O loo iai pea Iesu i Ierusalema mo le Tausamiga o Faleapitaga (po o Fale Lauvao), ma ua faaauau pea ona ia aʻoaʻo atu upu moni tāua i tagata. Ua faapea atu nisi o tagata Iutaia o loo iai i inā: “O i matou o le fanau a Aperaamo, ma e leʻi faia lava i matou ma pologa a se tagata.” Ae ua tali mai Iesu: “Ou te iloa o outou o le fanau a Aperaamo; ae o loo outou lamalama e fasioti iā te aʻu, ona tou te lē taliaina aʻu upu. Ua ou tautala i mea na ou vaai i ai a o ma faatasi ma loʻu Tamā; a o outou, ua outou faia mea ua outou faalogo ai mai i lo outou tamā.”—Ioane 8:33, 37, 38.

E faigofie lava le uiga o le fetalaiga a Iesu: E ese lona Tamā mai i lo latou tamā. Peitaʻi, e lē o malamalama tagata Iutaia i le uiga o upu a Iesu, ma ua latou toe faapea atu: “O lo matou tamā o Aperaamo.” (Ioane 8:39; Isaia 41:8) O nei tagata Iutaia e tupuga mai iā Aperaamo. O lea la ua latou manatu ai e tutusa lo latou faatuatua, ma le uō a le Atua o Aperaamo.

Peitaʻi, ua faateʻia i latou i le tali atu o Iesu: “Afai o outou o le fanau a Aperaamo, ia faia galuega a Aperaamo.” O le mea moni, e faaaʻoaʻo se atalii i lona tamā. Ua toe faaauau le fetalaiga a Iesu: “A o lenei, ua outou lamalama e fasioti iā te aʻu, o le tagata ua taʻu atu iā te outou le upu moni ua ou faalogo ai mai i le Atua. O le mea lenā e leʻi faia e Aperaamo.” Ua fai atu e Iesu se faamatalaga e faigatā ona malamalama i ai nei tagata Iutaia: “Tou te faia galuega a lo outou tamā.”—Ioane 8:39-41.

E lē o malamalama lava tagata Iutaia po o ai o loo faasino atu i ai le fetalaiga a Iesu. Ua latou taʻutino o i latou o atalii moni e ala i le faapea atu: “Matou te leʻi fananau mai ona o le faitaaga; e toʻatasi lo matou Tamā, o le Atua lea.” Pe e moni o le Atua lo latou Tamā? Ua fetalai atu Iesu iā i latou: “Afai o le Atua lo outou Tamā, tou te alolofa la iā te aʻu, auā ua ou sau mai i le Atua, ma ua ou i inei. Ou te leʻi sau i loʻu lava loto, a o Ia na auina mai aʻu.” Ua lāgā e Iesu se fesili ma ua toe tali e ia lava e faapea: “Aiseā ua outou lē iloa ai mea ua ou fai atu ai? Auā tou te lē faalogo i aʻu upu.”—Ioane 8:41-43.

O loo taumafai Iesu e faailoa atu i tagata Iutaia iʻuga e oo iai pe a latou teena o ia. O lea, ua ia fetalai tuusaʻo atu ai: “O outou e mai i lo outou tamā le Tiapolo, ma ua outou mananaʻo foʻi e faia mea e tuʻinanau i ai lo outou tamā.” E faapeʻī lo latou tamā? Ua faamatalaina ma le manino e Iesu o ia e faapea: “O ia o le fasioti tagata talu le amataga, e leʻi tumau lava o ia i le upu moni.” Ua toe fetalai atu Iesu: “O lē e mai i le Atua e faalogo o ia i afioga a le Atua. O le mea lea ua outou lē faalogo ai, auā e lē mai i le Atua outou.”—Ioane 8:44, 47.

Ua matuā feita le ʻau Iutaia i le taʻusalaina o i latou e Iesu. O lea ua latou faapea atu ai: “E lē saʻo ea la matou upu, O oe o le Samaria ma ua iā te oe se temoni?” Ua iloa lo latou ʻinoʻino iā Iesu i lo latou taʻua o ia “o le Samaria.” Peitaʻi, e lē o amanaʻia e Iesu a latou taufaifaiga ma ua tali atu: “E lē o iā te aʻu se temoni, peitaʻi ou te āva i loʻu Tamā, ae tou te lē āva iā te aʻu.” E iloa le tāua o lenei mataupu i le faamatalaga lenei a Iesu e faateʻia ai: “E lē oo lava le oti i lē e tausi i mea ua ou aʻoaʻo atu ai.” E lē o faapea atu Iesu e lē taitai oo le oti i le ʻauaposetolo ma isi tagata o loo mulimuli atu iā te ia. Ae o loo uiga atu i le lē oo iā i latou o le faaumatiaga e faavavau po “o le oti faalua,” lea e lē iai se faamoemoe o le toetū.—Ioane 8:48-51; Faaaliga 21:8.

E lē o iloa e tagata Iutaia o loo tautala Iesu i se uiga faafaatusa. O lea ua latou faapea atu ai: “Ua matou iloa nei, ua iā te oe le temoni. Ua oti Aperaamo faapea foʻi ma le ʻauperofeta; a ua e fai mai ʻE lē oo lava le oti i lē e tausi i mea ua ou aʻoaʻo atu.’ Pe e sili ea oe i lo matou tamā o Aperaamo, o lē ua maliu? . . . A o ai la oe?”—Ioane 8:52, 53.

E manino mai, o loo faailoa atu e Iesu o ia o le Mesia. Ae nai lo o le tali saʻo atu i la latou fesili po o ai o ia, ua ia faapea atu iā i latou: “Afai ou te faamamaluina aʻu lava, ua lē aogā lenā mamalu. O loʻu Tamā o lē ua outou fai mai o lo outou Atua, o ia lea ua faamamaluina aʻu; ae ua outou lē iloa o ia. A o aʻu, ou te iloa o ia. Afai ou te fai atu ou te lē iloa o ia, ua ou pepelo la e pei o outou.”—Ioane 8:54, 55.

Ua toe taʻua e Iesu le faaaʻoaʻoga a lo latou augātamā faamaoni o Aperaamo: “Na matuā olioli lo outou tamā o Aperaamo i le faamoemoe e vaai i mea o le a ou faia, ma na ia vaai i ai ma olioli ai.” Ioe, o le talitonuina e Aperaamo o le folafolaga a le Atua, sa ia tulimataʻia ai le taimi e taunuu mai ai le Mesia. E lē talitonu tagata Iutaia i le faamatalaga lenei a Iesu, ma ua latou faapea atu: “E leʻi atoa le lima sefulu o ou tausaga, ae po ua e vaai ea iā Aperaamo?” Ua tali mai Iesu: “E moni, e moni, ou te fai atu iā te outou, A o leʻi iai Aperaamo, a ua leva ona ou iai.” O loo faasino atu Iesu i lona soifuaga i le lagi o se agelu malosi, a o leʻi afio mai i le lalolagi.—Ioane 8:56-58.

O le feita tele o tagata Iutaia i le faamatalaga a Iesu e faapea, na soifua muamua o ia a o leʻi iai Aperaamo, ua latou fetagofi ai i maa o le a tauʻai o ia. Peitaʻi ua maliu ese Iesu mai i lea nofoaga, ma e leʻi afāina o ia.