O Ieova le Atua o Lē na faia i tatou. Na ia faia mea uma, o mea e mafai ona tatou vaai atu i ai, ma mea e lē mafai ona tatou vaai atu i ai. A o leʻi faia e Ieova mea e mafai ona tatou vaaia, na ia faia le tele o agelu. E te iloa o ā nei mea e taʻua o agelu? O agelu, e iai ni o latou tino agaga lea na faia e Ieova, e pei o ia. E lē mafai ona tatou vaai atu iā i latou, e pei foʻi ona lē mafai ona tatou vaai atu i le Atua. O le agelu muamua na faia e Ieova, na avea ma ona fesoasoani. Na fesoasoani lenā agelu iā Ieova ina ua ia faia fetu, o paneta ma isi mea uma lava. O se tasi o na paneta o le lalolagi, o se nofoaga matagofie lea o loo tatou nonofo ai.

Ona saunia lea e Ieova o le lalolagi ina ia ola ai manu ma tagata. Na ia faasusulu mai le malamalama o le lā i le lalolagi. Na ia faia mauga, le sami ma vaitafe.

O ā isi mea e sosoo ai na faia e Ieova? Na faapea ane o ia: ʻO le a ou faia le vao ma laau.’ Na amata ona ola aʻe le tele o ituaiga o fualaau ʻaina ma fugālaau eseese. Ona faia lea e Ieova o manu uma, o manufelelei, o manu e fetolofi, ma meaola i le sami. Na ia faia manu lāiti e pei o lapiti, ma manu lapopoʻa e pei o elefane. O le ā le manu e sili ona e fiafia i ai?

Ona faapea atu lea o Ieova i le agelu na ia faia muamua: “Seʻi o ta faia le tagata.” O le a ese tagata mai i manu. E mafai e tagata ona fausia mea fou. E mafai ona latou tautatala, taliē, ma tatalo. E latou  te tausia manu ma le lalolagi. E te iloa o ai le tagata na muamua faia e le Atua? Seʻi o tatou vaai.