A o talaʻi atu Iesu ma ona soo e toʻafā i ʻsunako i Kalilaia uma,’ ua oo ina salalau atu tala e faatatau i mea ofoofogia ua ia faia. (Mareko 1:39) I se tasi o aai, ua faalogo tagata i tala e faatatau iā Iesu, ma o loo iai i inā se tamāloa ua maua i le lepela. Ua faamatalaina e Luka lenei tamāloa o se tagata ua “lilofia lona tino i le lepela.” (Luka 5:12) O āuga o lenei maʻi e mataʻutia tele, auā e faasolosolo mālie lava ona faaleagaina ai vaega eseese o le tino.

O lea la, e matuā ogaoga lava le tulaga ua iai le maʻi o lenei tamāloa, ma e tatau ona ia nofo mamao ese mai i isi tagata. E tatau foʻi ona ia valaau atu, “E lē mamā, e lē mamā!” ina ia faamamao ese ai tagata mai iā te ia, ma puipuia ai i latou mai i le pisia i lenei maʻi. (Levitiko 13:45, 46) O le ā nei le gaoioiga o le a fai e lenei tamāloa lepela? Ua ia alu atu iā Iesu ma ifo atu iā te ia ma faapea atu: “Le Alii e, a e finagalo i ai, e mafai lava ona e faamamā mai iā te aʻu.”—Mataio 8:2.

Maʻeu le malosi o le faatuatua o lenei tamāloa iā Iesu. Ae pagā se vaaiga faanoanoa i lona tino ona o lona maʻi. O le ā le auala o le a tali atu ai Iesu? O le ā lau gaoioiga e fai pe ana e iai i inā? O le tigā alofa o Iesu, ua faaloaloa atu ai lona aao ma paʻi atu i le tamāloa lepela. Ua ia fetalai atu: “Ou te loto i ai. Inā mamā ia oe.” (Mataio 8:3) E faigatā i nisi ona talitonu e mafai ona tupu lenei mea. Peitaʻi, o le taimi lava lea ua mamā ai le tamāloa mai i lona lepela.

Pe e te manaʻo i se tupu e pei o Iesu, e tigā alofa ma e mafai ona ia faataunuuina so o se mea? O le auala na feutagaʻi ai Iesu ma lenei tamāloa, ua faamautinoa mai ai pe a avea o ia ma Tupu i le lalolagi atoa, ona faataunuuina ai lea o le valoaga lenei: “E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva.” (Salamo 72:13) Ioe, o le a faataunuu e Iesu faanaunauga o lona loto e fesoasoani i tagata uma ua puapuagatia.

Manatua foʻi a o leʻi faamālōlōina e Iesu le tamāloa lepela, ua leva ona talatalanoa ma le fiafia tagata e faatatau i lana faiva. E mautinoa foʻi o le a salalau atu tala e faatatau i lenei vavega mataʻina ua ia faia. Peitaʻi, e lē manaʻo Iesu e faatuatua tagata iā te ia ona o tala ua latou faalogo i ai. Ua silafia e Iesu le valoaga e faapea, ʻe lē faalogoina lona leo i le ala tele’ i se auala faalialiavale. (Isaia 42:1, 2) O lea, ua faapea atu ai Iesu i le tamāloa lepela lea ua faamālōlōina: “Ia aua lava neʻi e taʻu atu i se tasi. Ae ia e alu ma faailoa atu oe i le ositaulaga, ma avatu le meaalofa e pei ona faatonuina e Mose.”—Mataio 8:4.

Peitaʻi, o le fiafia tele o le tamāloa ua lē mafai ai ona ia natia le mea ua tupu, ae ua alu atu ma taʻutaʻu atu i tagata. O lenei mea ua faaosofia atili ai le naunau ma le fia iloa o tagata, ma ua lē mafai ai ona toe faaali atu Iesu i se aai. O lea, ua nofo ai o ia i nofoaga tuufua e lē o iai ni tagata. Peitaʻi, ua faaauau pea ona ō atu iā te ia tagata mai i itu uma, ina ia aʻoaʻoina ma faamālōlōina i latou.