E mautinoa ua lagona e Iesu le vaivai, talu ai ua alu le pō atoa o tatalo, ona sosoo ai lea ma le filifilia o ona aposetolo e toʻa 12. I le aso e sosoo ai, o loo ia maua pea le malosi ma le naunautaʻiga e fesoasoani ai i tagata. Ua ia faia faapea i le itu o se mauga i Kalilaia, lea atonu e lē mamao mai i Kapanaumi le nofoaga e faamautū i ai lana faiva.

Ua lolofi atu tagata iā te ia mai i vaipanoa eseese. O isi e ō mai mai i le itu i saute, mai i Ierusalema ma isi nofoaga i Iutaia. Ae o isi e ō mai mai i nuu tūmatafaga o Turo ma Saitonu i le itu i mātū i sisifo. Aiseā ua latou saʻili ai iā Iesu? Ina ia latou “faalogologo iā te ia, ma faamālōlō o latou maʻi.” O le mea tonu lenā ua tupu, ua ʻfaamālōlōina i latou uma.’ Seʻi mafaufau i lenei mea. Ua faamālōlōina tagata mamaʻi uma. Ua faamālōlōina foʻi e Iesu i “latou ua mafatia ona o agaga leaga,” po o i latou ua puapuagatia ona o agelu leaga a Satani.—Luka 6:17-19.

Ua oo atu nei Iesu i se vaega laugatasi o le mauga, ma ua faapotopoto ai i inā le motu o tagata. Ua nonofo latalata atu iā te ia ona soo, aemaise ona aposetolo e toʻa 12. Ua naunau i latou uma o loo iai i inā e faalogologo atu i lenei faiaʻoga, o lē e mafai ona faia vavega ofoofogia. Ua faia e Iesu se lauga e aogā mo lana ʻaufaalogologo, ma e talu mai lenā taimi o loo maua ai pea e le toʻatele aogā. E aogā foʻi iā i tatou lenā lauga, ona o le faigofie ma le manino o le auala o loo aumaia ai upu moni loloto. Ua faaaogā e Iesu i lana lauga mea e tutupu i le olaga, ma mea e masani i ai tagata. O lenei auala, ua faigofie ai ona malamalama ē o loo mananaʻo e faia le finagalo o le Atua i le uiga moni o lana lauga. O ā manatu autū o le lauga a Iesu ua māfua ai ona avea o se lauga e tāua tele?

O tagata uma lava e mananaʻo ina ia fiafia. O le iloaina o lenei mea, ua amata ai e Iesu lana lauga i le faamatala atu o i latou o loo fiafia moni. Seʻi manatu i le auala ua ia tosina mai ai manatu o lana ʻaufaalogologo. Peitaʻi, e iai vaega o le lauga e latou te lē o malamalama i ai.

Ua fetalai atu Iesu: ʻE fiafia o ē e naunau i mea faaleagaga, auā e fai mo i latou le malo o le lagi. E fiafia o ē e faanoanoa, auā e faamāfanafanaina i latou. E fiafia o ē e fia aai ma fia inu i le amiotonu, auā e maoona i latou. E fiafia o ē e sauāina ona o le amiotonu, auā e fai mo i latou le malo o le lagi. E fiafia outou pe a upuleagaina ma sauāina outou ona o aʻu. Ia outou olioli ma fiafia.’—Mataio 5:3-12.

O le ā le uiga o le fetalaiga a Iesu “e fiafia”? E lē o faasino atu i le tau ina faaalia o le fiafia. O le fiafia moni o loo uiga atu i ai Iesu e sili atu, lea e aofia ai le mauaina o le faamalieina moni, ma le iai o se fuafuaga aogā i le olaga.

Ua faapea atu Iesu o i latou e fiafia moni, e faasino atu i tagata e iloa o latou manaʻoga faaleagaga, ua faanoanoa ona o lo latou tulaga agasala, ma ua faasolo ina iloa le Atua ma auauna iā te ia. E tusa pe itagia pe sauāina i latou ona o le faia o le finagalo o le Atua, ae e latou te fiafia pea i le iloaina o loo latou faamalieina lona finagalo, ma o le a tauia i latou i le ola e faavavau.

