MATAUPU 1
ʻIa Ō Atu e Fai Tagata ma Soo’
Aotelega o Galuega a le ʻAuaposetolo ma le fesootaʻiga mai i o tatou aso
1-6. Faamatala mai ni mea na tutupu, o auala eseese o loo talaʻi atu ai Molimau a Ieova.
NA MANATU Repeka o se talavou Molimau a Ieova i Ghana i lana aʻoga, o lana oganuu lea e talaʻi ai. Na ia ave i taimi uma i lana ato aʻoga lomiga faale-Tusi Paia. I taimi o mālōlōga, na vaavaai o ia mo ni avanoa e molimau atu ai i tamaiti o le aʻoga. Na amata e Repeka ni suʻesuʻega faale-Tusi Paia ma nisi o tamaiti o lana vasega.
2 I le motu o Matakasa, e lē mamao ma le talafatai i sasaʻe o Aferika, na masani ona savavali ai ni paeonia se toʻalua i le vevela o le lā mo le mamao e tusa ma le 15 maila [25 km], e ō atu i se nuu maotua. Na la faia ai i inā ni suʻesuʻega faale-Tusi Paia ma ni tagata fiafia.
3 Ina ia oo atu i tagata o loo nonofo i vaitafe o Paraguay ma Paraná, sa galulue Molimau i Paraguay faatasi ma ē na tauofo mai i isi atunuu e 15, ina ia fausia se vaa e fealuaʻi i le vaitafe. O lenei vaa e 45 tone, e oo atu i le 12 tagata e mafai ona malaga ai. Ua avea lenei vaa ma o latou aiga, ma ua mafai ai ona faasalalau atu e tagata talaʻi maelega o le Malo, le tala lelei i vaipanoa sa faigatā ona oo i ai.
4 I vaipanoa mamao i le itu i Mātū, na faaaogā ai e Molimau i Alaska se avanoa mauagatā e molimau atu ai pe a asiasi mai tagata tafafao, i le taimi o le tau māfanafana. O taimi na e malaga mai ai meli tetele e tumu i tagata asiasi mai i atunuu eseese. E nofosauni Molimau i lenā vaipanoa e faafeiloaʻi tagata i le uafu, ma faaali atu i ai lomiga faale-Tusi Paia i gagana eseese. I lenā lava vaipanoa, sa faaaogā se vaalele ina ia oo atu ai i nuu maotua, ma mafai ai ona talaʻi atu le tala lelei i tagata e nonofo i Aleut, Athabascan, Tsimshian, ma Tlingit.
5 O Lale, e nofo i fale e tausi ai tagata matutua i Texas i Amerika ma o lana oganuu faapitoa lenā. E ui lava ua alu i se nofoa faataavalevale ona e māfua mai i se faalavelave, ae e pisi pea o ia e talanoa atu i isi e uiga i le feʻau o le Malo, e aofia ai lona faamoemoe faale-Tusi Paia e faapea, pe a oo mai le Malo o le Atua, o le a mafai ona toe savali o ia.—Isa. 35:5, 6.
6 Ina ia auai i se fonotaga i le itu i mātū o Myanmar, na malaga ai i se vaa laʻupasese mo aso e tolu se vaega o Molimau mai i Mandalay. Ona o le naunau e talaʻi atu le tala lelei, na latou ō ai ma ave ni lomiga faale-Tusi Paia ma ofo atu i tagata o le pasese. O taimi uma e taunuu ai le vaa i se taulaga po o se nuu, na ō i fafo nei tagata talaʻi maelega, ma tufa vave atu lomiga i tagata e nonofo i na nofoaga. Mulimuli ane, na ō ane nisi pasese fou i le vaa, ma na avea ma “oganuu fou” pe a toe foʻi ane i le vaa le ʻautalaʻi.
7. O ā metotia e faaaogā e tagata tapuaʻi o Ieova e molimau atu ai e uiga i le Malo o le Atua, ma o le ā lo latou sini?
7 E pei ona faaalia mai i faaaʻoaʻoga a uso ma tuafāfine nei, o loo avatu e tagata tapuaʻi maelega o Ieova i le lalolagi, “se molimau māeʻaeʻa e faatatau i le Malo o le Atua.” (Galu. 28:23) E latou te ō atu mai i lea fale i lea fale, talanoa i tagata i ala tetele, ma e ala atu i telefoni. Pe malaga i se pasi, savalivali i se paka, tusi atu se tusi, pe e mālōlō i mea e faigaluega ai, e latou te mataalia i avanoa uma e avatu ai se molimau e uiga i le Malo o le Atua. Atonu e eseese metotia e latou te faaaogā, ae e tasi lava le sini—ia talaʻi atu le tala lelei i so o se mea e maua ai tagata.—Mata. 10:11.
