1, 2. O le ā le faasologa o mea na tutupu a o iai Paulo ma Panapa i Lusa?

 UA MATUĀ tele le vevesi o tagata i Lusa. Ua osooso solo ma le olioli se tagata na fanau mai o pipili, ina ua faamālōlōina o ia e ni tamāloloa se to‘alua e lē masani ai. Ua matuā maofa tagata, ma ua aumai e se ositaulaga ni pale fugālaau mo nei tamāloloa e to‘alua, o ē ua talitonu le motu o tagata o ni atua. Ua mānavanava tetele ma fe‘ei povi po‘a i le feita, a o sauni atu faitaulaga a Seu e fasimate i latou. Ua matuā finau atu ma le lē fiafia Paulo ma Panapa e tetee atu i tagata. Ua saeia o la ofu ma feosofi atu i le motu o tagata ma ‘ai‘oi atu, e aua ne‘i tapua‘i mai iā i la‘ua.

² Ae taunuu ane loa tagata tetee o Iutaia mai Anetioka i Pisitia ma Ikonio. O a latou tala taufaaleaga, ua faasesē ai mafaufau o tagata Lusa. O le motu o tagata lea na fia tapua‘i, ua liliu atu nei ma fetogi Paulo i maa ma tuua ai o ia ua matapogia. Ona o le feita tele, na latou toso ai Paulo ua momomo lona tino i tua o pā o le aai, ma tuua ai o ia ma le manatu ua oti.

3. O ā fesili o le a tatou talanoaina i lenei mataupu?

³ O le ā na i‘u iai lenei mea mata‘ina na tupu? O ā lesona ua a‘oa‘oina e ē o folafola le tala lelei i aso nei mai i mea na tutupu iā Panapa ma Paulo, ma tagata Lusa na vave ona suia o latou mafaufau? Ma e faapefea ona faata‘ita‘i toeaina Kerisiano i aso nei, i le faaa‘oa‘oga a Panapa ma Paulo, i lo la “tautatala atu ma le lototetele e ala i le pule mai iā Ieova”?—Galu. 14:3.

4, 5. Aiseā na malaga ai Paulo ma Panapa i Ikonio, ma o le ā na tupu ai i inā?

⁴ Ua mavae atu ni nai aso talu ona lafo Paulo ma Panapa i tua o le aai o Roma o Anetioka i Pisitia, ina ua faatupu e tagata Iutaia le vevesi. Nai lo o le faavaivai ai, na ‘la tūtū atu pefu o o la vae’ i tagata o le aai e le‘i tali lelei mai. (Galu. 13:50-52; Mata. 10:14) Na ō ese filemu Paulo ma  Panapa, ae tuu atu i le Atua e na te tauia ē tetee. (Galu. 18:5, 6; 20:26) Sa faaauau pea e nei misionare e to‘alua la la‘ua malaga taamilo e tala‘i ma le olioli. Sa savavali i la‘ua e tusa ma le 100 maila [150 km] i saute i sasa‘e, ma la taunuu ai i se fanua laugatasi lafulemu e tū i le va o atumauga, o Taurus ma Sultan.

⁵ Na nonofo muamua Paulo ma Panapa i Ikonio, ma sa masani i la‘ua i aganuu eseese a Eleni, ma o se tasi lea o aai autū o le itumalo o Roma o Kalatia. a O lenei aai, sa nonofo ai le anoanoa‘i o tagata lauiloa o Iutaia, ma le to‘atele o tagata liulotu e lē o ni Iutaia. E tusa ai ma la la‘ua masani, na ulufale ai Paulo ma Panapa i le sunako ma amata ona tala‘i atu. (Galu. 13:5, 14) Na “la tautatala atu i upu faaoso naunau, ua talitonu ai le toʻatele o tagata Iutaia ma tagata Eleni.”—Galu. 14:1.

