga faapolotiki ma na solitū o ia i taimi uma. Na faapea atu Iesu a o iai i luma o le kovana Roma o Ponotio Pilato: “O loʻu malo e lē mai le lalolagi lenei.” (Ioane 18:36) Na solitū foʻi ona soo. Na taʻua i le tusi On the Road to Civilization, o uluaʻi Kerisiano “e latou te leʻi umia ni tofiga faapolotiki.” E faapena foʻi Kerisiano moni i aso nei. E tatou te lagolagoina ma le faamaoni le Malo o le Atua ma solitū i mataupufai faapolotiki a le lalolagi.​—Mataio 24:14.

4. E faapefea ona lagolagoina e Kerisiano moni le Malo o le Atua?

⁴ Ua avea amepasa po o sāvali e fai ma sui o o latou malo i se isi atunuu. E latou te lē aafia la i faiga faapolotiki a lenā atunuu. E faapena foʻi le ʻaufaauuina, o ē ua faamoemoe e pule faatasi ma Keriso i le lagi. Na tusi Paulo i Kerisiano faauuina: “O i matou o sāvali o sui o Keriso.” (2 Korinito 5:20) O le ʻaufaauuina ua fai ma sui o le malo o le Atua. E leai sa latou vaega i faiga faapolotiki ma mataupufai a malo o lenei lalolagi. (Filipi 3:20) Nai lo o lea, ua fesoasoani le ʻaufaauuina i le faitau miliona o tagata ia aʻoaʻo e faatatau i le malo o le Atua. Ua lagolagoina le ʻaufaauuina e  “isi mamoe,” o ē e faamoemoe e ola e faavavau i le lalolagi fou a le Atua. E tumau foʻi ona solitū i latou. (Ioane 10:16; Mataio 25:31-40) O lea la, e lē faia se vaega a Kerisiano moni i faiga faapolotiki a lenei lalolagi.​—Faitau le Isaia 2:2-4.

5. Aiseā e lē auai ai Kerisiano i taua?

⁵ E manatu Kerisiano moni i o latou uso talitonu o lo latou aiga, ma e latou te autasi e tusa lava po o fea le atunuu ma le talaaga e ō mai ai. (1 Korinito 1:10) Pe a tatou auai i taua, o le a tatou tau faasaga i lo tatou lava aiga, o o tatou uso talitonu, o ē na faatonu i tatou e Iesu ia alolofa i ai. (Ioane 13:34, 35; 1 Ioane 3:10-12) Na fetalai foʻi Iesu i ona soo ia alolofa i o latou fili.​—Mataio 5:44; 26:52.

6. O le ā le vaaiga a auauna tuuina atu a Ieova i faigāmalo?

 ⁶ E ui lava e tumau ona tatou solitū o ni Kerisiano, ae e tatou te tauivi malosi ia avea o ni tagatānuu lelei. O se faaaʻoaʻoga, e tatou te faaaloalo i faigāmalo e ala i le usiusitaʻi i a latou tulafono ma totogi a tatou lafoga. Ae e tatou te faamautinoa i taimi uma “o mea a le Atua ia avatu i le Atua.” (Mareko 12:17; Roma 13:1-7; 1 Korinito 6:19, 20) “O mea a le Atua” e aofia ai lo tatou alolofa mo ia, lo tatou usiusitaʻi, ma la tatou tapuaʻiga. O lea la, e tatou te lotomalilie e faataulaga o tatou ola nai lo o le lē usiusitaʻi iā Ieova.​—Luka 4:8; 10:27; faitau le Galuega 5:29; Roma 14:8.

7, 8. O le ā le “agaga o le lalolagi,” ma e faapefea ona aafia ai tagata?

⁷ Ina ia vavaeese mai i le lalolagi a Satani, e tatou te lē faatagaina le “agaga o le lalolagi” e pulea ai i tatou. O lenā agaga, e faasino atu i le auala e mafaufau ma amioaʻi ai, lea e pogai mai iā Satani ma e pulea ai i latou e lē auauna iā Ieova. Peitaʻi, e teena e Kerisiano lenei uiga. Na faapea mai Paulo, “tatou te leʻi maua le agaga o le lalolagi, a o le agaga mai i le Atua.”​—1 Korinito 2:12; Efeso 2:2, 3; tagaʻi i le Faaopoopoga 17.