8, 9. (a) Aiseā o se vavega ai le faalauteleina atu o le galuega talaʻi o le Malo? (e) O le ā le fesili faatupu manatu ua lāgā, ma o le ā e tatau ona tatou faia ina ia maua ai le tali?
8 Po o aofia ai oe lē o loo faitau i lenei tusi i le toʻatele o tagata talaʻi o le Malo, o ē o loo tiotio i aso nei i atunuu e sili atu i le 235? Pe afai o lea, o loo e faia la se sao i le faalauteleina atu ma le fiafia o le galuega talaʻi o le Malo! E mautinoa, o mea ua faataunuuina i le faiva i le fanua i le lalolagi aoao, o se vavega. E ui lava i tulaga faigatā ma luʻi, faapea faasāsāaga a malo ma sauāga ogaoga, ae o loo avatu pea e Molimau a Ieova se molimau māeʻaeʻa e faatatau i le Malo o le Atua, i tagata o atunuu uma.
9 O le fesili faatupu manatu e tatau ona manatunatu i ai, Aiseā ua lē mafai ai e toʻatugā, e oo lava i teteega mai iā Satani, ona taofia ai le agaʻigaʻi i luma o le galuega talaʻi o le Malo? Ina ia tali lenā fesili, e tatau ona tatou manatu i tuā i le uluaʻi senituri T.A. Auā o i tatou o Molimau a Ieova, o loo faaauauina i aso nei le galuega na amata mai i tuā i lenā taimi.
Se Tofiga e Umi se Taimi e Faataunuu Ai
10. O le ā le galuega na tuutoina i ai le soifuaga o Iesu, ma o le ā na ia silafia e uiga i lenei galuega?
10 Sa tuutoina atu Lē na faavaeina le faapotopotoga Kerisiano, o Iesu Keriso, i le talaʻia o le tala lelei o le Malo o le Atua; sa avea ma galuega autū i lona soifuaga. Na fetalai o ia i se tasi taimi: “E tatau ona ou folafola atu le tala lelei o le Malo o le Atua . . . auā o le mea lea na auina mai ai aʻu.” (Luka 4:43) Sa silafia e Iesu ua ia amataina se galuega e lē mafai ona ia faamāeʻaina na o ia lava. A o lata i lona maliu, na ia valoia e faapea, o le a talaʻia atu le feʻau o le Malo “i atunuu uma lava.” (Mare. 13:10) E faapefea ona faia, ma o ai e faataunuuina lenei galuega?
“Ia outou ō atu e fai tagata o nuu uma lava ma soo.”—Mataio 28:19
11. O le ā le tofiga tāua na tuu atu e Iesu i ona soo, ma o le ā le lagolagosua o le a latou maua ina ia faatino ai lenei tofiga?
11 Ina ua mavae lona maliu ma lona toetū, sa faaali atu Iesu i ona aposetolo ma tuu atu iā i latou le tofiga tāua lenei: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ma ia aʻoaʻoina i latou ia tausi i mea uma ua ou poloaʻi atu ai iā te outou. Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:19, 20) O le faaupuga “ou te faatasi ma outou,” ua faaalia ai o le a lagolagosua o ia i ona soo i le galuega talaʻi ma le faia o isi ma soo. O le a latou manaʻomia lenā lagolagosua, auā na valoia e Iesu, o le a “inosia foʻi [i latou] e nuu uma.” (Mata. 24:9) E iai foʻi se isi mea o le a fesoasoani i soo. A o toeitiiti afio aʻe i le lagi, na taʻu atu e Iesu o le a faamalosia i latou e le agaga paia, ina ia avea ma ana molimau i “tuluʻiga uma o le lalolagi.”—Galu. 1:8.
12. O ā fesili tāua ua lāgā, ma aiseā e tāua tele ai ona tatou iloa tali?
12 Ua lāgā ai nei nisi o fesili tāua: Pe sa manatu mamafa aposetolo ma soo o Iesu i le uluaʻi senituri i lo latou tofiga? Pe sa avatu e lenei vaega toʻaitiiti o tane ma fafine Kerisiano, se molimau māeʻaeʻa e uiga i le Malo o le Atua, e ui i sauāga ogaoga? Pe na latou maua le lagolagosua faalelagi, ma le fesoasoani a le agaga paia o Ieova i la latou galuega o le faia o isi ma soo? O le a taliina nei fesili ma isi fesili i le Tusi Paia, i le tusi o Galuega. E tāua tele ona tatou iloa tali o nei fesili. Aiseā? Auā na folafola mai e Iesu o le galuega lea na ia faatonuina, o le a faaauau “seʻia oo i le taufaaiʻuiʻuga o le faiga o mea a le lalolagi.” O lenei la galuega, e mo Kerisiano moni uma, e aofia ai ma i tatou o loo ola i lenei taimi o le iʻuga. O lea, e tatou te matuā naunau ai i faamaumauga o le talafaasolopito o loo i le tusi o Galuega.
