1-3. (a) Faamatala le māfuaaga o le oti o Eutiko. (e) O le ā na faia e Paulo, ma o le ā ua taʻu mai ai iā i tatou e uiga iā Paulo i lenei mea na tupu?

 O LOO iai Paulo i Teroa, i se potu pito i luga o loo tumu i tagata. Na umi se taimi na lauga atu ai o ia i uso, talu ai o le toe pō lenei e faatasi ai ma i latou. Ua oo i le tulua o pō ma ao. E tele ni molī na mumū ai i le potu, ma atili ai ona vevela ma atonu na māfua ai le tele o le asu. Sa nofo se talavou e igoa iā Eutiko i luga o le faamalama. Ma a o lauga atu Paulo, na moe Eutiko ma paʻū ifo ai o ia mai i le fogāfale tolu!

² Ona o Luka o se fomaʻi, na ia faavave atu ai i fafo ma siaki le talavou. E leʻi fesiligia le tulaga na oo i ai. Na “sii aʻe . . .  o ia ua oti.” (Galu. 20:9) Peitaʻi na tupu se vavega. Ua faapaʻū faō Paulo i luga o lenei tama talavou, ma faapea atu i le motu o tagata: “Soia le pisapisaō, auā o loo ola o ia.” Ua toe faaola e Paulo Eutiko mai le oti!—Galu. 20:10.

³ O lenei mea na tupu ua faaalia ai le malosi o le agaga paia o le Atua. E lē o Paulo na māfua ai le oti o Eutiko. Ae peitaʻi, e leʻi manaʻo o ia e avea le oti o lenei tauleʻaleʻa, e faaleagaina ai lenei faatasiga tāua pe tautevateva faaleagaga ai se tasi. O le toe faaolaina o Eutiko, na faamāfanafanaina ai e Paulo le faapotopotoga, ma faamalosia ai ia faaauau pea la latou faiva. E manino mai, na manatu mamafa Paulo i ola o isi. Ua faamanatu mai iā i tatou lenā mea i ana upu: “Ua mamā aʻu mai i le toto o tagata uma.” (Galu. 20:26) Seʻi o tatou iloiloina nei pe faapefea ona aogā iā i tatou le faaaʻoaʻoga a Paulo e uiga i lenei tulaga.

4. O ā mea mataʻutia na feagai ma Paulo?

⁴ E pei ona talanoaina i le mataupu ua teʻa, e tele mea mataʻutia na feagai ma Paulo. O lana faiva i Efeso, na māfua ai ona tupu se vevesi tele. Na auai i lenā vevesi tagata fai mea siliva, o ē na faalagolago e maua tupe i le gaosia o faatusa mo le tapuaʻiga iā Atemisa! Ua  faamatala mai i le Galuega 20:1 e faapea: “Ua uma le vāvāō, ona aami lea e Paulo o le ʻausoo; ma ina ua uma ona ia faalaeiau ma faamavae atu iā i latou, ona malaga atu loa lea o ia i Maketonia.”

5, 6. (a) O le ā le umi atonu na iai Paulo i Maketonia, ma o le ā na ia faia mo uso i inā? (e) O le ā le uiga na iai pea iā Paulo e faatatau i ona uso talitonu?

⁵ A o agaʻi atu Paulo i Maketonia, sa nofo o ia i le aai tūmatafaga o Teroa mo se taimi. Sa manatu Paulo o le a faatasi ai i inā ma Tito, lea na ia auina atu i Korinito. (2 Kori. 2:12, 13) Ae ina ua ia mautinoa e lē o sau Tito, ona alu atu lea o ia i Maketonia ma atonu na nofo ai pe ā ma se tausaga, “ma faalaeiau i le ʻausoo i le tele o upu.” a (Galu. 20:2) Na mulimuli ane faatasi atu Tito iā Paulo i Maketonia, ma ia avatu se tala lelei e uiga i le talia e uso i Korinito o le uluaʻi tusi a Paulo. (2 Kori. 7:5-7) O lenei mea na uunaʻia ai Paulo e tusi atu se isi tusi iā i latou, lea ua taʻua o le 2 Korinito.