6. Na faapefea ona avea Paulo ma Panapa o ni faia‘oga uigā, ma e faapefea ona tatou faata‘ita‘i iā i la‘ua?

⁶ Aiseā na matuā aogā ai le auala na tautatala atu ai Paulo ma Panapa? Na matuā faatumulia Paulo i le atamai o le Tusi Paia. Sa ia faafesoota‘i ma le tomai mau o le Tusi Paia i le talafaasolopito, valoaga, ma le Tulafono a Mose, e faamaonia ai o Iesu o le Mesia na folafolaina. (Galu. 13:15-31; 26:22, 23) E lē gata i lea, o le auala na talanoa ai Panapa, e faaalia ai lona manatu mamafa i tagata. (Galu. 4:36, 37; 9:27; 11:23, 24) E le‘i iai se isi o i la‘ua na faalagolago i lona lava atamai, ae na tautatala atu “e ala i le pule mai iā Ieova.” E faapefea ona e faata‘ita‘i i na misionare i lau galuega tala‘i? Ia faia lenei mea e ala i le: Faamasani lelei i le Afioga a le Atua. Ia fili ni mau o le Tusi Paia e sili ona talafeagai i lau ‘aufaalogologo. Vaai ni auala aogā e faamāfanafana ai i latou o loo e tala‘i atu i ai. Ma ia faavae pea au a‘oa‘oga i le pule a le Afioga a Ieova, ae lē o lou lava atamai.

7. (a) O ā āuga lelei ua maua ona o le tala lelei? (e) Afai ua fevaevaea‘i lou aiga ona o lou usiusita‘i i le tala lelei, o le ā e tatau ona e manatua?

⁷ Ae peita‘i, e le‘i fiafia tagata uma i Ikonio e faalogo atu i mea na fai mai ai Paulo ma Panapa. Ua faapea atili mai Luka, o “tagata Iutaia e leʻi talitonu, ua latou faaita ma faasesēina tagata o nuu ese ina ia tetee atu i le ʻauuso.” Na iloa e Paulo ma Panapa, e mana‘omia ona nonofo pea ina ia puipuia le tala lelei, ma na “umi se taimi o la tautatala atu ma le lototetele.” O le i‘uga, ua “vaeluaina le toʻatele o tagata o le aai; o isi ua ʻau i tagata Iutaia, a o isi ua ʻau i aposetolo.” (Galu. 14:2-4) Ua faapena fo‘i ona tali lelei mai tagata i le tala lelei i aso nei. Ua maua ai e nisi le autasi, a o isi ua fevaevaea‘i ai. (Mata. 10:34-36) Pe afai e fevaevaea‘i lou aiga ona o lou usiusita‘i i le tala lelei, ia manatua o teteega, e māfua ona o ni tala feavea‘i e lē faavaea po o ni tala taufaaleaga. O lau amio lelei e mafai ona faamaonia ai le lē sa‘o o na faamatalaga, ma mulimuli ane suia ai uiga o tagata e tetee iā te oe.—1 Pete. 2:12; 3:1, 2. 

8. Aiseā na tuua ai e Paulo ma Panapa Ikonio, ma o le ā le lesona e tatou te a‘oa‘oina mai i la la‘ua faaa‘oa‘oga?

 ⁸ Ina ua mavae se taimi, na fuafua ai e tagata tetee i Ikonio se togafiti e fetogi ai Paulo ma Panapa i maa. Ina ua faailoa atu lenei fuafuaga i nei misionare e to‘alua, ona la filifili lea e ō atu i se isi oganuu e molimau atu ai. (Galu. 14:5-7) Ua faapena fo‘i ona faaaogā e tagata tala‘i o le Malo i aso nei le faautauta. Pe a fesaga‘i ma tagata e fai mai upu leaga iā i tatou, ia tautatala atu ma le lototetele. (Fili. 1:7; 1 Pete. 3:13-15) Ae pe a iai ni faamata‘uga, e tatou te ‘alofia le faia o se mea e lē saogalemu, e ono lamatia ai o tatou ola, ma ola o o tatou uso talitonu.—Faata. 22:3.