E manatu le toʻatele e maua le fiafia e ala i le tele o ʻoa ma le saʻilia o mea faafiafia o lenei olaga. Ae e lē o le manatu lenā o Iesu. Ua faia nei e Iesu se faaeseesega e uunaʻia ai le toʻatele o lana ʻaufaalogologo e manatunatu loloto: “Oi talofa iā te outou tagata mauʻoa, auā e na o le pau lava na o mea tou te mauaina. Oi talofa iā te outou ua maoona,  auā e fia aai outou. Oi talofa iā te outou ua ʻataʻata, auā e faavauvau ma fetagisi outou. Oi talofa iā te outou pe a faaviivii mai tagata uma iā te outou, auā o mea foʻi na, na faia e o latou augātamā i perofeta pepelo.”—Luka 6:24-26.

E faapefea i le ʻataʻata, mauaina o ʻoa, ma le viiga mai i tagata ona aumaia ai puapuaga? Pe a maua ma faatāua e tagata nei mea, o le a latou lē auauna ai i le Atua, ma o le iʻuga e latou te lē maua ai le fiafia moni. E lē o faapea mai Iesu, e maua le fiafia pe a iai i se tulaga mativa pe matelāina foʻi i le fia ʻai. Peitaʻi, e masani lava o tagata o loo iai i na tulaga, o i latou ia e talileleia aʻoaʻoga a Iesu ma maua le fiafia moni.

Ua fetalai atu Iesu i ona soo: “O outou o le masima o le lalolagi.” (Mataio 5:13) E lē o faapea atu Iesu o i latou o ni masima moni. E faaaogā le masima e faasaoina ai meaʻai mai le faaleagaina. E masani ona iai se faaputuga tele o masima e latalata i le fata faitaulaga o le malumalu, e faaaogā e faamasima ai taulaga. E atagia mai foʻi i le masima le lē faaleagaina o se mea ma e lē oo i ai se pala. (Levitiko 2:13; Esekielu 43:23, 24) Ua avea soo o Iesu ma “masima o le lalolagi,” ona o a latou taʻaiga e mafai ona faasaoina mai ai tagata mai le faaleagaina. E fesoasoani lea vala e ʻalofia ai le faaleagaina o la latou faiā ma Ieova, ma lē faaleagaina ai lo latou tulaga mamā tau amio. Ioe, o le feʻau a soo o Iesu e mafai ona faasaoina ai ola o i latou uma e talilelei mai.

Ua toe faapea atu Iesu i ona soo: “O outou o le malamalama o le lalolagi.” E lē tuuina se molī i lalo o se ato. Peitaʻi, e tuu i luga o le tuugāmolī ina ia mafai ai ona susulu atu le malamalama. O lea ua ʻaiʻoi atu ai Iesu: ʻIa susulu atu lo outou malamalama i luma o tagata, ina ia latou iloa a outou galuega lelei ma vivii atu ai i lo outou Tamā o i le lagi.’—Mataio 5:14-16.

E manatu taʻitaʻi lotu Iutaia iā Iesu o se tasi o loo solia le Tulafono a le Atua, ma sa latou taupulepule e fasioti o ia. O lea, ua fetalai tuusaʻo atu ai Iesu iā i latou: “Aua neʻi outou manatu ua ou sau e faalēaogā le Tulafono po o le ʻau Perofeta. Ou te leʻi sau e faalēaogā, ae ia faataunuuina.”—Mataio 5:17.

E matuā faatāua e Iesu le Tulafono a le Atua ma ua ia uunaʻia foʻi isi tagata ina ia faia faapea. Ua ia  fetalai atu: “O lea, o sē na te solia se poloaʻiga e aupito itiiti o nei poloaʻiga ma faapea foʻi ona aʻoaʻo atu i tagata, e taʻua o ia o lē e ʻfaatauvaa’ i le malo o le lagi.” O le uiga o le fetalaiga a Iesu, e lē mafai lava ona sao atu i le Malo se tagata faapea. Peitaʻi ua ia toe fetalai atu: “A o sē na te tausia nei poloaʻiga ma aʻoaʻo atu, e taʻua o ia o lē e ʻsili’ i le malo o le lagi.”—Mataio 5:19.