⁶ E aogā le mātauina o upu na faaaogā e Luka, o le “faalaeiau” ma le “faalaeiauina,” e faamatala ai le asiasiga a Paulo i uso i Efeso ma Maketonia. Maʻeu le talafeagai o na upu e faamatala ai uiga o Paulo i ona uso talitonu! I le eseesega ma le ʻau Faresaio lea e manatu faatauvaa i tagata lautele, na vaai Paulo i mamoe o ni ē e latou te galulue faatasi. (Ioa. 7:47-49; 1 Kori. 3:9)  Sa iai pea iā Paulo lenā uiga, e ui lava na ia avatu ni fautuaga malolosi iā i latou.—2 Kori. 2:4.

7. E faapefea ona faataʻitaʻi ovasia Kerisiano i aso nei i le faaaʻoaʻoga a Paulo?

⁷ I aso nei, e taumafai malosi toeaina o faapotopotoga ma ovasia matagaluega, e faataʻitaʻi i le faaaʻoaʻoga a Paulo. E tusa lava pe avatu ni aʻoaʻiga, ae o lo latou sini o le faamalosia o ē e manaʻomia le fesoasoani. E avatu ma le alofa e ovasia faalaeiauga nai lo o le taʻusalaina. Na taʻua e se tasi o ovasia matagaluega ua lava le poto masani e faapea: “O le toʻatele o o tatou uso ma tuafāfine e mananaʻo e fai le mea saʻo, ae e masani ona latou tauivi ma le lotovaivai, fefe, ma le lagona ua leai so latou malosi e fesoasoani ai iā i latou lava.” E mafai ona avea ovasia o ni puna o faalaeiauga mo uso talitonu o loo i tulaga faapena.—Epe. 12:12, 13.

8, 9. (a) O le ā na faalavelavea ai fuafuaga a Paulo e folau atu i Suria? (e) Aiseā na tumau ai pea le feita o tagata Iutaia iā Paulo?

⁸ Na alu atu Paulo i Korinito mai i Maketonia. b Ina ua mavae le tolu masina talu ona iai i inā, sa naunau o ia e faaauau lana malaga agaʻi atu i Kenikerea, ma le fuafuaga e folau atu ai i se vaa i Suria. Mai i inā, e mafai ai ona alu atu o ia i Ierusalema e avatu meaalofa i uso matitiva. c (Galu. 24:17; Roma 15:25, 26) Peitaʻi, na faafuaseʻi ona toe sui le fuafuaga a Paulo. Ua taʻua i le Galuega 20:3: “Sa faia e tagata Iutaia se taupulepulega faasaga iā te ia”!

⁹ E lē o se mea e faateʻia ai ona sa tumau pea le feita o tagata Iutaia iā Paulo, talu ai na latou manatu iā te ia o se tagata tetee. I le taimi muamua atu, na faaliliu ai e Paulo Kiripo—o se tagata lauiloa i le sunako i Korinito. (Galu. 18:7, 8; 1 Kori. 1:14) I se isi mea na tupu, na molia ai e tagata Iutaia i Korinito Paulo i luma o Kaliona, le sui konesula o Akaia. Peitaʻi, na faalēaogāina e Kaliona na moliaga e lē faavaea, o se faaiʻuga na matuaʻi feita ai fili o Paulo. (Galu. 18:12-17) Atonu na iloa e tagata Iutaia i Korinito, e lē o toe mamao ae tuuvaa atu Paulo mai i Kenikerea, o se taulaga e lata ane, o lea na latou faia ai se fuafuaga e osofaʻia o ia i inā. O le ā o le a faia e Paulo?

10. Po o le palaai o Paulo na ʻalofia ai Kenikerea? Faamatala.

¹⁰ Ona o le manatu mamafa i lona saogalemu, ma ia puipuia meaalofa na tuuina atu iā te ia, na manatu ai Paulo e lē alu atu i Kenikerea, ae toe foʻi e ui atu i Maketonia. Peitaʻi, e iai foʻi ni lamatiaga o le faigāmalaga i luga o le laueleele. E masani ona lalafi solo tagata faomea i auala i na aso. E oo lava i faletalimālō e lē malupuipuia. Ae ui i lea, sa filifili pea Paulo e faafetaiaʻia na lamatiaga i le laueleele, nai lo o le fesagaʻia o i latou o loo faatalitali mai  i Kenikerea. O le mea e lelei ai, e leʻi faimalaga na o ia. O aumea na malaga faatasi ma Paulo i lenei vaega o lana malaga faamisionare, na aofia ai Aritako, Kaio, Sekuno, Sopata, Timoteo, Tofimo ma Tuiko.—Galu. 20:3, 4.

11. E faapefea ona faia e Kerisiano i aso nei ni gaoioiga talafeagai e puipuia ai i latou, ma o le ā se faaaʻoaʻoga na faataatia e Iesu i lenei mea?

