Na usitaʻia e le ʻauaposetolo le faatonuga a Iesu ina ia folafola atu le tala lelei i le lalolagi atoa. I le 47 T.A., na aauina atu ai e uso i Anetioka ia Paulo ma Panapa i se talaʻiga faataamilo. Na faimalaga nei tagata talaʻi maelega e toʻalua i vaipanoa uma o Asia Itiiti e pei o Teipe, Lusa, ma Ikonio.

Na talaʻi atu Paulo ma Panapa i tagata uma e tusa pe matitiva pe mauʻoa, matutua pe lāiti. Na talia e le toʻatele le aʻoaʻoga moni e faatatau i le Keriso. Ina ua talaʻi atu Paulo ma Panapa iā Sekio Paulo le kovana o Kuperu, na taumafai se tamāloa faataulāitu e taofi i laʻua. Na faapea atu Paulo i le faataulāitu: ʻE matuā tetee Ieova iā te oe.’ Na faafuaseʻi lava ona tauaso le faataulāitu. Ina ua vaai atu le kovana o Sekio i le mea ua tupu, ona talitonu ai lea o ia.

Na talaʻi Paulo ma Panapa i so o se vaipanoa, mai i lea fale i lea fale, i maketi, i luga o auala, ma i sunako. Ina ua la faamālōlōina se tamāloa pipili mai i Lusa, na manatu ē na vāai i le vavega o i laʻua o ni atua ma taumafai e tapuaʻi atu iā i laʻua. Ae na taofi i latou e Paulo ma Panapa ma faapea atu: ʻIa tapuaʻi atu tau lava o le Atua! O i maʻua foʻi o ni tagata.’ Ona taunuu ane lea o ni tagata Iutaia ma faaoso le motu o tagata e tetee iā Paulo. O lea na latou fetogi ai Paulo i maa, toso o ia i tua o le aai, ma le manatu ua oti o ia. Peitaʻi e leʻi oti Paulo. O le taimi lava lenā na ō atu ai le ʻauuso e fesoasoani iā Paulo ma toe aumai o ia i totonu o le aai. Mulimuli ane, na toe foʻi Paulo i Anetioka.

I le 49 T.A., na toe alu ai foʻi se isi talaʻiga faataamilo a Paulo. Ina ua foʻi mai Paulo mai i lana asiasiga i uso i Asia Itiiti, ona ia faalauiloa atu lea o le tala lelei i atunuu mamao seʻia oo lava i Europa. Na malaga atu o  ia i Atenai, Efeso, Filipi, Tesalonia, ma isi nofoaga. Na faatasi atu i le faigāmalaga a Paulo ia Sila, Luka, ma le alii talavou o Timoteo. Na latou galulue faatasi ina ia faavae faapotopotoga, ma fesoasoani ina ia faamalosia na faapotopotoga. Na nofo Paulo i Korinito mo le tausaga ma le ʻafa, ma faamalosi i le ʻauuso i inā. Na ia talaʻi, aʻoaʻo atu, ma tusia ni tusi mo le tele o faapotopotoga. Na galue Paulo o sē e faia faleʻie. Mulimuli ane, na toe foʻi Paulo i Anetioka.

Mulimuli ane i le 52 T.A., na alu ai le talaʻiga faataamilo lona tolu a Paulo, ma na amata atu i Asia Itiiti. Na oo atu lana malaga i le itu i mātū i Filipi, ma faaauau atu ai i Korinito. Na faaalu e Paulo le tele o tausaga i Efeso e aʻoaʻo atu ai, faia faamālōlōga, ma fesoasoani i le faapotopotoga. Na ia lauga foʻi i aso uma i se faleaʻoga. E toʻatele tagata na faalogo ma suia o latou ala. Ina ua māeʻa ona talaʻi atu e Paulo le tala lelei i le tele o atunuu, ona malaga atu ai lea o ia i Ierusalema.