E taʻusalaina e Iesu uiga ia e uunaʻia ai se tagata e solia le Tulafono a le Atua. Ina ua māeʻa ona ia faapea atu o loo taʻua i le Tulafono e ʻaua le fasioti tagata,’ ona ia toe fetalai atu lea: “O sē faaauau ona ita i lona uso e faasalaina o ia i le faamasinoga.” (Mataio 5:21, 22) O le faaauau pea ona ita i se tasi e mataʻutia tele, auā e ono iʻu atu ai i le fasioti tagata. O lea, ua faamatala atu ai e Iesu taumafaiga e manaʻomia ona faia ina ia maua ai le filemu: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.”—Mataio 5:23, 24.

O le isi poloaʻiga o loo i le Tulafono o loo taʻusalaina ai le mulilua. Ua faapea atu Iesu: “Ua outou faalogo i nei upu, ʻAua e te mulilua.’ Ae ou te fai atu iā te outou, ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mataio 5:27, 28) E lē o uiga atu le fetalaiga a Iesu i le mafaufau i amioga lē mamā, lea e ono oso faafuaseʻi aʻe i le mafaufau mo na o sina taimi puupuu. Nai lo o lea, o loo ia faamamafa mai le mataʻutia tele o le “vaavaai pea.” O le “vaavaai pea,” e masani ona faagaeeina ai faalogona taufeusuaʻiga, ma e iʻu atu ai i le mulilua pe a maua le avanoa e faatino ai. E faapefea la i se tasi ona ʻalofia lea tulaga? E manaʻomia ni taumafaiga maumauaʻi. Ua fetalai Iesu: ʻO lenei, afai e te tausuai ona o lou mata taumatau, ia sali ese ma lafoaʻi. Afai foʻi e te tausuai ona o lou lima taumatau, inā tipi ese ia ma lafoaʻi.’—Mataio 5:29, 30.

Ina ia faasaoina o latou ola, ua lotomalilie ai nisi e tipiesea o latou lima po o o latou vae ua aafia i se maʻi e matuā leaga. O le māfuaaga lea ua faapea mai ai Iesu, e sili atu ona lelei le “lafoaʻi” o so o se mea, e oo lava i se mea e sili ona tāua e pei o lou mata po o lou lima, ina ia ʻalofia ai le mafaufau i mea e lē mamā ma iʻu atu ai i ni iʻuga leaga. Ua fetalai Iesu: “E sili ona lelei ona aveese se vaega o lou tino, nai lo le lafo o lou tino atoa i Kena” (o se nofoaga e susunu ai otaota i tuāpā o Ierusalema), lea e faasino atu i le faaumatiaga e faavavau.

Ua fautua atu foʻi Iesu i le auala e feutagaʻi ai ma ē e faia gaoioiga e tatou te afāina ai, pe faia foʻi ni faamatalaga e tatou te tigā ai. “Aua le tetee atu i le tagata amioleaga; ae a pō mai e se tasi lou alafau taumatau ia liliu atu i ai le isi.” (Mataio 5:39) E lē o faapea atu la e lē tatau i se tagata ona puipuia o  ia po o lona aiga pe a osofaʻia. O le taʻua e Iesu o le upu “pō,” o loo faasino atu i se gaoioiga e faatigā ai le loto o se tasi, ae e lē faia ina ia tigāina pe oti ai. O lea, o loo uiga atu Iesu i le aua le toe tali atu, pe a taumafai se tasi e amata se vevesi po o se finauga, e ala i le pō mai pe fai mai foʻi se faamatalaga faatigā.

E ōgatusa lenā fautuaga ma le tulafono a le Atua ina ia alofa atu i lē lua te tuaoi. O lea ua apoapoaʻi atu ai Iesu i lana ʻaufaalogologo: “Ia alolofa atu pea i o outou fili ma tatalo pea mo ē ua sauāina outou.” Ua ia aumaia le māfuaaga e tāua ai le faia faapea: “Ina ia avea ai outou ma atalii o lo outou Tamā o i le lagi, o lē na te faaoso lona lā i ē e amioleaga ma ē e amiolelei.”—Mataio 5:44, 45.

