Pe tusa o le tausaga ma le ʻafa talu ona talaʻi Iesu, ae manaʻomia loa ona ia faia se filifiliga tāua. O ai o le a filifilia e Iesu e latou te galulue vavalalata? O ai o le a ia toleniina e taʻimua i le faapotopotoga Kerisiano? Ina ia faia nei filifiliga, sa manaʻomia e Iesu le taʻitaʻiga a Ieova. O lea na ia alu ai na o ia i se mauga, ma tatalo i le pō atoa. I le taeao o le aso na sosoo ai, na ia valaauina ai nisi o ona soo e faapotopoto faatasi ma filifili ai ona aposetolo e toʻa 12. O ai ni igoa e te manatuaina? O o latou igoa o Peteru, Aneterea, Iakopo, Ioane, Filipo, Patolomaio, Toma, Mataio, Iakopo le atalii o Alefaio, Tataio, Simona, ma Iuta le Sekara.

O le a faimalaga lenei toʻasefulu lua faatasi ma Iesu. Ina ua māeʻa ona toleniina i latou e Iesu, ona ia auina atu lea o i latou e talaʻi na o i latou. Na foaʻi atu e Ieova iā i latou le mana e tutuliese ai temoni, ma faamālōlō tagata mamaʻi.

Na taʻua e Iesu le toʻasefulu lua o ana uō, ma na ia maufaatuatuaina i latou. Na manatu le ʻau Faresaio i le  ʻauaposetolo, o ni ē e leʻi lava ni aʻoaʻoga ma e faatauvaa. Ae na toleniina i latou e Iesu mo la latou galuega. O le a latou faatasi ma Iesu i taimi e sili ona tāua o lona olaga, e pei o le taimi ae e leʻi oo i lona maliu ma pe a mavae lona toetū. E pei o Iesu, e toetoe o i latou uma mai i lenā toʻasefulu lua e mai i Kalilaia. O nisi o i latou ua faaipoipo.

O le ʻauaposetolo o ni tagata e lē lelei atoatoa ma na latou faia mea sesē. O nisi taimi na latou faia ai ni faamatalaga e aunoa ma le mafaufau muamua, ma faia filifiliga lē lelei. E iai taimi na latou lē onosaʻi ai. Na latou finau foʻi po o ai e sili. Peitaʻi, o i latou o ni tagata lelei o ē alolofa iā Ieova. O le a avea i latou ma faavae o le faapotopotoga Kerisiano pe a mavae atu Iesu.