IA E mautinoa o loo nofosauni Ieova e fesoasoani iā te oe a o e toe foʻi atu iā te ia. O le a ia fesoasoani iā te oe e faafetaiaʻia popolega, o faalogona tigā, ma maua le filemu o le loto ma le mafaufau ona o se lotofuatiaifo mamā. Atonu o le a uunaʻia ai oe e auauna iā Ieova faatasi ma ona tagata tapuaʻi. O le a pei lou tulaga o nisi o Kerisiano i le uluaʻi senituri, lea na tusi mai ai Peteru: “Na faapei outou o mamoe ua sē; a o lenei ua outou toe foʻi mai i le leoleo mamoe, ma le ovasia o o outou ola.”—1 Peteru 2:25.

O le toe foʻi iā Ieova o le mea sili lenā e mafai ona e faia. Aiseā? O le a e faafiafiaina ai le finagalo o Ieova. (Faataoto 27:11) Ua tatou iloa e iai faalogona o Ieova, ma o a tatou gaoioiga e aafia ai o ia. E lē faamalosia e Ieova i tatou e alolofa ma auauna iā te ia. (Teuteronome 30:19, 20) Ua faapea mai se tasi faitofā o le Tusi Paia: “E lē mafai e se tasi ona faamalosia oe e tatala lou loto. O le gaoioiga lenā e tatau ona e faia ona o lou lava lotomalie.” E mafai ona tatala o tatou loto, pe a tatou tapuaʻi iā Ieova ona o lo tatou alolofa iā te ia. O le faia faapea, o le a tatou avatu ai iā Ieova se meaalofa tautele o lo tatou faamaoni atoatoa lea, ma o le a faafiafiaina ai lona finagalo. E leai se mea e faatusa i ai le fiafia e maua mai i le avatu iā Ieova o le tapuaʻiga e tatau ona avatu iā te ia.—Galuega 20:35; Faaaliga 4:11.

E lē gata i lea, pe a toe amata lau tapuaʻiga faa-Kerisiano, o le a faamalieina ai ou manaʻoga faaleagaga. (Mataio 5:3) I le ā le itu? Ua taumānatu tagata o le lalolagi, ʻAiseā ua tatou iai i inei?’ Ua latou galala i le fia iloa o tali o fesili e faatatau i le olaga. E iai i tagata lenā manaʻoga, auā na tuu iai e Ieova ina ua ia foafoaina i tatou. O le auala na foafoaina ai i tatou, ia maua le faamalieina i le auauna atu iā te ia. E leai se isi mea e faamalieina ai i tatou, nai lo o lo tatou auauna iā Ieova ona o le alofa iā te ia.—Salamo 63:1-5.

Faamolemole, ia e iloa e finagalo Ieova e te toe foʻi atu iā te ia. E faapefea ona tatou mautinoa? Seʻi mafaufau i le manatu lenei: Sa faia le tele o tatalo a o sauniunia ma le faaeteete lenei polosiua. Atonu na faailoa atu e se toeaina po o se isi uso talitonu lenei lomiga iā te oe. Na faalaeiauina ai oe e faitau ma tali atu i le feʻau o loo i lenei polosiua. O le vala lenā e faamaonia ai e lē o faagaloina oe e Ieova, ma ua ia toe tosina mālie atu oe iā te ia.—Ioane 6:44.

E faamāfanafanaina i tatou i le iloaina e lē faagaloina e Ieova ana auauna ua sē ese. O le vala lenā na talisapaia e le tuafafine o Donna. Ua ia faapea mai: “Sa faasolo lemū ona ou tafetafea ese mai i le upu moni, ae e masani ona ou mafaufau i le Salamo 139:23, 24: ʻLe Atua e, ia e saʻili mai iā te aʻu, ma silafia ai loʻu loto. Ia e suʻesuʻe mai iā te aʻu, ma silafia ai oʻu popolega, ma ia e silafia ai po o iā te aʻu se ala e tigā ai, ma taʻitaʻi aʻu i le ala i aso uma lava.’ Na ou iloa e lē o aʻu o sē o le lalolagi, ma sa tatau ona ou iai i le faalapotopotoga a Ieova. Na amata ona ou iloa e leʻi tuua aʻu e Ieova, ae na manaʻomia ona ou toe saʻili le auala e toe foʻi ai iā te ia. Ua ou fiafia o le gaoioiga lenā sa ou faia.”

O la matou tatalo ia e toe maua le “olioli mai iā Ieova.” (Neemia 8:10) E te lē lagona le salamō pe a e toe foʻi iā Ieova.