Ua māeʻa le faaipoipoga i Kana, ma ua malaga atu nei Iesu, o lona tinā, ma ona ʻafa uso o Iakopo, Iosefa, Simona ma Iuta i Kapanaumi.

Ae aiseā ua alu atu ai Iesu i Kapanaumi? E faigofie ona malaga atu i lenei aai nai lo o Nasareta ma Kana, ma e telē atu foʻi. O le toʻatele foʻi o soo fou o Iesu e nonofo i lenei aai, pe nonofo latalata foʻi i ai. O lea, o le malaga atu o Iesu i lenei aai, ua mafai ai ona ia avatu toleniga mo i latou nei.

Ua faia foʻi e Iesu le tele o galuega ofoofogia, a o iai i Kapanaumi. Ua faalogo i ai le toʻatele o tagata o le aai, faapea nuu tuaoi. E lē o toe umi ae oo i le taimi e malaga ese atu ai Iesu ma ē o loo faatasi ma ia. Talu ai o i latou uma o ni tane maelega o Iutaia, e tatau la ona latou ō atu i Ierusalema ina ia auai i le Paseka i le 30 T.A.

A o iai soo o Iesu i le malumalu, ua latou vaaia ai se mea mataʻina e latou te leʻi iloa muamua e faatatau iā te ia.

E tusa ai ma le Tulafono a le Atua, e manaʻomia ona faia e tagata Isaraelu ni taulaga e faaaogā ai manu i le malumalu, ma e manaʻomia e i latou e asiasi atu ni meaʻai a o latou nonofo ai i Ierusalema. O lea, ua faataga ai e le Tulafono i latou e malaga mai i mea mamao, ina ia aumai a latou tupe e faatau ai “povi, o mamoe, o ʻoti,” ma isi lava mea aogā i Ierusalema. (Teuteronome 14:24-26) O le māfuaaga lea ua faatau ai e le ʻaufaatauʻoa manu po o manulele, i totonu o se lotoā telē i le malumalu. O nisi o nei ʻaufaatauʻoa ua latou gāoi mai i tagata, e ala i le faataugatā o a latou oloa.

Ua matuā toʻatamaʻi Iesu, ma ua ia sasaa tupe a tagata suitupe, fuli a latou laulau, ma tutuli i latou i fafo. Ua fetalai atu o ia: “Aveese ia nei mea mai i inei! Aua neʻi toe faia le fale o loʻu Tamā ma fale faatauʻoa!”—Ioane 2:16.

Ina ua vaaia e soo o Iesu lenei mea, ona latou manatua ai lea o le valoaga e faatatau i le Alo o le Atua e faapea: “Ua ʻaina lava aʻu i le maelega i lou fale.” Ae ua fesili atu tagata Iutaia: “O le ā se faailoga e te faaali mai iā i matou, ona o mea ua e faia?” Ua tali mai Iesu: “Ia talepe i lalo lenei malumalu, ona ou toe faatūina lea i aso e tolu.”—Ioane 2:17-19; Salamo 69:9.

Ua manatu tagata Iutaia o loo uiga atu le fetalaiga a Iesu i le malumalu moni i Ierusalema. O lea, ua latou fesili atu ai: “Na fausia lenei malumalu i tausaga e fā sefulu ono, ma pe e te toe faatūina ea i aso e tolu?” (Ioane 2:20) O loo uiga atu le fetalaiga a Iesu i lona tino ua faatusaina i le malumalu. I le tolu tausaga mulimuli ane, na manatua e ona soo nei upu ina ua toe faatūina Iesu mai le oti.