¹¹ I le pei o Paulo, e ao i Kerisiano ona mataala i le puipuia o i latou a o auai i le faiva. I nisi o oganuu, e latou te faimalaga ai o ni vaega pe e taʻitoʻalua, nai lo o le galue taʻitoʻatasi. Ae faapefea sauāga? E iloa lelei e Kerisiano o le a iai sauāga. (Ioa. 15:20; 2 Timo. 3:12) Peitaʻi, e latou te lē filifili e tuuina atu i latou i se tulaga lamatia. Seʻi manatu i le faaaʻoaʻoga a Iesu. I se tasi o mea na tupu, ina o le a amata ona fetogi o ia i maa e tagata tetee i Ierusalema, ona “lafi [lea o] Iesu ma alu ese mai i le malumalu.” (Ioa. 8:59) Mulimuli ane, ina ua taupulepule tagata Iutaia e fasiotia o ia, e leʻi “toe femaliuaʻi ai Iesu i luma o tagata Iutaia, ae ua ia tuua i inā, ae alu atu i le aai e . . . e latalata i le vao.” (Ioa. 11:54) Na faia e Iesu ni gaoioiga talafeagai ina ia puipuia ai o ia, ma o le faia faapea, e leʻi feteenaʻi ma le finagalo o le Atua mo ia. E faapena foʻi ona faia e Kerisiano i aso nei.—Mata. 10:16.

12, 13. (a) O ā aafiaga na oo i le faapotopotoga ona o le toe faatūina mai o Eutiko? (e) O le ā le faamoemoe mai i le Tusi Paia, e faamāfanafanaina ai i tatou e uiga i ē e pele ua maliliu?

¹² Na malaga faatasi atu Paulo ma ana aumea ma ui atu i Maketonia, ae na mulimuli ane ō eseese i latou. Ae na toe faatasi i latou i Teroa. d Ua faapea mai le faamatalaga: “Ua matou taunuu atu iā i latou i Teroa i aso e lima.” e (Galu. 20:6) O i inā na toe faatūina ai le tauleʻaleʻa o Eutiko, e pei ona taʻua i le amataga o lenei mataupu. Seʻi manatu i faalogona na oo i uso, ina ua vāai atu ua toe faaolaina la latou uō o Eutiko mai le oti! E pei ona taʻua i le lipoti, na “matuā faamāfanafanaina ai i latou.”—Galu. 20:12.

¹³ E moni e lē o toe tupu na vavega i aso nei. Ae ua “matuā faamāfanafanaina” i tatou i le faamoemoe o le toetū mai i le Tusi Paia, e uiga i ē pele ua maliliu. (Ioa. 5:28, 29) Seʻi manatu foʻi: Talu ai e lē lelei atoatoa Eutiko, na toe oti ai o ia mulimuli ane. (Roma 6:23) Ae o i latou o le a toetutū i le lalolagi fou a le Atua, o le a maua le faamoemoe o le ola e faavavau! Ma o i latou ua toe faatutūina aʻe e pule faatasi ma Iesu i le lagi, ua oofu i tino e lē mafai ona oti. (1 Kori. 15:51-53) O Kerisiano i aso nei—e tusa lava po o le vaega faauuina po o “isi mamoe”—e iai le māfuaaga lelei e “matuā faamāfanafanaina ai i latou.”—Ioa. 10:16.

14. O le ā na taʻu atu e Paulo i toeaina mai i Efeso ina ua latou feiloaʻi i Meleto?

¹⁴ Na malaga atu Paulo ma lana vaega mai i Teroa e agaʻi atu i Aso, ona ō atu ai lea i Metulene, Kioi, Samo ma Meleto. O le sini o Paulo, ia taunuu i Ierusalema i le taimi o le tausamiga o le Penetekoso. O lona fia taunuu vave i Ierusalema mo le Penetekoso, o le māfuaaga lea na ia filifilia ai se vaa e lē afea Efeso i lenei malaga. Talu ai na manaʻo o ia e feiloaʻi i toeaina i Efeso, o lea na ia talosaga atu ai ina ia latou feiloaʻi i Meleto. (Galu. 20:13-17) Ina ua taunuu i latou, na faapea atu Paulo: “Ua outou iloa lelei aʻu gaoioiga sa fai a o ou faatasi ma outou, mai lava i le uluaʻi aso na ou taunuu atu ai i le itumalo o Asia; na ou pologa i le Alii ma le lotomaulalo, ma loimata, ma puapuaga na oo iā te aʻu, ona o faufauga leaga a tagata Iutaia; ou te leʻi taofia foʻi le taʻuina atu iā te outou o mea aogā, ma aʻoaʻo atu iā te outou i luma o le lautele, ma mai i lea fale i lea fale. Ae ua ou molimau māeʻaeʻa atu i tagata Iutaia ma Eleni, e faatatau i le salamō i le Atua ma le faatuatua i lo tatou Alii o Iesu.”—Galu. 20:18-21.

