E tele lesona aogā sa aʻoaʻo atu e Iesu a o fai taumafataga i le fale o se taʻitaʻi o le ʻau Faresaio. A o agaʻi atu Iesu i Ierusalema, ua mulimuli atu iā te ia le motu o tagata. O le ā le māfuaaga? Po o latou naunau moni lava e avea ma soo o Iesu, e tusa po o ā mea e aofia ai?

A o alu la latou faigāmalaga, ua faateʻia nisi o i latou i le fetalaiga lenei a Iesu: “Afai e sau se tasi iā te aʻu ae e lē ʻinoʻino i lona tamā, lona tinā, o lana avā ma le fanau, i ona uso ma tuafāfine, e oo foʻi i lona lava ola, e lē mafai ona avea o ia ma oʻu soo.” (Luka 14:26) O le ā le uiga o lana fetalaiga?

E lē o faapea atu Iesu, e tatau iā i latou uma ua avea ma ona soo ona ʻinoʻino i o latou aiga. Ae o loo uiga atu e faapea, e tatau ona sili atu lo latou alofa iā te ia nai lo o o latou aiga. E lē pei o le tamāloa lea sa ia taʻua i lana talafaatusa i le taumafataga i le pō, lea e leʻi taliaina le valaaulia faapitoa ina ia iai i le taumafataga, ona ua faatoʻā uma ona ia faaipoipo. (Luka 14:20) Ua faapea mai le tala e uiga i le augātamā o tagata Iutaia o Iakopo, ʻsa ia inosia Lea’ ae alofa i lona uso o Rasela. O lona uiga sa sili atu lona alofa iā Rasela nai lo o Lea.—Kenese 29:31; faaopoopoga.

Ia mātau o lea e faapea mai Iesu, e tatau i se tasi e avea ma soo ona ʻinoʻino ʻe oo i lona lava ola.’ O lona uiga, e tatau i se tasi e avea ma soo moni ona sili atu lona alofa iā Iesu nai lo o lona lava ola, e oo lava ina lotomalie e faataulaga lona ola pe a manaʻomia. Ua manino mai la, o le avea ma soo o Keriso o se tiute tauave e sili ona tāua, ma e lē tatau ona manatu faatauvaa i ai.

E ono aofia ai i le avea ma soo faigatā ma sauāga, auā e pei ona fetalai Iesu: “E lē mafai ona avea se tasi ma oʻu soo, pe a lē amoina e ia le laau e faapuapuagatia ai o ia ma mulimuli mai iā te aʻu.” (Luka 14:27) O le mea moni, e tatau i se soo moni o Keriso ona lotomalie e fesagaʻia tulaga e faalumaina ai e pei ona oo iā Iesu. Na fetalai foʻi Iesu, e fasiotia lava o ia e ona fili.

O lea, e tatau i le motu o tagata o loo malaga faatasi ma Iesu i Ierusalema ona iloilo totoʻa le uiga o le avea ma soo o Keriso. Ua faamatilatila e Iesu lenei manatu e ala i se talafaatusa: “O ai foʻi se tasi o outou e manaʻo e fau se ʻolo, e lē muamua ea ona nofo i lalo ma faitau tupe o le a faaalu, ina ia iloa ai po ua lava mea e faauma ai? A lē faia faapea, e ono faataatia e ia le faavae ae lē mafai ona faauma.” (Luka 14:28, 29) O lea, a o leʻi avea i latou o loo faimalaga faatasi ma Iesu o ni ona soo, ua tatau ona latou filifili ma le maumauaʻi e faataunuuina atoatoa lenei tiute tauave. Ua ia faamamafa mai lenei manatu i se isi talafaatusa e faapea:

ʻPo o ai se tupu ua alu atu e faafetaiaʻi le isi tupu i se taua, e lē muamua ea ona ia nofo i lalo ma talanoa ma isi pe e mafai e lana ʻautau e toʻasefulu afe, ona tau ma le tupu o loo faasagatau mai iā te ia ma lana ʻau e toʻalua sefulu afe? Ae afai e lē mafai ona ia faia faapea, ona ia aauina atu lea o ni sāvali a o mamao lava, ma talosaga atu mo le filemu.’ Ina ia faamatilatila atu le manatu autū o lenei talafaatusa, ua faapea atu Iesu: “Ia outou mautinoa, e lē mafai ona avea se tasi o outou ma oʻu soo pe afai e lē tuua ana mea uma.”—Luka 14:31-33.

E lē na o le motu o tagata o loo mulimuli atu iā Iesu o loo faasino atu i ai ana fetalaiga. E tatau iā i latou uma ua aʻoaʻoina e faatatau i le Keriso, ona lotomalilie e gaoioi e tusa ma ana fetalaiga. O lona uiga pe afai e fia avea i latou ma ona soo, e tatau ona latou nofosauni e faataulaga mea uma ua iā i latou e pei o a latou meatotino, e oo lava i o latou ola. E tatau ona manatunatu loloto ma tatalo e faatatau i lenā vala.

Ua toe lāgā e Iesu se mataupu sa ia taʻua i lana Lauga i luga o le Mauga, e uiga i le avea o ona soo “o le masima o le lalolagi.” (Mataio 5:13) Atonu o lea e uiga atu lana fetalaiga e faapea, e pei ona faasaoina ma puipuia e le masima se meaʻai mai i le faaleagaina, e faapena foʻi ona faasaoina ma puipuia e ona soo tagata mai i le faaleagaina i le itu faaleagaga ma le itu tau i amioga. O lea ua lata ina faaiʻu lana faiva, ma ua fetalai atu o ia: “O le mea moni, e lelei le masima. Ae afai e magalo le masima, e faapefea ona toe faamāi?” (Luka 14:34) E iloa lelei e lana ʻaufaalogologo o le tele o masima o loo maua i lenā taimi e lē lelei, ona e tuufaatasi ma le palapala, ma pe a magalo le masima, e lē toe iai sona aogā.

Ua faaalia mai i inei e Iesu, e oo lava iā i latou ua leva ona avea ma ona soo, e lē tatau ona faaitiitia lo latou maelega. Pe a faapea o le tulaga lenā, o lona uiga e leai so latou aogā e pei lava o le masima ae magalo, ma e ono taufaifai atu le lalolagi iā i latou. E sili atu i lenā, o le a leai foʻi so latou aogā i le silafaga a le Atua ma iʻu ai i lo latou taʻuleagaina o lona suafa. Ua faamamafa atu e Iesu le tāua o le ʻalofia o le faia o lenā tulaga, i lona faapea atu: “O lē ua iai taliga e faalogo ai, inā faalogo mai ia o ia.”—Luka 14:35.