Sa iai se teineitiiti Isaraelu i le nuu o Suria. E mamao lenei nuu mai i le mea sa iai lona aiga. Sa aveese o ia mai i lona aiga e le ʻautau a Suria, ma o lea ua avea nei o ia ma pologa a le avā a se taʻitaʻiʻau e igoa iā Naamanu. Na tapuaʻi lenei teineitiiti iā Ieova e ui lava e leʻi faia faapea e isi tagata.

Sa maua Naamanu i se maʻi leaga lea na aafia ai lona tino, ma sa ia lagona le tigā i taimi uma. Na matuā naunau lava le teineitiiti e fesoasoani iā te ia. Na ia fai atu i le avā a Naamanu: ʻOu te iloa se tasi e mafai ona fesoasoani i lau tane. O loo iai i Isaraelu se perofeta e igoa iā Elisaia. E mafai ona ia faamālōlōina lau tane.’

Na taʻu atu e le avā a Naamanu iā te ia le tala a le teineitiiti. Na lotomalie Naamanu e faia so o se mea. O lea na ia alu ai i Isaraelu i le fale o Elisaia. Na faatalitalia e Naamanu o le a faaaloalogia o ia e Elisaia. Ae nai lo o le alu atu o Elisaia e talanoa iā Naamanu, na ia auina atu lana auauna e faafeiloaʻi Naamanu ma taʻu atu le feʻau lenei:  ʻInā alu ia, ma e tāʻele faafitu i le vaitafe o Ioritana ina ia toe lelei ai lou tino.’

Na matuā ita Naamanu. Na ia faapea ane: ʻNa ou mafaufau o le a faamālōlō aʻu e lenei perofeta, e ala i le valaau atu i le Atua ma faamālōlōina aʻu i se auala ofoofogia. Peitaʻi, ua ia faatonuina aʻu e alu i lea vaitafe i Isaraelu. E sili atu ona mananaia vaitafe o Suria. Pe e lē mafai ona ou taʻele ai i inā?’ Na ita Naamanu, ma alu ese mai i le fale o Elisaia.

Na fesoasoani auauna a Naamanu iā te ia ina ia toe mafaufau lelei. Na latou fai atu iā te ia: ʻPe e te lē faia so o se mea e manaʻomia ona fai, ina ia faamālōlōina ai oe? E faigofie le faatonuga a le perofeta. Aiseā e te lē faia ai loa?’ Na faalogo Naamanu iā i latou. Na alu o ia i le vaitafe o Ioritana ma tofu ai faafitu. Ina ua uma lenā, ona alu aʻe lea o ia ua mamā lona tino. Na matuā lotofaafetai o ia, ma toe foʻi iā Elisaia e faafetai i ai. Na faapea atu Naamanu: ʻO lea ua ou iloa nei o Ieova o le Atua moni.’ O le ā sou manatu, o ā ni faalogona o le teineitiiti Isaraelu ina ua toe foʻi atu Naamanu ua faamālōlōina o ia?