Aotelega o le Tusi o Galuega
13, 14. (a) O ai na tusia le tusi o Galuega, ma o fea na maua mai ai e le tusitala ana faamatalaga? (e) O ā mea o aofia i le tusi o Galuega?
13 O ai na tusia le tusi o Galuega? E lē o taʻua mai i le tusi le suafa o le tusitala, ae o loo manino mai i upu amata e faapea, o lē na tusia le tusi o Galuega, o ia foʻi lea na tusia le Evagelia a Luka. (Luka 1:1-4; Galu. 1:1, 2) O lea, e mai lava i aso ua mavae, sa manatu ai i le “fomaʻi pele” o Luka, ma o le tusitala o tala faasolopito, o ia na tusia le tusi o Galuega. (Kolo. 4:14) O loo aofia ai i le tusi se vaitaimi e tusa ma le 28 tausaga, mai le taimi na afio aʻe ai Iesu i le lagi i le 33 T.A., e oo i le faaiʻuga o le faafalepuipuiina o Paulo i Roma i le 61 T.A. O le mea moni, o le suia e Luka o le upu “latou” i le upu “matou” i lana faamatalaga, e iloa ai sa iai o ia i le tele o mea na tutupu sa ia faamatalaina. (Galu. 16:8-10; 20:5; 27:1) O Luka o se tagata suʻesuʻe māeʻaeʻa, e mautinoa na ia maua tuusaʻo mai nei faamatalaga iā Paulo, Panapa, Filipo ma isi o loo taʻua i faamaumauga.
14 O ā mea o loo aofia i le tusi o Galuega? Muamua atu, i lana Evagelia, na tusia ai e Luka fetalaiga ma mea na faia e Iesu. Ae i le tusi o Galuega, na taʻua ai e Luka faamatalaga ma mea na faia e soo o Iesu. O lea, o le tusi o Galuega, o loo faatatau i tagata na faataunuuina se galuega tele, e ui sa manatu i ai le toʻatele, o i latou “o ni tagata e leʻi aʻoaʻoina ma e faatauvaa.” (Galu. 4:13) I se otootoga, o loo taʻu mai i nei faamaumauga faagaeeina, le auala na faavae ai le faapotopotoga Kerisiano ma lona tuputupu aʻe. O loo faaalia foʻi i le tusi o Galuega le auala na talaʻi ai Kerisiano i le uluaʻi senituri, o a latou metotia ma uiga faaalia. (Galu. 4:31; 5:42) O loo faamatalaina ai le auala na fesoasoani ai le agaga paia i le faasalalauina atu o le tala lelei. (Galu. 8:29, 39, 40; 13:1-3; 16:6; 18:24, 25) O loo faamatilatila i le tusi o Galuega le matua o le Tusi Paia, lea e aofia ai le faapaiaina o le suafa o le Atua, e ala i Lona Malo i le pulega a Keriso. O loo faamatala mai ai foʻi le faasalalauina atu o le feʻau o le Malo e ui i le matuiā ma le ogaoga o teteega.—Galu. 8:12; 19:8; 28:30, 31.
15. O ā aogā e tatou te maua i le suʻesuʻeina o le tusi o Galuega?
15 O le mea moni, o se mea e fiafia ma faamalosia ai lo tatou faatuatua, le iloiloina o le tusi o Galuega! O le a pāʻia o tatou loto pe a manatunatu i faaaʻoaʻoga o le lototetele ma le maelega o uluaʻi soo o Keriso. O le a uunaʻia ai i tatou e faataʻitaʻi i le faatuatua o o tatou uso i le uluaʻi senituri. O le a faaauupegaina ai foʻi i tatou i le faataunuuina o lo tatou tofiga e ʻō atu e fai tagata ma soo.’ O le tusi o loo e faitau nei iai, ua fuafuaina e fesoasoani iā te oe i le suʻesuʻeina māeʻaeʻa o le tusi o Galuega.
