Na fetalai Iesu e na o le “lafu mamoe itiiti” e maua so latou nofoaga i le Malo i le lagi. (Luka 12:32) Peitaʻi, e lē tatau ona manatu māmā i le mauaina o lenā taui matagofie. Ua faamamafa mai e Iesu le tāua o le iai i se tasi o se vaaiga saʻo, ina ia avea ai ma vaega o le Malo.

O lea, ua timaʻi atu ai Iesu i ona soo ina ia nofosauni pea mo le taimi e toe afio mai ai o ia. Ua ia fetalai atu: “Ia fusia o outou sulugātiti, ma ia mumū pea a outou molī, ona pei lea o outou o tagata ua faatalitali i le toe foʻi mai o lo latou matai mai i le faaipoipoga. Ua taunuu o ia ma tuʻituʻi mai, ona latou tatala atu loa lea iā te ia. E fiafia na pologa pe a taunuu mai lo latou matai, ma maua mai o loo latou mataala!”—Luka 12:35-37.

E faigofie lava i le ʻausoo ona malamalama i le vaaiga saʻo o loo faataʻitaʻi atu e Iesu. O loo nofosauni pea ma faatalitali auauna o loo taʻua e Iesu i le taimi e taunuu mai ai lo latou matai. Ua faapea atu Iesu: “E fiafia i latou pe a taunuu mai [le matai] i le leoleoga lona lua [e amata mai i le tā o le iva i le pō e oo atu i le vaeluapō], po o le leoleoga lona tolu foʻi [e amata mai i le vaeluapō e oo atu i le tā o le tolu i le vaveao], ma maua i latou o faia faapea!”—Luka 12:38.

O lenei fetalaiga, e lē na o se fautuaga e faatatau i le avea o ni auauna o le aiga, po o ni ʻaufaigaluega e galulue mamafa. E manino lenā manatu i le auala ua faaaofia ai e Iesu o ia i le talafaatusa. Ua fetalai atu o ia i ona soo: “O le mea lea ia outou nofosauni ai, auā o le itula tou te lē manatunatu ai, e sau ai le Atalii o le tagata.” (Luka 12:40) O lea, e iai le taimi i le lumanaʻi o le a afio mai ai Iesu. E finagalo o ia ina ia maua mai ona soo o loo nofosauni pea, aemaise lava i latou o le “lafu mamoe itiiti.”

Ua fia malamalama Peteru i le uiga o le fetalaiga a Iesu. O lea ua ia fesili atu ai: “Le Alii e, po o e fetalai mai lenei talafaatusa iā i matou po o tagata uma?” Nai lo o le tali tuusaʻo iā Peteru, ua faamatala e Iesu se isi talafaatusa e fesootaʻi atu i le talafaatusa lea faatoʻā uma ona ia faamatalaina: “O ai foʻi le auauna pule e faamaoni ma faautauta, ua tofia e lona matai e vaavaaia lana ʻautautua, ma avatu a latou meaʻai e talafeagai i le taimi tatau? E fiafia lenā pologa pe a taunuu mai lona matai, ma maua mai o loo ia faia faapea! E moni ou te fai atu iā te outou, o le a ia tofia o ia e vaavaaia ana mea uma.”—Luka 12:41-44.

I le talafaatusa muamua, e faasino atu “le matai” iā Iesu le Atalii o le tagata. E talafeagai la ona faapea atu, o le ʻauauna pule faamaoni’ e faia aʻe i se vaega toʻaitiiti o tane o le “lafu mamoe itiiti,” lea o le a tuuina atu i ai le Malo. (Luka 12:32) I lenei talafaatusa, o loo fetalai ai Iesu e faatatau i se vaega patino o lenei lafu mamoe itiiti, lea o le a avatuina i “lana ʻautautua” “a latou meaʻai e talafeagai i le taimi tatau.” O lea o loo aʻoaʻoina ma fafagaina faaleagaga e Iesu Peteru ma isi soo. Ua latou iloa mai la i inei, o le a iai le taimi i le lumanaʻi o le a afio mai ai le Atalii o le tagata. I lenā taimi, o le a iai se faatulagaga mo le fafagaina faaleagaga o soo o Iesu, le “ʻautautua” a le Matai.

Ua faamatilatila mai foʻi e Iesu i se isi auala, le māfuaaga e manaʻomia ai i ona soo ona mataala, ma iloilo totoʻa pe e faapeʻī o latou uiga faaalia. Pe a lē faia faapea, o le a faasolosolo ina latou faatalalē ma iʻu ai ina teena o latou uso ma tuafāfine: “Ae afai e faapea ifo lenā pologa i lona loto, ʻUa tuai mai loʻu matai,’ ma amata ona ia fasi i auauna tane ma auauna fafine, ua ʻai ma inu ma ua onā, o le a sau le matai o lenā pologa i le aso e na te leʻi faatalitalia ma le itula e na te leʻi iloa, ona ia matuā faasala lea iā te ia ma tofia o ia faatasi ma tagata lē faamaoni.”—Luka 12:45, 46.

Ua fetalai Iesu ua sau o ia “e tutu le afi i le lalolagi,” ma o le mea moni lenā ua tupu. Ua ia lāgā mataupu e faatupu ai fevaevaeaʻiga, ma iʻu ai i le faaalialia o le sesē o tū ma aʻoaʻoga a lotu. Ua fevaevaeaʻi ai foʻi i latou ia e tatau ona nonofo fealofani, e pei “o le tamā i lona atalii ma le atalii i lona tamā, o le tinā i lana tama teine ma le tama teine i lona tinā, o le tinā i le avā a lana tama tama e faapena foʻi le avā i le tinā o lana tane.”—Luka 12:49, 53.

E faasino patino atu na upu i soo o Iesu. Ina ua māeʻa ona ia taʻua o na upu, ona ia faliu atu lea i le motu o tagata ma faapea atu iā i latou: “Pe a outou vāai atu ua alu aʻe le ao i le itu i sisifo, ona outou faapea mai lea, ʻO le a agi mai se matagi malosi,’ ma e taunuu lava. Pe a outou iloa ua agi mai se matagi mai le itu i saute, ona outou faapea mai lea, ʻO le a oo mai le lāmala,’ ma e taunuu lava. O outou tagata faafiaamiotonu, ua outou iloa ona mātau foliga o le lalolagi ma le lagi, ae aiseā ua outou lē iloa ai ona mātau lenei taimi patino?” (Luka 12:54-56) Ua fetalai atu Iesu i nei upu, talu ai o le toʻatele o i latou sa faauamaaa ma e leʻi mananaʻo e talia le mea moni o ia o le Mesia. E manino mai la, e latou te lē o nofosauni.