Ua valaauina e le ʻau Faresaio mātua o le tamāloa na fanau mai e tauaso, ona e latou te lē o talitonu na faapupulaina e Iesu ona mata. E iloa e mātua o lenei tamāloa, ua iai i laʻua i se tulaga e ono ʻfaateʻaina ai mai i le sunako.’ (Ioane 9:22) Pe a faateʻaina se tasi mai i le sunako, o le a lē toe iai se sootaga ma isi tagata Iutaia, ma o le a iai ni āuga matuiā i le aiga i le itu tau tamaoaiga ma le va fealoaʻi ma tagata.

Ua fesili atu le ʻau Faresaio: “Po o la oulua tama ea lenei na lua fai mai na fanau mai o tauaso? Ua faapefea la ona pupula nei o ia?” Ua tali mai ona mātua: “Ua ma iloa o la ma tama lenei na fanau mai o tauaso. Ae ma te lē iloa pe na faapefea ona pupula o ia, e ma te lē iloa foʻi po o ai na faapupulaina ona mata.” E tusa pe na faamatala e le tamāloa na tauaso i ona mātua le mea na tupu, ae e la te faaeteete lava i le auala e tali atu ai i le ʻau Faresaio. O lea ua la faapea atu ai: “Ia outou fesili atu iā te ia. Ua matua o ia, ma e tautala mai lava o ia.”—Ioane 9:19-21.

Ua toe valaau e le ʻau Faresaio le tamāloa na tauaso ma faamataʻu iā te ia, i le faapea atu e iai a latou faamaoniga e molia ai Iesu. Ua latou faatonuina o ia: “Ia e faamamaluina le Atua; ua matou iloa o ia o le tagata agasala.” Ae ua tali atu le tamāloa i a latou tuuaʻiga: “Ou te lē iloa po o ia o se tagata agasala. E pau le mea ou te iloa, na ou tauaso, a o lea ua ou pupula.”—Ioane 9:24, 25.

E leʻi gata ai i inā taumafaiga a le ʻau Faresaio. Ua latou toe faapea atu: “O le ā lana mea na fai iā te oe? Na faapefea ona ia faapupulaina ou mata?” Ua tali mai ma le lototele le tamāloa: “Ua faafia ona ou taʻu atu iā te outou ae tou te lē faalogo. Aiseā la tou te toe fia faalogo mai ai? Pe tou te mananaʻo ea e avea outou ma ona soo?” O le feita tele o le ʻau Faresaio i lenā faamatalaga, ua latou fai atu ai: “O oe o le soo o lenā tagata, a o i matou o soo o Mose. Ua matou iloa na fetalai mai le Atua iā Mose; a o lenā tagata, matou te lē iloa pe e mai fea o ia.”—Ioane 9:26-29.

Ua maofa le tamāloa na tauaso i lenā faamatalaga, ma ua ia faapea atu: “O le mea lenei e ofo ai, ona ua outou lē iloa pe e mai fea o ia, ae ua ia faapupulaina oʻu mata.” Ua ia faia nei se faamatalaga manino e iloa ai i latou e faafofogaina e le Atua ma maua lona finagalo malie: “Ua tatou iloa e lē faafofoga le Atua i tagata agasala, ae afai e mataʻu se tasi i le Atua ma fai lona finagalo, e faafofoga o ia i lenā tagata. Talu mai aso anamua, e leʻi faalogo lava i se tagata ua faapupulaina mata o se tasi na fanau mai ua tauaso.” O lea la, ua manino mai: “Ana lē mai i le Atua lenei tagata, e leai lava se mea e mafai ona ia faia.”—Ioane 9:30-33.

Ua lē mafai e le ʻau Faresaio ona faamaonia e sesē le faamatalaga a le tamāloa na tauaso. O lea ua latou upuleagaina ai o ia i le faapea atu: “Na e fanau mai ua tumu oe i le agasala, ae e te aʻoaʻo mai ea iā i matou?” Ua māeʻa lenā, ona latou tulia lea o ia i fafo.—Ioane 9:34.

Ua logotala Iesu i le mea ua tupu, ma ua alu atu ma saʻili le tamāloa na tauaso. Ua ia maua o ia ma ua fesili atu i ai: “Po ua e faatuatua ea i le Atalii o le tagata?” Ua tali mai le tamāloa: “Lau susuga e, o ai o ia, ina ia ou faatuatua ai iā te ia?” Ua taʻu saʻo atu e Iesu: “O lea ua e vaai iā te ia, ma o ia lea o loo tautala atu iā te oe.”—Ioane 9:35-37.

Ua tali mai le tamāloa: “Le Alii e, ua ou faatuatua iā te ia.” Ua faaalia e le tamāloa lona faatuatua ma le faaaloalo, e ala i le ifo atu iā Iesu. Ua taʻu atu e Iesu le faamatalaga tāua lenei: “O le faamasinoga lenei na ou sau ai i le lalolagi: Ina ia vāai i latou o ē e lē vāai, ae ia faatauasoina i latou o ē o vāai.”—Ioane 9:38, 39.

Ua iloa e le ʻau Faresaio o loo iai i inā, e lē o i latou o ni tagata tauaso. Ae faapefea lo latou matafaioi o ni ē e saunia taʻitaʻiga faaleagaga? Ua latou fesili atu iā Iesu: “Po ua tauaso foʻi i matou?” Ua tali mai Iesu: “Pe ana outou tauaso, ua leai sa outou agasala. A o lenei ua outou fai mai, ʻUa vāai i matou.’ O lea, ua tumau ai pea la outou agasala.” (Ioane 9:40, 41) Pe ana faapea e lē o i latou o ni aʻoaʻo i Isaraelu, semanū e faigofie ona malamalama i le māfuaaga ua latou teena ai Iesu o le Mesia. Ae ona e latou te iloa le Tulafono, o lo latou teena la o Iesu o se agasala matuiā tele.