O le aso mulimuli lenei, le aso lona fitu o le Tausamiga o Faleapitaga. O loo aʻoaʻo atu Iesu i le vaega o le malumalu lea “e teu ai oloa.” (Ioane 8:20; Luka 21:1) E foliga mai o lenei vaega o loo i le itu o le malumalu e taʻua o le Lotoā o Fafine, lea e iai pusa e tuu ai e tagata a latou meaalofa.

I pō uma o le tausamiga, e sili atu ona faamalamalamaina le vaega lea o le malumalu. E fā tuugālamepa uumi e faatutū ai i inā, e tofu ma pesini lapopoʻa taʻi fā e tutumu i suāuu. O le malosi o le mumū o nei tuugālamepa, ua mafai ai ona malamalama le tele o vaega o le malumalu. Atonu ua toe manatua e le ʻaufaalogologo a Iesu lenei vala, ina ua fetalai o ia: “O aʻu o le malamalama o le lalolagi. O lē e mulimuli mai iā te aʻu, e lē savali lava o ia i le pōuliuli, ae maua e ia le malamalama o le ola.”—Ioane 8:12.

Ua teena e le ʻau Faresaio le fetalaiga a Iesu ma faapea atu: “Ua e molimau iā te oe lava; ma e lē moni lau molimau.” Ua tali mai Iesu: “E ui lava ina ou molimau iā te aʻu, ae e moni laʻu molimau, auā ua ou iloa le mea na ou sau ai, ma le mea ou te alu atu i ai. A o outou, tou te lē iloa le mea na ou sau ai, ma le mea ou te alu atu i ai.” Ua fetalai atili o ia: “Ua tusia foʻi i la outou Tulafono, ʻE moni le molimau a tagata e toʻalua.’ A o aʻu, ua ou molimau iā te aʻu lava, ma o le Tamā na auina mai aʻu, o loo molimau foʻi iā te aʻu.”—Ioane 8:13-18.

Peitaʻi ua lē talia e le ʻau Faresaio upu a Iesu, ma ua latou fesili atu iā te ia: “O fea o iai lou Tamā?” Ua tali tuusaʻo mai Iesu: “Tou te lē iloa aʻu ma loʻu Tamā. Ana outou iloa aʻu, semanū ua outou iloa foʻi loʻu Tamā.” (Ioane 8:19) E ui lava o loo mananaʻo pea le ʻau Faresaio e puʻe iā Iesu, ae e leai se tasi ua oo lona lima iā te ia.

Ua toe taʻua e Iesu ana upu sa taʻua i le taimi muamua: “O le a ou alu, ma e tou te saʻili mai iā te aʻu, ae e oti outou i la outou agasala. E lē mafai ona outou ō mai i le mea ou te alu i ai.” Peitaʻi, e lē o malamalama tagata Iutaia i le uiga o ana fetalaiga. O lea, ua latou taumānatu ai: “Po o le a pule o ia i lona ola? Auā ua ia fai mai, ʻE lē mafai ona outou ō mai i le mea ou te alu i ai.’” E latou te lē o malamalama i le uiga o upu a Iesu, auā e latou te lē iloa le mea na afio mai ai o ia. Ua faamatala atu e Iesu: “O outou e mai i lalo nei; a o aʻu e mai i lugā. O outou e mai i lenei lalolagi; a o aʻu ou te lē mai i lenei lalolagi.”—Ioane 8:21-23.

O loo faasino atu Iesu i lona soifuaga i le lagi a o leʻi afio mai i le lalolagi, ma le avea ai ma Mesia na folafolaina mai po o le Keriso, lea e tatau ona faatalitalia e nei taʻitaʻi lotu. Peitaʻi, ua latou fesili faaʻamuʻamu atu iā te ia: “O ai ea oe?”—Ioane 8:25.

E ui lava i a latou teteega, ae ua tali atu Iesu: “Ua maʻimau le taimi ou te talanoa atu ai iā te outou.” Ua faauaʻi atu pea e Iesu manatu o lana ʻaufaalogologo i lona Tamā, ma faamatala atu le māfuaaga e tatau ai i tagata Iutaia ona faalogo i le Atalii: “O lē na auina mai aʻu, e faamaoni o ia, ma o mea foʻi na ou faalogo ai mai iā te ia, ua ou tautala atu ai i le lalolagi.”—Ioane 8:25, 26.

Ua faailoa atu nei e Iesu lona maufaatuatuaina o lona Tamā, o se uiga e lē o faaalia e nei tagata Iutaia. Ua fetalai o ia: “Pe a siitia e outou i luga le Atalii o le tagata, ona outou iloa ai lea o aʻu lava o ia, ma ou te lē faia se mea i loʻu lava loto; ae e pei ona aʻoaʻo mai e le Tamā iā te aʻu, o mea ia ou te tautala atu ai. O loo ma faatasi ma lē na auina mai aʻu; ma na te leʻi tuua aʻu na o aʻu, auā ou te faia pea mea e fiafia i ai lona finagalo.”—Ioane 8:28, 29.

Peitaʻi, e iai tagata Iutaia ua talitonu iā te ia. O lea ua faapea atu ai Iesu iā i latou: “O outou o oʻu soo moni pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.”—Ioane 8:31, 32.

E fou i le faalogo a nisi o tagata Iutaia lenei mea. Ua latou faapea atu iā Iesu: “O i matou o le fanau a Aperaamo, ma e leʻi faia lava i matou ma pologa a se tagata. Aiseā la ua e fai mai ai ʻE tuusaʻoloto outou’?” O le tele o taimi sa pulea ai tagata Iutaia e isi atunuu, ae e latou te leʻi mananaʻo e taʻua i latou o ni pologa. Peitaʻi, ua taʻua e Iesu o loo avea pea i latou ma pologa i lona faapea atu: “E moni, e moni, ou te fai atu iā te outou, O lē na te faia le agasala, o le pologa lea a le agasala.”—Ioane 8:33, 34.

O le mumusu o tagata Iutaia e amanaʻia lo latou nofo pologa i le agasala, ua tuua ai i latou i se tulaga lamatia. Ua faapea atu Iesu: ʻE lē tumau e faavavau le pologa i se aiga; ae e tumau e faavavau le atalii.’ (Ioane 8:35) E leai ni aiā a se pologa i se tofi, ma e ono tuliesea o ia i so o se taimi. E na o le atalii e fanau mai i le aiga, pe vaetamaina foʻi e le aiga e tumau e “faavavau.” O lona uiga, po o le ā lava le umi e ola ai o ia.

O lea, o le upu moni e faatatau i le Atalii, e tuusaʻoloto ai e faavavau tagata mai i le agasala lea e iʻu ai i le oti. Ua fetalai atu Iesu: “Afai e tuusaʻoloto outou e le Atalii, ona outou saʻoloto moni ai lea.”—Ioane 8:36.