9, 10. O fea na tū ai Lusa, ma o le ā ua tatou iloa e uiga i tagata na nonofo ai?

⁹ Ua aga‘i atu Paulo ma Panapa i Lusa, o se kolone o Roma e tusa ma le 20 maila [30 km] le mamao i saute i sisifo o Ikonio. O Lusa ma Anetioka i Pisitia e malolosi o la sootaga, ae e pau le mea e eseese ai, e lē to‘atele ni tagata aloa‘ia Iutaia e nonofo i Lusa. E foliga mai na tautatala tagata o le nuu i le gagana Eleni, a o la latou gagana moni, o Lukaonia. Atonu ona e le‘i iai ni sunako i le aai, o lea na amata ai ona tala‘i atu Paulo ma Panapa i nofoaga faitele. A o iai Peteru i Ierusalema, na ia faamālōlō ai se tagata na fanau mai e lē atoatoa le malosi. I Lusa na faamālōlō ai e Paulo se tamāloa na fanau mai o pipili. (Galu. 14:8-10) Ona o le vavega na faia e Peteru, na talitonu ai le to‘atele o tagata. (Galu. 3:1-10) O le vavega na faia e Paulo, na i‘u ai i se tulaga e matuā ese mai.

¹⁰ E pei ona faamatalaina i le amataga o le mataupu lenei, ina ua osooso fiafia le tamāloa pipili, na sesē ai manatu o tagata faapaupau i Lusa. Na latou manatu iā Panapa o Seu, le atua sili, a o  Paulo o Hereme o le atalii o Seu, ma o le fofoga fetalai o atua. (Taga‘i i le pusa “ Lusa ma le Lotu a Seu ma Hereme.”) Ae peita‘i, na maumaua‘i pea Paulo ma Panapa e faamalamalama i le aofia e faapea, o loo la tautatala ma gaoioi ona o le pule a Ieova le Atua moni e to‘atasi, ae e lē o atua faapaupau.—Galu. 14:11-14.

11-13. (a) O ā faamatalaga na fai atu ai Paulo ma Panapa i tagatānuu o Lusa? (e) O le ā se lesona e tatou te a‘oa‘oina mai i faamatalaga na fai atu ai Paulo ma Panapa?

¹¹ E ui i nei mea na tutupu e le‘i faatalitalia, ae na taumafai pea Paulo ma Panapa e pā‘ia loto o la la‘ua ‘aufaalogologo i se auala sili. E tusa ai ma lenei mea, na faamauina e Luka se auala aogā e tala‘i atu ai le tala lelei i tagata faapaupau. Mātau le auala na ‘ai‘oi atu ai Paulo ma Panapa i la la‘ua ‘aufaalogologo: “Alii e, aiseā ua outou faia ai nei mea? O i maʻua foʻi o ni tagata e iai vaivaiga e pei lava o outou. O loo ma folafola atu le tala lelei iā te outou, ina ia outou liliuese mai i nei mea lē aogā, ae liliu atu i le Atua soifua, o lē na faia le lagi ma le lalolagi, ma le sami, ma mea uma ua iai. Na ia tuu i le faitalia a nuu ese i tupulaga ua mavae, e savavali i o latou lava ala, ae na ia saunia se molimau e ala i mea lelei na ia faia; na ia foaʻi mai le timu mai i le lagi ma fuata o le tau, ma faamalieina outou i le anoanoaʻi o meaʻai, ma ua tutumu ai o outou loto i le olioli.”—Galu. 14:15-17.

¹² O ā lesona e tatou te a‘oa‘oina mai i nei upu faatupu manatu? Muamua, e le‘i fia faamamaluina e Paulo ma Panapa i la‘ua i luma o le ‘aufaalogologo. E la te le‘i faafoliga atu fo‘i o i la‘ua na mafai ai ona faia nei mea. Nai lo o lea, na la lotomaulalo e ta‘utino atu, e iai fo‘i o la vaivaiga e pei o nei tagata faapaupau. E moni, na maua e Panapa ma Paulo le  agaga paia ma ua tuusa‘oloto ai i la‘ua mai i a‘oa‘oga sesē. Ua faamanuiaina fo‘i i la‘ua i le faamoemoe, e pule faatasi ma Keriso. Peita‘i, na la iloa, e mafai fo‘i e tagatānuu o Lusa ona maua nei meaalofa, pe a usiusita‘i iā Keriso.