Se Tusi Aogā mo Suʻesuʻega Faale-Tusi Paia
16. O ā vala tāua e tolu o lenei lomiga?
16 O le ā le fuafuaga atoa o lenei lomiga? O vala tāua e tolu o lenei tusi (1) ina ia faamalosia ai lo tatou talitonuga e faapea, o loo lagolagoina e Ieova le galuega talaʻi o le Malo ma le faia o isi ma soo, e ala i lona agaga paia, (2) e faateleina ai lo tatou maelega i le faiva, e ala i le iloilo o faaaʻoaʻoga a soo o Keriso i le uluaʻi senituri, ma (3) faaalia ai lo tatou faaaloalo loloto i le faalapotopotoga a Ieova, ma i latou o loo taʻimua i le galuega talaʻi ma le vaavaaia o faapotopotoga.
17, 18. Ua faapefea ona faamaopoopo lenei tusi, ma o ā vala e mautinoa e fesoasoani i au lava suʻesuʻega o le Tusi Paia?
17 Ua faapefea ona faamaopoopoina lenei lomiga? O le a e mātauina, o loo vaevaeina lenei tusi i vaega e valu, o loo talanoaina i nei vaega taʻitasi ni vala o le tusi o Galuega. O le autū o mataupu o loo mulimuli mai, e lē ina ia talanoaina ai fuaiupu taʻitasi uma o le tusi o Galuega, ae ina ia maua ai ni lesona aogā mai i mea na tutupu o loo tusia i lenā tusi o le Tusi Paia, ma fesoasoani iā i tatou e faatatau mea na aʻoaʻoina mai ai. I le amataga o mataupu taʻitasi, o loo iai se faaupuga e taaofaʻi ai manatu o loo i lenā mataupu atoa, ma mau e iloa ai le vaega o le tusi o Galuega o le a talanoaina.
18 E iai isi vala o lenei lomiga e mautinoa o le a fesoasoani i au lava suʻesuʻega o le Tusi Paia. O ata mananaia o loo faaalia ai mea mataʻina na tutupu o loo i le tusi o Galuega, o le a fesoasoani e faaata ai i lou mafaufau na mea a o e manatunatu i faamatalaga a le Tusi Paia. O le tele o mataupu, e iai pusa o loo aumaia ai ni faamatalaga faaopoopo. O nisi o nei pusa, o loo faamatala ai talaaga o tagata o le Tusi Paia e tatau ona tatou faataʻitaʻi i lo latou faatuatua. O nisi pusa o loo faamatala mai ai nofoaga, mea na tutupu, aganuu, po o isi tagata o loo taʻua i le tusi o Galuega.
Ia galueaʻiina lau oganuu ma se uiga faanatinati
19. O le ā le iloiloga a le tagata lava ia e tatau ona faia mai i lea taimi i lea taimi?
19 O lenei tusi e fesoasoani e iloilo ai ma le faamaoni oe lava. Po o le ā lava le umi talu ona e auauna o se tagata talaʻi o le Malo, ae e lelei ona iloilo mai i lea taimi i lea taimi, mea o loo e faamuamua i le olaga, ma lau vaaiga i le faiva faa-Kerisiano. (2 Kori. 13:5) Fesili ifo iā te oe lava: ʻPo o iai pea iā te aʻu se uiga faanatinati i laʻu faiva? (1 Kori. 7:29-31) Po o oʻu maumauaʻi ma le maelega e talaʻi atu le tala lelei? (1 Tesa. 1:5, 6) Po o faia soʻu sao atoatoa i le tele ou te mafai ai i le galuega talaʻi ma le faia o isi ma soo?’—Kolo. 3:23.
20, 21. Aiseā ua matuā faanatinati ai lo tatou tofiga, ma o le ā e tatau ona tatou maumauaʻi e fai?
20 Ia tatou manatua i taimi uma, ua poloaʻia i tatou e faia se galuega tāua—o le talaʻi ma le faia o isi ma soo. O le mavae atu o aso taʻitasi, o le atili ai foʻi lea ona faanatinati o lenā galuega. Ua matuā lata tele mai le iʻuga o lenei faiga o mea. Ua matuā lamatia soifua o tagata i le taimi nei. E tatou te lē iloa pe e toʻafia ē ua saunia o latou loto mo le ola e faavavau atonu e leʻi tali mai i la tatou feʻau. (Galu. 13:48) Peitaʻi, o lo tatou tiute tauave, o le fesoasoani iā i latou a o lava pea le taimi.—1 Timo. 4:16.
21 O lea la, e tāua tele ona tatou faataʻitaʻi i le faaaʻoaʻoga a tagata talaʻi maelega o le Malo i le uluaʻi senituri. Tau ina ia avea lou suʻesuʻe totoʻa i lenei lomiga, ma mea e uunaʻia ai oe e talaʻi atu ma le matuā maelega ma le lototele. Tau ina ia faamalosia ai lou naunau e faaauau ona ʻavatu se molimau māeʻaeʻa e faatatau i le Malo o le Atua.’—Galu. 28:23.