⁸ O le agaga o le lalolagi ua faapogaia ai tagata e manatu faapito, faamaualuga, ma fouvale. Ua manatu ai e lē manaʻomia ona latou usiusitaʻi i le Atua. E manaʻo Satani ia faia e tagata so o se mea e latou te mananaʻo i ai, e aunoa ma le mafaufau i āuga e iʻu i ai. E manaʻo ia  talitonu tagata “o tuʻinanauga o le tino, ma tuʻinanauga o mata,” o mea ia e sili ona tāua i le olaga. (1 Ioane 2:16; 1 Timoteo 6:9, 10) O loo taumafai malosi le Tiapolo e faasesē auauna a Ieova, ma maileia i tatou ia mafaufau e pei o ia.​—Ioane 8:44; Galuega 13:10; 1 Ioane 3:8.

9. E faapefea ona aafia i tatou i le agaga o le lalolagi?

⁹ Ua siʻomia i tatou e le agaga o le lalolagi, e pei lava o le ʻea o loo tatou mānavaina. Pe afai e tatou te lē taumafai malosi e teena lenā agaga, o le a aafia ai i tatou. (Faitau le Faataoto 4:23.) E mafai ona amata tupu lenei tulaga i ni auala e foliga mai e lē leaga, e pei o le faataga o i tatou e taaʻina i mafaufauga ma uiga o tagata e lē tapuaʻi iā Ieova. (Faataoto 13:20; 1 Korinito 15:33) E mafai foʻi ona tatou aafia i mea e pei o ata ma faamatalaga matagā tau feusuaʻiga, i latou ua liliuese mai i le upu moni, po o taaloga e matuā matilatila mai ai le agaga faatautavā.​—Tagaʻi i le Faaopoopoga 18.

10. E mafai faapefea ona tatou teena le agaga o le lalolagi?

¹⁰ E faapefea la ona tatou ʻalofia le puleaina e le agaga o le lalolagi? E tatau ona tatou mafuta vavalalata atu iā Ieova ma taʻitaʻia e lona atamai. Ia tatalo e lē aunoa mo lona agaga paia ma maelega i la tatou auaunaga iā te ia. O Ieova o Lē e sili ona malosi i le aoao o mea. E tatou te mautinoa e mafai ona ia fesoasoani mai ina ia tatou teena le agaga o le lalolagi.​—1 Ioane 4:4.

11. Ua faapefea i le agaga o le lalolagi ona taaʻina ai le auala e laʻei ai tagata?

¹¹ E faaalia foʻi e lē o i tatou o ni tagata o le lalolagi, e ala i o tatou laʻei ma teuga. O le toʻatele o tagata o le lalolagi  e laʻei i se auala ina ia faauaʻi mai ai tagata iā i latou, faagaee ai mafaufauga lē mamā i isi, faaalia ai le fouvale, po o le faaalialia vale i le tele o a latou tupe. O isi tagata e lē popole i o latou foliga vaaia, e tueleelea ma e lē teuteu faaaulelei. E tatou te lē faatagaina nei uiga e taaʻina ai a tatou filifiliga i laʻei ma teuga.

12, 13. O ā mataupu silisili e fesoasoani iā i tatou pe a filifili laʻei?

¹² Talu ai o i tatou o auauna a Ieova, e tatou te mananaʻo la ia mamā, onomea, ma talafeagai o tatou laʻei i taimi uma. E tatou te laʻei i ofu e “onomea ma ia  mafaufau lelei,” ina ia faaalia ai lo tatou “matataʻu i le Atua.”​—1 Timoteo 2:9, 10; Iuta 21.

¹³ O le auala e tatou te laʻei ai e mafai ona aafia ai le vaaiga a isi e uiga iā Ieova ma ona tagata. E ao ona tatou faia “mea uma lava ina ia faamamaluina ai le Atua.” (1 Korinito 10:31) O le onomea e aofia ai le faaaloalo i faalogona ma manatu o isi. O lea, pe a filifili o tatou laʻei po o le auala e teuteu ai o tatou foliga, ia manatua o a tatou filifiliga e aafia ai isi.​—1 Korinito 4:9; 2 Korinito 6:3, 4; 7:1.

