E faalagolago le auala e tali atu ai tagata i fetalaiga ma galuega e faia e Iesu, i le tulaga o o latou loto. E faamaonia lea vala i se mea ua tupu i Kalilaia. Ua valaaulia e se Faresaio e igoa iā Simona Iesu ina ia la faiʻaiga faatasi i lona fale, ma atonu ina ia faamasani ai i lē o loo faia nei galuega mamana. Ua talia e Iesu le valaaulia, ma atonu ua ia vaai i ai o se avanoa lelei lea e talaʻi atu ai iā i latou o loo iai i inā. Sa ia faia foʻi faapea i le tele o taimi na valaaulia ai o ia e aai faatasi ma le ʻauaolafoga ma tagata agasala.

Peitaʻi, e lē o faia iā Iesu le tulaga faaaloalo e masani ona faaalia i mālō. O le pefua o auala i Palesitina, e māfua ai ona palapalā vae o tagata faimalaga. O lea, o le tū masani e faaalia ai le agaga talimālō, o le mulumulu lea o vae o mālō i sina vai mālū. Peitaʻi e lē o faia lenā gaoioiga iā Iesu. E lē o sogi atu foʻi se tasi e faafeiloaʻi ai iā te ia. O le isi tū masani, o le uuina lea i le suāuu o le ao o se mālō. Ae e lē o faia foʻi faapea iā Iesu. Faamata o loo talileleia moni Iesu?

Ua amata le taumafataga, ma o loo taooto mālō e taumamafa. Peitaʻi, ua ulufale atu se fafine i le potu ae e leʻi valaauliaina o ia. Ua “lauiloa [o ia] i le aai o sē e agasala.” (Luka 7:37) O tagata lē lelei atoatoa uma lava e agasala, peitaʻi e foliga mai o loo ola lenei fafine i se olaga lē mamā, atonu o ia o se fafine talitane. Atonu na faalogo o ia i aʻoaʻoga a Iesu, lea e aofia ai le valaaulia mo ʻi latou uma ua mafatia i avega, e ō atu iā te ia ina ia maua ai le faafouina.’ (Mataio 11:28, 29) O le pāʻia o le loto o lenei fafine i fetalaiga ma galuega a Iesu, ua uunaʻia ai o ia e saʻili Iesu.

Ua sau o ia i tua o Iesu, ma tootuli i ona vae. Ua tagi ma ua maligi ona loimata, ma ua susū ai vae o Iesu. Ua ia soloi vae o Iesu i lona lauulu, ma sogi lemū atu i ai ma uu i le suāuu manogi. Ua iloa atu e Simona lenei gaoioiga, ma ua lē fiafia ai o ia. Ua ia faapea ifo iā te ia lava: “Afai o se perofeta lenei tagata, semanū na te iloa le ituaiga o fafine lea o loo tago atu iā te ia, o ia o se fafine agasala.”—Luka 7:39.

Ua silafia e Iesu manatunatuga o Simona, ona ia faapea atu lea: “Simona, e iai se mea ou te fia fai atu ai iā te oe.” Ua tali mai Simona: “Le Aʻoaʻo e, saunoa mai ia!” Ua toe faaauau le faamatalaga a Iesu: “E toʻalua ni tamāloloa na nofo aitalafu i se tagata na nonō atu tupe iā i laʻua, o le tasi na aitalafu i le lima selau tenari, a o le isi e lima sefulu tenari. Ina ua leai ni a la mea e toe totogi atu ai, ona ia faamagalo lea ma le lotoatoa a la aitalafu. O lea, o ai o i laʻua e sili ona alofa iā te ia?” Ua tali toaʻi atu Simona: “Ou te manatu o lē na faamagaloina lana aitalafu telē.”—Luka 7:40-43.

Ua faapea atu Iesu ua saʻo lana tali. A o silasila atu Iesu i le fafine, ua ia faapea atu iā Simona: “Ua e vaai mai i le fafine lenei? Na ou ulufale mai i lou fale, e te leʻi aumaia ni vai e fufulu ai oʻu vae. A o le fafine lenei, ua ia faasusū oʻu vae i ona loimata ma soloi ai i lona lauulu. E te leʻi sogi mai iā te aʻu; a o lenei fafine, e mai lava i le taimi na ou sau ai, na sogi lemū mai pea o ia i oʻu vae. E te leʻi uuina loʻu ulu i se suāuu; a o lenei fafine, ua ia uuina oʻu vae i le suāuu manogi.” Ua silafia e Iesu le salamō moni o lenei fafine mai i lona olaga lē mamā o loo ola ai. O lea, ua ia toe fetalai atu ai: “Ua faamagaloina ana agasala e ui ina tele, auā ua tele lona alofa. A o lē ua faamagaloina i se mea itiiti, e itiiti foʻi lona alofa.”—Luka 7:44-47.

E lē faapea ua manatu māmā pe lē amanaʻia e Iesu amioga lē mamā. Peitaʻi, o loo ia faaalia le tigā alofa ma le malamalama i tagata e faia agasala matuiā, ae mulimuli ane faaalia le salamō ma liliu atu i le Keriso mo se mapusaga. Maʻeu le faamāfanafanaina o lenei fafine ina ua fetalai atu i ai Iesu: ʻUa faamagaloina au agasala. O lou faatuatua ua faaolaina ai oe; inā e alu ia ma le manuia.’—Luka 7:48, 50.