Ua lata nei i le Paseka i le 32 T.A., ma o loo pisi pea Iesu e aʻoaʻo atu i tagata i Kalilaia. Mulimuli ane, ua agaʻi atu o ia i Ierusalema mo le Paseka e tusa ai ma le Tulafono a le Atua. Ua ia faia faapea ma le faaeteete, talu ai o loo lamalama tagata Iutaia e fasioti iā te ia. (Ioane 7:1) Ina ua mavae lenā, ona toe foʻi ai lea o ia i Kalilaia.

Atonu o loo iai Iesu i Kapanaumi, ina ua ō atu iā te ia le ʻau Faresaio ma le ʻautusiupu mai i Ierusalema. Aiseā? O loo latou taumafai e saʻili so o se faamaoniga e tuuaʻia ai Iesu e faapea, ua ia solia se tulafono o le talitonuga faa-Iutaia. Ua latou fesili atu: “Aiseā ua solia ai e ou soo tū masani a tagata mai anamua? Auā ua lē fafano o latou lima a o leʻi aai.” (Mataio 15:2) E leʻi fetalai lava le Atua i ona tagata ina ia tausia lenei tū masani, o le ʻfafano o o latou lima e oo i o latou tulilima.’ (Mareko 7:3) Peitaʻi, e manatu le ʻau Faresaio o se solitulafono pe a lē faia faapea e se tasi.

Nai lo o le tali saʻo atu o Iesu i la latou tuuaʻiga, ae ua ia faasino atu i le auala o loo latou solia ma le loto i ai le Tulafono a le Atua. Ua fesili atu o ia: “Aiseā foʻi ua outou solia ai le poloaʻiga a le Atua i a outou tū masani? Auā ua fetalai le Atua, ʻIa e āva i lou tamā ma lou tinā’; ma ʻO lē e fai upuleaga i lona tamā ma lona tinā e fasiotia lava o ia.’ A ua outou fai mai, ʻO sē e faapea atu i lona tamā po o lona tinā: “O mea uma ua iā te aʻu e aogā iā te oe, o meaalofa na e ave i le Atua,” e lē tatau ona āva o ia i lona tamā.’”—Mataio 15:3-6; Esoto 20:12; 21:17.

Ua faapea mai le ʻau Faresaio o tupe, meatotino, po o se isi lava mea ua avatu e fai ma meaalofa i le Atua, e tatau ona faaaogā mo le malumalu ma e lē mafai ona faaaogāina mo se isi lava fuafuaga. Peitaʻi, o le mea moni o loo iai pea i le tagata le meaalofa lea e tatau ona ave mo le Atua. O se faataʻitaʻiga, e ono faapea atu se atalii o ana tupe po o ana meatotino o le “kopano,” o le meaalofa lea e ave i le Atua po o le malumalu. O lenei tulaga, ua peiseaʻī ai e tatau ona ia ave le faamuamua i tiute tauave i le malumalu, nai lo o se isi lava tiute tauave. E mafai lava ona faaaogā e le atalii le tupe po o meatotino. Peitaʻi, ua ia faapea atu e lē mafai ona faaaogā e fesoasoani ai i ona mātua ua matutua, o loo manaʻomia le fesoasoani. O lea, ua ia tuulafoaʻia ai lona tiute tauave o le tausia o ona mātua.—Mareko 7:11.

Ua talafeagai le toʻatamaʻi o Iesu, ona o le auala ua mimilosesē ai le Tulafono a le Atua. Ua ia fetalai atu: “Ua outou faalēaogā ai le afioga a le Atua i a outou tū masani. O outou o tagata faafiaamiotonu, ua moni ai le valoaga a Isaia iā te outou e faapea, ʻUa āva mai nei tagata iā te aʻu i o latou laugutu, a ua mamao ese lava o latou loto mai iā te aʻu. E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.’” Ua lē mafai e le ʻau Faresaio ona tali atu i aʻoaʻiga malolosi a Iesu. O lea, ua ia valaau atu i le motu o tagata ma fetalai atu: “Inā faalogo ia ma ia malamalama: E lē leaga se tagata i mea e ʻai ai; ae e faaleagaina o ia i mea e sau mai i lona fofoga.”—Mataio 15:6-11; Isaia 29:13.

Mulimuli ane a o iai Iesu i se tasi o fale, ua ō atu ona soo ma fesili atu iā te ia: “Pe e te silafia ua lē malilie le ʻau Faresaio i au fetalaiga?” Ua tali mai o ia: “O laau uma e leʻi totōina e loʻu Tamā o i le lagi, e liaʻieseina. Tuu ai pea i latou. Auā o i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.”—Mataio 15:12-14.

Peitaʻi, ua faateʻia Iesu ina ua fesili atu Peteru o lē sa fai ma sui o le ʻausoo, po o ā mea e faaleagaina ai le tagata. Ua tali mai Iesu: “Pe e tou te lē iloa ea, o meaʻai uma e alu atu i le fofoga, e ui atu i le manava ma toe alu atu i fafo? Ae peitaʻi, o mea e sau mai i le gutu e sau lea mai i le loto, ma o mea na e leaga ai le tagata. Auā e sau mai i le loto o mafaufauga leaga, o le fasioti tagata, mulilua, faitaaga, gaoi, molimau pepelo, ma upuleaga. O mea na e leaga ai le tagata; ae e lē leaga se tagata pe a ʻai ae lē fafanoina ona lima.”—Mataio 15:17-20.

E lē o faapea atu Iesu e aua neʻi tausia le tumamā faaletino, pe aua foʻi neʻi fafanoina lima o se tasi a o leʻi saunia meataumafa po o le taimi foʻi e aai ai. Nai lo o lea, o loo ia taʻusalaina uiga faafiaamiotonu o taʻitaʻi lotu, o ē e taumafai e mimilosesē tulafono amiotonu a le Atua, e ala i le tausisi pea i tū masani a tagata. O lea, e mapuna aʻe mai i le loto o le tagata, galuega leaga lea e faaleagaina ai o ia.