15. O ā ni aogā o le molimau atu mai i lea fale i lea fale?

¹⁵ E tele auala e tatou te faaoo atu ai le upu moni i tagata i aso nei. I le pei  o Paulo, e tatou te taumafai malosi ina ia oo atu i mea e iai tagata, po o nofoaga faatali pasi, i auala tetele, po o maketi. Peitaʻi o le galuega mai i lea fale i lea fale, o le auala autū lea o loo faaaogāina e Molimau a Ieova. Aiseā? O se tasi o vala o le talaʻi mai i lea fale i lea fale, e telē le avanoa e faalogologo ai e lē aunoa tagata i le feʻau o le Malo, e faaalia ai e lē faailoga tagata le Atua. E maua ai foʻi e tagata lotofaamaoni le fesoasoani e tusa ma o latou manaʻoga. E faaopoopo atu i ai, o le faiva mai i lea fale i lea fale, e atiaʻe ai le faatuatua ma le onosaʻi o i latou o loo auai. O le mea moni, o le faailoga e iloa ai Kerisiano moni i aso nei, o lo latou maelega i le molimau atu “i luma o le lautele, ma mai i lea fale i lea fale.”

16, 17. Na faapefea ona faaalia e Paulo lona lē fefe, ma e faapefea ona faataʻitaʻi i ai Kerisiano i lana faaaʻoaʻoga?

¹⁶ Na faamatala atu e Paulo i toeaina mai i Efeso, e na te lē o iloaina po o ā ni lamatiaga o loo faatali mai mo ia pe a toe foʻi atu i Ierusalema. Na ia faapea atu iā i latou: “Peitaʻi, ua ou manatu e lē tāua loʻu ola iā te aʻu, ae tau lava ina ia ou faauma laʻu tamoʻega, ma le faiva na ou maua mai i le Alii o Iesu, ina ia ou molimau māeʻaeʻa i le tala lelei o le agalelei faifua o le Atua.” (Galu. 20:24) Ma le lē fefe, na teena ai e Paulo so o se tulaga—o le lē lelei o le soifua mālōlōina, po o le tele o teteega—e taofia ai o ia mai i le faataunuuina o lona tofiga.

¹⁷ E faapena foʻi Kerisiano i aso nei, e onosaʻi i tulaga faigatā eseese e tulaʻi mai. O nisi e fesagaʻi ma faasāsāaga ma sauāga mai i malo. O isi e latou te tauivi ma maʻi faaumiumi o le tino po o faalogona. E fesagaʻi talavou Kerisiano i aʻoga, ma omiga mai i uō. Po o le ā lava le tulaga e oo iā i latou, e tutumau pea Molimau a Ieova e pei o Paulo. E latou te maumauaʻi e “molimau māeʻaeʻa i le tala lelei.”

18. Na faapefea ona saʻoloto Paulo mai i le nofosala i le toto, ma na faapefea ona faia faapea e toeaina mai i Efeso?

¹⁸ Na sosoo ai ma le avatu tuusaʻo e Paulo o lapataʻiga i toeaina mai i Efeso, na faaaogā ai mea na tutupu iā te ia e fai ma faaaʻoaʻoga. Muamua, na ia taʻu atu iā i latou, atonu o le toe taimi lenei e latou te vāai mai ai iā te ia. Ona ia faapea atu lea: “Ua mamā aʻu mai i le toto o tagata uma, auā ou te leʻi taofia le taʻuina atu iā te outou o mea uma e finagalo i ai le Atua.” E faapefea ona faataʻitaʻi toeaina i Efeso iā Paulo, ma faaauau ai ona saʻoloto mai i le nofosala i le toto? Na ia faapea atu iā i latou: “O lea, ia outou uaʻi iā te outou lava ma le lafu mamoe uma, o ē ua tofia i ai outou e le agaga paia e fai ma ovasia, ina ia leoleo le faapotopotoga a le Atua, lea ua ia faatauina mai i le toto o lona lava Alo.” (Galu. 20:26-28) Na lapataʻi atu Paulo o le a iai “luko feʻai” o le a faaleagaina le lafu, ma e “latou te faauiga sesē mea, ina ia  taaʻina ese ai soo e mulimuli atu iā i latou.” O le ā e tatau i toeaina ona fai? Na lapataʻi mai Paulo: “Ia outou mataala ai ma ia manatua, e tolu tausaga o oʻu apoapoaʻi atu pea ma loimata iā te outou taʻitoʻatasi i le ao ma le pō.”—Galu. 20:29-31.