Ua aotele e Iesu le vaega lenei o lana lauga i le faapea atu: “Ia atoatoa ona lelei o la outou amio e pei foʻi o lo outou Tamā o i le lagi, e atoatoa ona lelei o ia.” (Mataio 5:48) E lē o faapea mai Iesu e mafai ona lelei atoatoa tagata. Peitaʻi, o le faaaʻoaʻo i le Atua e mafai ai ona faalautele atu lo tatou alofa e oo lava i o tatou fili. I se isi faaupuga: “Ia mutimutivale pea lo outou alofa e pei ona mutimutivale o le alofa o lo outou Tamā.”—Luka 6:36.

A o faaauau le lauga a Iesu, ua ia ʻaiʻoi atu i lana ʻaufaalogologo e faapea: “Ia faaeteete, ia aua neʻi faaalialia la outou amiotonu i luma o tagata ina ia iloa ai e i latou.” Ua taʻusalaina e Iesu uiga faalialiavale o tagata faafiaamiotonu i lona faapea atu: “Pe a foaʻi ni au meaalofa, aua neʻi ilia se pū i ou luma, e pei ona faia e tagata faafiaamiotonu.” (Mataio 6:1, 2) E sili atu ona lelei le avatu o meaalofa e aunoa ma le iloa e tagata.

Ua toe fetalai atu Iesu: “Pe a outou tatalo foʻi, aua neʻi pei outou o tagata faafiaamiotonu, auā latou te tutū ma tatalo i sunako ma magāala o ala tetele, ina ia iloa ai i latou e tagata.” Nai lo lea “ia ulu atu i lou potu, ma tapuni le faitotoʻa, ma tatalo atu i lou Tamā o loo i le mea lilo.” (Mataio 6:5, 6) E lē o taʻusalaina e Iesu tatalo uma e faia i le lautele, auā sa ia faia foʻi tatalo faapena. Peitaʻi, o loo ia faasino atu i tatalo e faia i se auala e faaofo ai tagata ma viiviia ai lē o loo faia le tatalo.

Ua ia faapea atu i le motu o tagata: “Pe a e tatalo, aua le tautū i upu masani e pei o tagata o nuu ese.” (Mataio 6:7) E lē o faapea atu Iesu e sesē le tatalo pea e faatatau i se mataupu patino. Peitaʻi o loo ia faasino atu i le faaaogā o “upu masani,” e pei o se tatalo e aʻo faatauloto. O lea, ua ia aumaia ai le tatalo faaaʻoaʻo lea e aofia ai ōlega e fitu. O ōlega muamua e tolu ua faailoa mai ai le aiā a le Atua e pule ai ma ana fuafuaga: ia faapaiaina lona suafa, ia oo mai lona Malo, ma ia faia lona finagalo. Seʻi vaganā ua māeʻa ona taʻua na vala, ona faatoʻā tatou talosaga lea mo o tatou manaʻoga totino e pei o meaʻai, faamagaloga o agasala, faapea talosaga ina ia aua le tuua i tatou i se faaosoosoga e sili atu nai lo o le mea tatou te lavātia, ma laveaʻi i tatou mai i lē o loo leaga.

 O le ā le vaaiga e tatau ona iā i tatou e faatatau i a tatou meafaitino? Ua augani atu Iesu i le motu o tagata: “Aua tou te toe faaputuina mo outou ʻoa o le lalolagi, auā o loo iai mogamoga ma le ʻele e faaumatia ai, o loo iai foʻi tagata gāoi e osofaʻi atu ma gaoia.” E matuā talafeagai lelei lenei fautuaga, auā o ʻoa faaletino e mafai ona faaumatia ma mou atu, ma e lē mafai ona maua ai sa tatou faiā lelei ma le Atua. O lea ua fetalai atili atu Iesu: “A ia outou faaputu ʻoa i le lagi.” E mafai ona tatou faia faapea, e ala i le faamuamua o le auaunaga i le Atua. E leai se tasi e mafai ona aveesea la tatou faiā lelei ma le Atua, po o le taui e maua mai ai o le ola e faavavau. Ua moni ai upu a Iesu: “O le mea e iai lo outou ʻoa, e iai foʻi ma o outou loto.”—Mataio 6:19-21.

