Ua taunuu atu nei Iesu ma ona soo i Petesaita. Ua aumai e tagata iā te ia se tamāloa tauaso, ma ua latou ʻaiʻoi atu iā te ia ina ia paʻi atu i lenei tamāloa, ma faamālōlōina ai o ia.

Ua tago atu Iesu i le lima o le tamāloa tauaso, ma ave o ia i tua o le aai. Ua feanu Iesu i mata o le tamāloa ma fesili atu iā te ia: “Po ua e iloa atu se mea?” Ua tali mai le tamāloa: “Ua ou iloa atu tagata, auā ua ou vaaia mea e pei o ni laau, ae o loo feoaʻi i latou.” (Mareko 8:23, 24) Ua papaʻi atu aao o Iesu i mata o le tamāloa, ma ua toe lelei ai lana vaai. Ua ia tuu atu le tamāloa e alu i lona aiga, ma faatonu o ia e aua neʻi ui atu i le aai.

Mulimuli ane, ua ō atu Iesu ma ona soo i le itu i mātū i le aai o Kaisareia Filipo, lea e tu i luga o le mauga. E sili atu ma le lua aso e faaalu i lenei faigāmalaga umi, lea e pe ā ma le 25 maila (40 km) le mamao e savavali ai. E mafai ona iloa atu i le itu i mātū i sasaʻe o Kaisareia Filipo, le tumutumu o le mauga o Heremoni lea e toʻa ai le kiona.

A o alu la latou faigāmalaga, ua maliu ese Iesu na o ia e tatalo. E tusa ua toe iva nei pe sefulu masina o loo totoe ona oo lea i lona maliu, ma ua popole Iesu i ona soo. Ua tuua o ia e le toʻatele o ona soo, ae o isi ua fenuminumiaʻi ma lē malilie. Atonu o loo latou taumānatu pe aiseā na ia teena ai taumafaiga a tagata ina ia fai o ia ma tupu, ma lē faia se faailoga e faailoa atu ai po o ai moni o ia.

Ua ō atu soo o Iesu i le nofoaga o loo ia tatalo ai, ona ia fesili atu lea iā i latou: “O le ā se tala a tagata, po o ai le Atalii o le tagata?” Ua latou tali mai: “Ua fai mai nisi o Ioane le Papatiso, a o isi o Elia, a ua faapea mai isi o Ieremia, po o se tasi o le ʻauperofeta.” Ua manatu tagata atonu o Iesu o se tasi o nei tane ua toe faatūina mai i le oti. O lea, ina ia faailoa mai mea o loo latou mafaufau i ai, ua toe fesili atu Iesu: “A o outou, o le ā sa outou tala, o ai aʻu?” Ua vave ona tali mai Peteru: “O oe o le Keriso, o le Alo o le Atua soifua.”—Mataio 16:13-16.

Ua fetalai atu Iesu iā Peteru e tatau ona fiafia, auā ua faailoa atu e le Atua lenei mea iā te ia. Ua toe fetalai atu o ia: ʻOu te fai atu iā te oe, O Peteru oe, ma ou te atiaʻe laʻu faapotopotoga i luga o lenei papa, e lē mafai ona manumalo ai faitotoʻa o le Tuugamau.’ O loo uiga atu le fetalaiga a Iesu e faapea, o le a ia atiaʻe se faapotopotoga, ma e lē mafai e le Tuugamau ona saisaitia sui o le faapotopotoga, pe afai e latou te tumau pea ma le faamaoni. Ua ia folafola atu iā Peteru: “Ou te tuuina atu iā te oe ki o le malo o le lagi.”—Mataio 16:18, 19.

E lē faapea ua faamuamua e Iesu Peteru i lo o isi aposetolo, pe faia foʻi o ia ma faavae o le faapotopotoga. O le mea moni, o Iesu o le Papa, lea e atiaʻe ai i luga le faapotopotoga. (1 Korinito 3:11; Efeso 2:20) Peitaʻi, o le a tuuina atu iā Peteru ki e tolu. O le a ia maua le faaeaga e tatala ai le avanoa mo ni vaega o tagata, e ulu atu i le Malo o le lagi.

O le a faaaogā e Peteru le uluaʻi ki i le Penetekoso 33 T.A., e faailoa atu ai i tagata Iutaia ma tagata liulotu Iutaia ua salamō le gaoioiga e tatau ona fai ina ia faasaoina ai i latou. E na te faaaogā le ki lona lua, e tatala ai le avanoa mo tagata talitonu o Samaria e ulu atu ai i le Malo o le Atua. Ae i le 36 T.A., o le a faaaogā ai e Peteru le ki lona tolu e tatala atu ai lenā lava avanoa i tagata o Nuu Ese e leʻi peritomeina, e pei o Konelio faapea ma isi.—Galuega 2:37, 38; 8:14-17; 10:44-48.

A o talanoa Iesu ma ona aposetolo, ua atuatuvale i latou ina ua faamatala atu e Iesu puapuaga ma lona maliu, lea e lē o toe umi ona oo lea iā te ia i Ierusalema. E lē o malamalama Peteru o le a toe faatūina Iesu i le lagi. O lea, ua ia taʻitaʻi ese ai Iesu ma vavao iā te ia, ma faapea atu: “Le Alii e, ia e alofa iā te oe lava, e lē tutupu na mea iā te oe.” Peitaʻi ua liliu atu le tua o Iesu iā Peteru ma faapea atu: “Satani e, inā alu ese ia oe! Ua fai oe ma mea ou te tautevateva ai, auā e lē o manatu o le Atua ua e manatu ai, a o manatu o tagata.”—Mataio 16:22, 23.

Ua valaau atu nei Iesu i le motu o tagata e ō mai iā te ia, ma faamatala atu i ai e lē faigofie le avea o se tasi ma ona soo. Ua fetalai atu o ia: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia, ma mulimuli mai pea iā te aʻu. Auā o sē e fia faasaoina lona ola, e maʻimau ia; ae o sē e faamaʻimau lona ola ona o aʻu ma le tala lelei, e faasaoina e ia.”—Mareko 8:34, 35.

O lea, ina ia maua le finagalo malie o Iesu, e tatau ona lototetele ona soo ma faaalia le agaga faataulaga. Ua fetalai atu Iesu: “O lē e mā iā te aʻu ma aʻu upu i lenei tupulaga mulilulua ma le agasala, e mā foʻi le Atalii o le tagata iā te ia, pe a sau o ia i le mamalu o lona Tamā faatasi ma le ʻauagelu paia.” (Mareko 8:38) Ioe, pe a afio mai Iesu, o le a ia “tauia tagata taʻitoʻatasi e tusa ma lana amio.”—Mataio 16:27.