Ina ua avea Solomona ma tupu o Isaraelu, na fesili mai Ieova iā te ia: ʻO le ā se mea e te manaʻo ou te avatua mo oe?’ Na tali atu Solomona: ʻUa na o aʻu o se tamaitiiti, ma ou te lē iloa le mea e tatau ona fai. Faamolemole foaʻi mai le atamai ina ia ou tausia ai lou nuu.’ Na faapea mai Ieova: ʻTalu ai ua e talosaga mai mo le atamai, o le a ou faia oe ma tagata e sili ona atamai i le lalolagi. O le a ou foaʻi atu foʻi iā te oe le tele o ʻoa. Afai e te usitaʻi mai iā te aʻu, o le a umi ona e ola.’

Na amata ona fausia e Solomona le malumalu. Na ia faaaogā auro, siliva, laau ma maa e sili ona lelei. E faitau afe tane ma fafine tomai na galulue i le fausiaina o le malumalu. Ina ua mavae tausaga e fitu, ona tuuina atu loa lea o le malumalu iā Ieova. Sa iai se fata faitaulaga, ma sa iai taulaga i luga o lenā fata. Na tootuli Solomona i luma o le fata faitaulaga ma tatalo: ʻIeova e, e lē lava le telē ma le matagofie o lenei malumalu mo oe, ae faamolemole ia talia mai la matou tapuaʻiga ma faafofoga mai i a matou tatalo.’ O le ā le silafaga a Ieova i le malumalu faapea le tatalo a Solomona? O le taimi lava na uma ai le tatalo a Solomona, ona alu ifo lea o le afi mai i le lagi ma faamūina ai taulaga sa i luga o le fata faitaulaga. O lenei mea na faaalia ai le fiafia o le finagalo o Ieova i le malumalu. Ina ua vaai tagata Isaraelu i le mea na tupu, ona latou fiafia ai lea.

Na lauiloa le tupu o Solomona i le nuu atoa o Isaraelu i lona atamai, e oo lava i isi nuu e mamao. Na ō mai tagata iā Solomona mo le fesoasoani i o latou faafitauli. E oo lava i le tupu tamaʻitaʻi o Seepa, na alu atu e tofotofo Solomona i fesili faigatā. Ae ina ua faalogo o ia i tali a Solomona, ona ia faapea atu lea: ʻOu te leʻi talitonu i tala a tagata na fai mai e uiga iā te oe, ae o lea ua ou iloa nei e sili atu lou atamai. Ua faamanuiaina oe e Ieova lou Atua.’ Na sologa lelei le olaga i le nuu o Isaraelu, ma na fiafia tagata. Peitaʻi, e leʻi tumau pea ona sologa lelei mea i le nuu.