Ua faamamafa e Iesu lenei manatu e ala i se talafaatusa: “O le molī o le tino o le mata lea. Pe afai e lelei lau vaai, e malamalama uma ai lou tino; ae afai e leaga lau vaai e pōuliuli uma ai lou tino.” (Mataio 6:22, 23) Pe a lelei o tatou mata faafaatusa, o le a pei ai o se molī e faamalamalama i o tatou tino. Ae ina ia tupu lenā mea, e manaʻomia ona taulaʻi atu la tatou vaai i se mea se tasi. Pe a lē faia faapea, o le a iai iā i tatou se vaaiga sesē i le olaga. Pe afai e tatou te taulaʻi atu i meafaitino nai lo o le auaunaga i le Atua, o le a ʻpōuliuli uma o tatou tino,’ ma e ono amata ai foʻi ona tatou faia ni gaoioiga e lē faamaoni.

Ua avatu e Iesu se faaaʻoaʻoga malosi e faapea: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.”—Mataio 6:24.

Atonu o loo popole nisi o le ʻaufaalogologo a Iesu po o le a faapefea ona tausia o latou manaʻoga faaletino. O lea, ua ia faamautinoa atu ai e lē tatau ona latou popole i na mea, pe afai e latou te faamuamua le auaunaga i le Atua. “Ia vaavaai lelei i manufelelei o le lagi, auā latou te lē lūlū ni fatu pe  selesele, pe faaputu i se fale teuoloa, ae e fafagaina i latou e lo outou Tamā o i le lagi.”—Mataio 6:26.

Ae faapefea lili o le vao o loo i luga o le mauga? Ua faapea atu Iesu “e oo lava iā Solomona ma lona mamalu uma, e leʻi tutusa lona matagofie ma se tasi o nei lili.” O le ā ua taʻu mai e lenei mea iā i tatou? “Afai ua faaofuina e le Atua laau o le vao ia ua iai i le asō, ae lafoina i le ogaumu a taeao, pe e lē sili ea ona ia faaofuina outou?” (Mataio 6:29, 30) Ua uunaʻia ma le atamai e Iesu lana ʻaufaalogologo e faapea: “Ia aua lava neʻi outou popole ma faapea ane, ʻO le ā se mea tatou te aai ai?’ ʻO le ā se mea tatou te inu ai?’ ʻO le ā foʻi se mea tatou te oofu ai?’ . . . Ua silafia e lo outou Tamā o i le lagi, o mea uma ia o loo outou manaʻomia. O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.”—Mataio 6:31-33.

E mananaʻo le ʻauaposetolo ma isi tagata faamaoni, e ola i se auala e finagalo malie i ai le Atua. Ae e lē faigofie ona latou faia faapea pe a fua i o latou tulaga. O se faaaʻoaʻoga, o le toʻatele o le ʻau Faresaio e faitio ma faamasinosino ma le lē tonu tagata. O lea, ua apoapoaʻi atu ai Iesu i lana ʻaufaalogologo: “Aua tou te toe faamasino atu ina neʻi faamasinoina outou. Auā o le faamasinoga tou te faamasino atu ai, e toe faamasinoina ai foʻi outou.”—Mataio 7:1, 2.

Ua faailoa atu e Iesu le mataʻutia o le faaaʻoaʻo i le ʻau Faresaio o ē e sili ona faitio, e ala i le talafaatusa lenei: “Pe e mafai ea e se tauaso ona taʻitaʻi se isi tauaso? Pe e lē paʻuʻū uma ai ea i laʻua i le lua?” O le ā la le auala e tatau ona vaai ai le ʻaufaalogologo i isi tagata? E lē tatau ona vaai i isi ma se uiga faamasinosino, auā e matuiā lenei uiga. Ua fesili atu Iesu: “E faapefea ona e fai atu i lou uso, ʻLoʻu uso e, tuu mai seʻi oʻu ʻeuese le fasilaau i lou mata,’ ae e te lē vaai i le utupoto i lou lava mata? O oe le tagata faafiaamiotonu! Ia muamua ona aveese le utupoto i lou lava mata, ona e iloa lelei ai lea ʻeuese le fasilaau i le mata o lou uso.”—Luka 6:39-42.

