Sa iloa atu e le tupu o Aapo mai i le faamalama o lona maota i Isereelu, le togāvine a se tamāloa e igoa iā Napota. Na manaʻo Aapo i le togāvine, ma na ia taumafai e faatau mai iā Napota. Ae na musu Napota e faatau atu iā te ia, talu ai e faasā i le Tulafono a Ieova le faatau atu o laueleele e tuufaasolo mai e aiga. Pe na faaaloalo Aapo iā Napota ona o lona faia o le mea saʻo? E leai. Na matuā ita Aapo. O lona ita tele na lē alu ese ai mai i lona potu moe, ma na musu foʻi e ʻai.

Na fai atu le masiofo o Iesepela le avā leaga a Aapo iā te ia: ʻO oe o le tupu o Isaraelu. E mafai ona e mauaina so o se mea lava e te manaʻo ai. O le a ou avatu iā te oe lenā togāvine.’ Na tusi lea e Iesepela o ni tusi i toeaina o le aai, ma faatonu i latou ina ia molia Napota i le taufaifai i le Atua, ma ia fetogi iā te ia i maa ina ia oti ai. Na faia e toeaina le faatonuga a Iesepela. Ona fai atu lea o Iesepela iā Aapo: ʻUa oti Napota. Ia ave ma oe le togāvine.’

E lē na o Napota le tagata lē sala na fasiotia e Iesepela. Na ia fasiotia foʻi le toʻatele o isi tagata na alolofa iā Ieova. Na ia tapuaʻi i tupua ma faia isi mea leaga. Na silafia e Ieova mea leaga uma na faia e Iesepela. O le ā o le a faia e Ieova iā Iesepela?

Ina ua mavae le maliu o Aapo, ona avea ai lea o lona atalii o Ioramo ma tupu. Na auina atu e Ieova se tamāloa e igoa iā Ieu e faasalaina Iesepela ma lona aiga.

Na alu atu Ieu i lana kariota i Isereelu, le nuu lea sa nofo ai Iesepela. Na alu ane foʻi Ioramo i le kariota e faafetaui Ieu ma fesili atu: ʻPo o filemu mea uma?’ Na tali mai Ieu: ʻE lē taitai maua se filemu auā o loo faia pea e lou tinā mea leaga.’ Na taumafai Ioramo e liliu lana kariota ma alu ese. Ae na tago atu Ieu i lana aufana ua fana ai Ioramo, ma oti ai o ia.

 Ona alu lea o Ieu i le maota o Iesepela. Ina ua faalogo Iesepela o loo alu atu Ieu, ona ia vali lea o ona mata, teu faamanaia lona ulu, ma vaavaai ifo mai le faamalama o lona fale. Ina ua taunuu atu Ieu, na faafeiloaʻi o ia e Iesepela i se auala lē faaaloalo. Na valaau atu Ieu i auauna a Iesepela o loo tutū i ona autafa: “Ia lafo ifo o ia!” Na latou faia faapea, ma na paʻū ifo Iesepela mai i le faamalama ma oti ai o ia.

Ina ua uma le mea na tupu, ona fasiotia lea e Ieu o atalii e toʻa 70 o Aapo ma faamamā le nuu mai i tapuaʻiga iā Paala. Po ua e talitonu la e silafia e Ieova mea uma, ma e na te faasalaina i le taimi talafeagai i latou o ē faia mea leaga?