19. O le ā le tulaga o le faa-aposetasi na tulaʻi mai i le faaiʻuga o le uluaʻi senituri, ma o le ā na iʻu i ai i senituri mulimuli ane?

¹⁹ Na aliaʻi mai “luko feʻai” i le faaiʻuga o le uluaʻi senituri. E tusa o le 98 T.A., na tusi ai le aposetolo o Ioane: “Ua toʻatele anetikeriso . . . Na latou ō ese mai iā i tatou, auā e lē o i latou o ni o tatou tagata; auā ana o i latou o ni o tatou tagata, semanū e faatasi pea ma i tatou.” (1 Ioa. 2:18, 19) E oo mai i le senituri lona tolu, ua avea le fulitua i le upu moni ma mea na iʻu ai i le faatūina o le vasega o faifeʻau o ē e faapea mai o Kerisiano, ma i le senituri lona fā na talia aloaʻia ai e le Emeperoa o Konesetatino lenei vaega pepelo o le “Faa-Kerisiano.” E ala i lo latou faaaogā o tū faapaupau, ma faafoliga o ni “Kerisiano,” ua ʻtautatala ai i mea faapiʻopiʻo o latou taʻitaʻi lotu.’ O loo vaaia pea aafiaga o faiga faa-aposetasi i tū ma aʻoaʻoga a lotu Kerisinetoma.

20, 21. Na faapefea ona faaalia e Paulo le agaga faataulaga, ma e faapefea ona faia e toeaina Kerisiano i aso nei lenā mea?

²⁰ Sa matuā eseese le olaga o Paulo, ma olaga o i latou na mulimuli ane faaaogā sesē le lafu e saʻilia ai o latou lava lelei. Sa galue o ia e tausia o ia lava, ina ia lē avea ma avega mamafa i le faapotopotoga. O ana mea na fai mo ona uso talitonu, e lē ina ia maua ai ni ana meafaitino. Na uunaʻia e Paulo toeaina i Efeso, ia faaalia le agaga faataulaga. Na ia taʻu atu iā i latou: “E tatau ona outou fesoasoani atu . . . iā i latou ua vaivai, ma ia manatua foʻi upu a le Alii o Iesu, ina ua ia fetalai mai: ʻE sili le fiafia e maua i le foaʻi atu i lo o le talia mai.’”—Galu. 20:35.

²¹ I le pei o Paulo, e faaalia e toeaina i aso nei le agaga faataulaga. I le tuufaafeagai ma le ʻaufailotu o Kerisinetoma, o ē e faaaogā tagata lotu e suʻe ai a latou mea, ua tuu atu i toeaina le matafaioi “ina ia leoleo le faapotopotoga a le Atua,” e faia o latou tiute ma le lē manatu faapito. E lē tatau ona iai le faamaualuga ma le faasausili i le faapotopotoga Kerisiano, auā e lē taulau se tasi e ʻsaʻili i lona lava mamalu.’ (Faata. 25:27) O le faamaualuga, e oo ai i le faalumaina.—Faata. 11:2.

22. O le ā na pele ai Paulo i toeaina i Efeso?

²² O le alofa moni o Paulo i ona uso, na pele ai o ia iā i latou. Ina ua oo i le taimi o le a latou faamavae ai, “ua matuā fetagisi i latou uma, ua latou fusi iā Paulo ma sogi atu ma le alofa iā te ia.” (Galu. 20:37, 38) E talisapaia ma alolofa moni Kerisiano i ē e pei o Paulo, o ē ua tuuina atu i latou ma le lē manatu faapito mo o latou uso. I le iloiloina o le faaaʻoaʻoga e sili ona lelei a Paulo, pe e te lē ioe, e leʻi mitamitavale pe e faatele naʻuā e Paulo, i lona faapea mai: “Ua mamā aʻu mai i le toto o tagata uma”?—Galu. 20:26.