E ui lava e lē tatau ona faamasinosino e soo o Iesu isi, ae e tatau pea ona latou faaaogā le faautaga loloto pe a feutagaʻi ma i latou. Ua ʻaiʻoi atu Iesu: “Aua neʻi avatua mea paia i taʻifau, aua foʻi neʻi lafoina a outou penina i puaa.” (Mataio 7:6) Ua faatusaina upu moni mai le Afioga a le Atua e pei o ni penina tautele. Pe afai e faaalia e nisi tagata ni amioga faamanu, ma lē talisapaia nei upu moni tautele, e tatau i soo o Iesu ona tuua i latou ae saʻili isi tagata e talileleia la latou feʻau.

Ua toe talanoa atu nei Iesu e faatatau i le tatalo, ma ua ia faamamafa atu i lana ʻaufaalogologo le tāua o le finafinau i le tatalo. “Ia talosaga atu pea, ona foaʻiina mai ai lea iā te outou.” O loo nofosauni le Atua e tali mai i tatalo, e pei ona faamatilatila e Iesu i lana fesili e faapea: ʻPo o ai se isi o outou e avatu i lona atalii se maa pe a talosaga mai i se falaoa? E ui o outou o tagata leaga, ae e mafai lava ona outou avatu meaalofa lelei i a outou fanau. E sili atu la ona foaʻi mai e lo outou Tamā o i le lagi mea lelei i ē e ōle atu iā te ia!’—Mataio 7:7-11.

Ina ua māeʻa lenā, ona taʻua lea e Iesu o le tulafono taʻutaʻua e faatatau i amioga: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” Pe e  lē tatau ea ona tatou manatunatu loloto i na upu, ma faatatauina i le auala e tatou te feutagaʻi ai ma isi? E ono avea lenā vala o se luʻi e pei ona faaalia i le faatonuga a Iesu: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.”—Mataio 7:12-14.

E iai i latou e taumafai e tataʻi ese soo o Iesu mai i le ala i le ola. O lea ua lapataʻia ai e Iesu ona soo: “Ia mataala pea i perofeta pepelo, o ē e ō mai iā te outou i ofu mamoe, a o totonu o luko feʻai lava i latou.” (Mataio 7:15) E iloa laau lelei ma laau leaga i o latou fua. E faapena foʻi tagata. O lea, e mafai ona tatou iloa perofeta pepelo i a latou aʻoaʻoga ma amioga. Ua faapea atu Iesu e iloagofie ona soo e lē gata i a latou faamatalaga, ae o a latou amioga foʻi. Ua faapea mai nisi o Iesu o lo latou Alii. Ae faapefea pe afai e latou te lē o faia le finagalo o le Atua? Ua fetalai atu Iesu: “Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.”—Mataio 7:23.

Ua faaiʻu le lauga a Iesu e faapea: “O i latou uma e faalogo i aʻu upu ma faia, ua faatusaina i latou i le tagata faautauta, ua na fausia lona fale i luga o le papa. Ona totō mai lea o timuga ma ua oo mai lologa, ma agi mai le matagi ma taia ai le fale, ae e leʻi paʻū, auā ua fausia i luga o le papa.” (Mataio 7:24, 25) Aiseā e leʻi paʻū ai le fale? Talu ai “ua eli maulalo [e le tagata] ma faataatia le faavae i luga o le papa.” (Luka 6:48) O lea, e tele atu isi mea e aofia ai nai lo o le tau ina faalogologo i upu a Iesu. E tatau ona tatou matuā finafinau e “faia” na upu.

Ae faapefea lē e ʻfaalogo i nei upu’ ae e “lē faia”? Ua faatusaina o ia “i le tagata valea ua na fausia lona fale i luga o le oneone.” (Mataio 7:26) E mafai ona paʻū lenei fale pe a oo mai timuga, lologa ma matagi malolosi.

Ua matuā ofo le motu o tagata i le auala ua aʻoaʻo atu ai Iesu. Ua aʻoaʻo atu o ia e pei o se tasi e iai le pule, ae e lē pei o taʻitaʻi lotu. Atonu o le toʻatele o i latou na faalogologo atu iā te ia, ua avea ma ona soo.