Ua agaʻi atu nei Iesu ma ona soo i le sami o Kalilaia, ina ua ia iloa o loo taupulepule le ʻau Faresaio ma ē e ʻau iā Herota e fasioti o ia. Ua lolofi atu iā Iesu le motu o tagata mai i Kalilaia, o aai tūmatafaga o Turo ma Saitonu, le itu i sasaʻe o le vaitafe o Ioritana, Ierusalema, ma Itumaia i le itu i saute. Ua ia faamālōlōina le toʻatele. O le māfuaaga lea ua ō atu ai iā te ia i latou ua mamaʻi tigāina, ma mananaʻo e paʻi atu iā te ia.—Mareko 3:9, 10.

Ua faatoʻateleina tagata, ma ua faatonu e Iesu ona soo e aumai se tamaʻi vaa, ina ia mafai ai ona ia alu ese atu ma taofi ai le lolofi atu o le motu o tagata iā te ia. O le faia faapea, e mafai ai ona ia aʻoaʻo atu i tagata mai i le vaa, pe malaga atu ai foʻi i se isi vaipanoa ina ia fesoasoani ai i isi tagata.

Ua taʻua e Mataio, o le galuega o loo faia e Iesu ua faataunuuina ai “le upu a le perofeta o Isaia.” (Mataio 12:17) O le ā lenei valoaga?

“Faauta! O laʻu auauna o lē na ou filifilia, o laʻu pele, o lē ua fiafia i ai loʻu loto! Ou te tuuina atu loʻu agaga i luga iā te ia, o le a ia faailoa atu i nuu ese le faamasinotonu. E lē finau o ia, e lē alaga leotele foʻi, e lē lagona e se tasi lona leo i ala tetele. E na te lē nutimomomoina se ū ua vaivai, pe tineia se vavae ua mū itiiti, seʻia aumaia e ia le manumalo i mea tonu. E moni, e faamoemoe nuu uma i lona suafa.”—Mataio 12:18-21; Isaia 42:1-4.

O le mea moni, o Iesu, o ia lea o le auauna pele ua fiafia i ai le finagalo o le Atua. Ua faamanino mai e Iesu le uiga moni o le faamasinotonu, lea ua natia ona o tū ma aga a lotu sesē. O le faauigasesēina e le ʻau Faresaio o le tulafono a le Atua, ua latou lē avatu ai se fesoasoani i tagata e oo lava i se tagata e maʻi i le Sapati. O le faailoa atu e Iesu o le faamasinotonu a le Atua faapea foʻi le iai iā te ia o le agaga o le Atua, ua ia tuusaʻoloto ai tagata mai le nofo pologa i tū ma aga e lē tonu. O le māfuaaga lea ua mananaʻo ai taʻitaʻi lotu e fasioti o ia. Pagā le leaga o lenei mea!

O le ā le uiga o le faamatalaga e faapea: “E lē finau o ia, e lē alaga leotele foʻi, e lē lagona e se tasi lona leo i ala tetele”? Pe a faamālōlōina e Iesu tagata, e na te lē faatagaina i latou po o temoni foʻi ʻe faailoa atu o ia.’ (Mareko 3:12) E lē manaʻo Iesu e iloa e tagata mea e faatatau iā te ia, e ala i tala e faia e tagata i ala tetele po o lipoti foʻi e feaveaʻi solo ai faamatalaga sesē e faatatau iā te ia.

Ua faailoa atu foʻi e Iesu lana feʻau faamāfanafanaloto i ē ua pei o ni ū ua vaivai ma ua gauia. Ua pei foʻi i latou o ni vavae ua mumū itiiti. E lē nutimomomoina e Iesu se ū ua vaivai, pe tineia se vavae ua mū itiiti. Peitaʻi, e na te faatulaʻi ē e agamalu i se auala faapelepele ma alofa. O le mea moni, e mafai ona faamoemoe nuu uma iā Iesu.