14. O le ā e tatau ona tatou mafaufau i ai pe a filifili o tatou laʻei mo faatasitasiga faa-Kerisiano?

¹⁴ O le ā le auala e tatou te laʻei ai i sauniga ma le galuega talaʻi? Po ua soona faauaʻi mai ai tagata iā i tatou? Po o māsiasi isi ona o o tatou laʻei? Pe e tatou te manatu o le auala e tatou te laʻei ai o la tatou aiā lenā? (Filipi 4:5; 1 Peteru 5:6) O le tulaga masani e tatou te mananaʻo ia lelei o tatou foliga vaaia. Peitaʻi, o uiga faa-Kerisiano o uiga ia e sili ona faaaulelei ai i tatou. O uiga na e fia silasila mai i ai Ieova. E faaalia mai ai le tagata moni e iai i tatou, “o le tagata lilo i totonu,” ma “o le mea tautele lava lea i le silafaga a le Atua.”​—1 Peteru 3:3, 4.

15. Aiseā ua lē taʻua patino mai ai e Ieova ni auala e tatau ona tatou laʻei ma teu ai?

¹⁵ E lē o aumaia e Ieova se lisi o tulafono o laʻei e tatau ma laʻei e lē tatau ona tatou ofuina. Ae ua ia saunia mai mataupu silisili o le Tusi Paia, e fesoasoani iā i tatou e faia ai filifiliga lelei. (Eperu 5:14) E finagalo Ieova ia faavae a tatou filifiliga i le alofa iā te ia ma isi, e tusa pe tetelē pe lāiti. (Faitau le Mareko 12: 30, 31.) E eseese auala e laʻei ai tagata o Ieova i le lalolagi aoao, e fua i a latou aganuu ma mea e fiafia i ai. O lenei eseesega e matagofie ma faafouina ai.

16. E faapefea i le vaaiga a le lalolagi e faatatau i tupe ona feteenaʻi ma le aʻoaʻoga a Iesu? O ā fesili e tatau ona tatou fesili ifo ai?

¹⁶ E manaʻo Satani ia manatu tagata e latou te maua le fiafia i tupe ma meafaitino, ae ua iloa e auauna a Ieova e sesē lenei manatu. E tatou te maufaatuatuaina upu nei a Iesu: “E lē ola se tasi i le tele o ana mea ua iā te ia.” (Luka 12:15) E lē mafai e tupe ona  aumaia ai iā i tatou le fiafia moni. E lē mafai ona tatou maua ai ni uō moni, le filemu moni o le mafaufau, po o le ola e faavavau. E moni e tatou te manaʻomia ni meafaitino ma ia olioli o tatou olaga. Peitaʻi, na aʻoaʻo e Iesu o le a maua le fiafia pe a iai sa tatou faiā vavalalata ma le Atua, ma avea le tapuaʻiga ma mea e sili ona tāua i o tatou olaga. (Mataio 5:3; 6:22) Ia fesili ifo: ʻPo o aafia aʻu i le vaaiga a le lalolagi e faatatau i tupe? Po o avea tupe ma taulaʻiga o oʻu manatu ma talanoaga?’​—Luka 6:45; 21:34-36; 2 Ioane 6.

17. E faapefea ona faaleleia lou olaga pe afai e te teena le vaaiga a le lalolagi e uiga i tupe?

¹⁷ Pe afai e tatou te taulaʻi atu i le auaunaga iā Ieova ma teena le vaaiga a le lalolagi e uiga i tupe, o le a faamalieina o tatou olaga. (Mataio 11:29, 30) O le a tatou maua le lotomalie ma le filemu o le mafaufau ma le loto. (Mataio 6:31, 32; Roma 15:13) O le a tatou lē soona popole ai i meafaitino. (Faitau le 1 Timoteo 6:9, 10.) O le a tatou lagona le fiafia ona o le foaʻi atu. (Galuega 20:35) O le a tele le taimi e faaalu ma i latou e tatou te alolofa i ai. Atonu e lelei ai foʻi la tatou moe.​—Failauga 5:12.

18. O le ā o loo taumafai Satani e fai iā i tatou?

¹⁸ O loo taumafai Satani e faaleaga la tatou faiā ma Ieova. O lea e tatau ai ona tatou faia mea uma e puipuia ai lenā faiā. O loo tatou tau faasaga i “agaga leaga uma.” (Efeso 6:12) E lē mananaʻo Satani ma ana temoni ia tatou maua le fiafia po o le ola e faavavau. (1 Peteru 5:8) O loo faasagatau mai nei fili malolosi  iā i tatou, ae o le fesoasoani a Ieova e tatou te manumalo ai i lenā taua!

