Ina ua mavae le maliu o Iesu, ona talosaga atu ai lea o se tamāloa mauʻoa e igoa iā Iosefa iā Pilato, pe mafai ona ia aveeseina le tino o Iesu mai i le laau. Na tāʻai e Iosefa le tino i le ʻie lino lelei faatasi ai ma mea manogi, ona ave lea ma tuu i se tuugamau fou. Ona ia tuu lea o se maa telē i le gutu o le tuugamau. Na faapea atu le ʻaufaitaulaga sili iā Pilato: ʻE matou te popole ina neʻi ave e nisi o soo o Iesu lona tino ma faapea atu i tagata, ua toe faatūina o ia mai i le oti.’ Na faapea atu Pilato iā i latou: ʻIa faamau le tuugamau ma ia leoleoina lelei.’

I le tolu aso mulimuli ane i le taeaopō, na ō atu ai ni fafine i le tuugamau ma vaaia ai ua fuliese le maa. I totonu o le tuugamau sa iai se agelu, ma na ia faapea atu i na fafine: ʻAua lua te fefefe. Ua toe faatūina Iesu. Ia ō ma taʻu atu i ona soo ina ia feiloaʻi ma ia i Kalilaia.’

Ua faanatinati atu Maria le Makatala e suʻe Peteru ma Ioane. Na ia faapea atu iā i laʻua: ʻUa aveese le tino o Iesu!’ Ona tamomoʻe atu lea o Peteru ma Ioane i le mea o loo iai le tuugamau. Ina ua latou vaaia ua leai se tino o Iesu i le tuugamau, ona latou toe foʻi ai lea i o latou aiga.

Ina ua toe alu Maria i le tuugamau, na ia vaaia ai ni agelu e toʻalua i totonu ma faapea atu iā i laʻua: ʻOu te lē iloa le mea ua latou ave i ai le tino o loʻu Alii.’ Ona ia vaaia lea o se tamāloa ma manatu o le tagata faitogālaau lea. Na ia fai atu i le tamāloa: ʻLau susuga e, ia taʻu mai faamolemole le mea ua e tuuina i ai o ia.’ Ae ina ua faapea atu le tamāloa: “Maria e!,” ona iloa ai lea e Maria o Iesu lea. Na faapea atu Maria: “Le Aʻoaʻo e!” ma pipii atu iā te ia. Na faapea atu Iesu iā te ia: ʻIa e alu ma taʻu atu i oʻu uso ua e vaai iā te aʻu.’ O le taimi lava lenā na tamoʻe ai Maria i le ʻausoo, ma fai atu na ia vaai iā Iesu.

Mulimuli ane i le aso lava lenā, na savavali ai ni soo se toʻalua mai i Ierusalema e agaʻi atu i Emau. Na faatasi atu iā i laʻua se isi tamāloa a o la savavali i le auala, ma fesili atu po o le ā le mea o loo la talanoa ai. Na la tali mai: ʻPe e te leʻi faalogo i le tala? I le tolu aso ua mavae, na fasiotia ai e le ʻaufaitaulaga sili Iesu. Ae o lea ua faapea mai nisi fafine ua toe faatūina o ia.’ Na fesili atu le tamāloa: ʻE lua te lē talitonu i perofeta? Na latou valoia o le a maliu le Keriso ona toe faatūina lea o  ia.’ Na faaauau ona ia faamatala atu iā i laʻua Tusitusiga Paia. Ina ua latou taunuu i Emau, na fai atu soo e toʻalua i le tamāloa e latou te nonofo. Ina ua māeʻa le tatalo na faia e le tamāloa mo le taumafataga, na faatoʻā iloa ai e soo nei o Iesu lea. Mulimuli ane ona lē toe vaaia lea o ia.

Na faanatinati atu nei soo i le fale i Ierusalema lea sa faapotopoto ai le ʻauaposetolo, ma faamatala atu iā i latou le mea na tupu. A o latou iai i totonu o le fale, na faaali atu Iesu iā i latou uma. I le taimi muamua, e leʻi talitonu le ʻauaposetolo o Iesu lea. Peitaʻi na ia faapea atu: ʻIa vaavaai mai i oʻu lima, ia paʻi mai. Ua tusia o le a toe faatūina le Keriso mai i le oti.’