19. Ua faapefea ona faamatalaina i le Efeso 6:14-18 le “ofutau” o se Kerisiano?

¹⁹ I aso anamua, na ofu e fitafita “ofutau” ina ia puipuia ai i latou i le taua. I se tulaga talitutusa, e tatau ona tatou ofu le “ofutau” mai iā Ieova. (Efeso 6:13) O le a puipuia ai i tatou. O loo faamatala lenei ofutau i le Efeso 6:14-18: “O lenei, ia tutū mausalī, a o fusia o outou sulugātiti i le upu moni, ma oofu i le ufifatafata o le amiotonu, ia faaseevaeina o outou vae e nofosauni e talaʻi le tala lelei o le filemu. A o le mea e sili ona tāua, ia outou ave le talita telē o le faatuatua, lea e mafai ai ona outou tineia ai aū fanafana mū uma a lē o loo leaga. Ia talia foʻi le puloutau o le faaolataga, ma le pelu a le agaga, o le afioga lea a le Atua, ma ia faaauau ona tatalo i le Atua i taimi uma i le agaga, ma tatalo eseese uma, ma faatoga eseese uma.”

20. O le ā e tatau ona fai ina ia fesoasoani ai le “ofutau” iā i tatou?

²⁰ Pe afai e galo i se fitafita se vaega o lona ofutau ma lē puipuia se vaega o lona tino, o le vaega lenā o le a osofaʻia ai o ia e lona fili. Pe a mananaʻo e puipuia e lo tatou “ofutau” i tatou, e lē tatau la ona galo se vaega o lenā ofu. E tatau ona ofu i taimi uma ma ia tausia i se tulaga lelei. O le a faaauau la tatou taua seʻia faaumatia le lalolagi a Satani, ma aveesea Satani ma ana temoni mai le lalolagi. (Faaaliga 12:17; 20:1-3) O lea, pe afai o loo tatou tau faasaga i ni tuʻinanauga sesē pe tauivi ma ni vaivaiga, e lē tatau ona tatou faavaivai!​—1 Korinito 9:27.

21. E faapefea ona tatou manumalo i la tatou taua?

 ²¹ E lē mafai ona tatou manumalo i so tatou lava malosi, ona e malosi atu le Tiapolo iā i tatou. Peitaʻi, e tatou te maua le malosi ona o le fesoasoani a Ieova! Ina ia tumau faamaoni, e ao ona tatou tatalo iā Ieova, suʻesuʻe lana Afioga, ma faatasitasi ma o tatou uso ma tuafāfine. (Eperu 10:24, 25) O le a fesoasoani nei vala e tatou te tumau faamaoni ai i le Atua, ma nofosauni e puipuia lo tatou faatuatua.

22, 23. (a) E faapefea ona tatou nofosauni i taimi uma e puipuia lo tatou faatuatua? (e) O le ā o le a tatou iloiloina i le mataupu o loo sosoo mai?

²² E ao ona tatou nofosauni i taimi uma e puipuia lo tatou faatuatua. (Ioane 15:19) E iai nisi mataupu e matuā tū ese ai Molimau a Ieova mai i le toʻatele o tagata. Ia fesili ifo: ʻPo o ou matuā malamalama i le māfuaaga ua ou faia ai lenei faaiʻuga? Po o ou talitonu e saʻo mea ua fai mai ai le Tusi Paia ma le pologa faamaoni ma le faautauta? Po o ou mitamita i le avea ai o se Molimau a Ieova? (Salamo 34:2; Mataio 10:32, 33) Pe e mafai ona ou faamatala atu i isi oʻu talitonuga?’​—Mataio 24:45; Ioane 17:17; faitau le 1 Peteru 3:15.

²³ I le tele o tulaga, ua matuā manino mai le mea e tatau ona tatou faia ina ia tumau ona vavaeese ai mai i le lalolagi. Ae i nisi taimi, e lē faigofie ona iloa. Ua taumafai Satani e maileia i tatou i auala eseese. O se tasi o mailei ua ia faaaogā, o faafiafiaga. E faapefea ona tatou filifili ma le atamai faafiafiaga? O le a tatou iloiloina i le mataupu o loo sosoo ai.