¹³ O ā ni o tatou uiga faaalia iā i latou e tatou te tala‘i atu i ai? Pe e tatou te vāai i ai e tutusa i tatou? A o tatou fesoasoani i isi e a‘oa‘o upu moni o le Afioga a le Atua, pe e pei i tatou o Paulo ma Panapa, e ‘alofia le soona sa‘ili o viiga? O Charles Taze Russell, o se faia‘oga sili ona lelei, o lē na ta‘imua i le galuega tala‘i i le faai‘ui‘uga o le senituri lona 19, ma le amatamataga o le senituri lona 20, o lē na faataatia se faaa‘oa‘oga e faatatau i lenei mea. Na tusi o ia: “Tatou te lē manana‘o i ni viiga po o ni mamalu mo i tatou lava po o a tatou lomiga, tatou te lē manana‘o fo‘i e ta‘ua i tatou o Lau Afioga Mamalu, po o se A‘oa‘o [Rapi].” O le uiga lotomaulalo o le uso o Russell, e atagia atu ai uiga o Paulo ma Panapa. E faapena fo‘i i tatou, o le fuafuaga o la tatou tala‘iga e lē ina ia faamamaluina ai i tatou lava, ae ia fesoasoani i tagata e liliu atu i “le Atua soifua.”

14-16. O le ā le lesona lona lua ma lona tolu, e tatou te a‘oa‘oina mai i upu na tautatala atu ai Paulo ma Panapa i tagatānuu o Lusa?

¹⁴ Manatu i le lesona lona lua e mafai ona tatou a‘oa‘oina mai i lenei lauga. Sa fetuutuuna‘i Paulo ma Panapa. O tagata Lusa, e itiiti pe e leai fo‘i se malamalama i le Tusi Paia, po o feutaga‘iga a le Atua ma le nuu o Isaraelu, e lē pei o tagata Iutaia ma tagata liulotu i Ikonio. Ae peita‘i, o i latou na faalogologo atu iā Paulo ma Panapa, o se vaega o tagata faifaato‘aga o le nuu. Sa faamanuiaina Lusa i le mālū o le tau ma le lafulemu o le laueleele. Sa mafai ona iloa e na tagata le anoanoa‘i o faamaoniga o uiga o Lē na foafoaina mea, e pei ona faaalia i fuata o laau, ma na faaaogā e misionare lenei manatu e masani ai le to‘atele, i a la taumafaiga e talanoa atu i tagata.—Roma 1:19, 20.

¹⁵ Pe e mafai fo‘i ona tatou fetuutuuna‘i faapena? E ui e totō e se faifaato‘aga le ituaiga o fatu e tasi i le tele o ona fanua, ae e eseese auala e na te faaaogā e saunia ai le palapala. O nisi o eleele e malū ma mafai ona ola ai le fatu. O isi eleele e mana‘omia le tele o sauniuniga. E pei o le fatu lea e tatou te totōina—e tasi lava, o le fe‘au o le Malo o loo i le Afioga a le Atua. Peita‘i, afai e tatou te pei o Paulo ma Panapa, e tatou te taumafai la ia iloa tulaga ma talaaga faalotu o tagata o loo tatou tala‘i atu i ai. Ona tatou faaaogā lea o lenā iloa, e taa‘ina ai le auala e tatou te tala‘i atu ai le fe‘au o le Malo.—Luka 8:11, 15.

¹⁶ Ae e tatou te a‘oa‘oina le lesona lona tolu mai i le tala iā Paulo, Panapa ma tagatānuu o Lusa. E ui i a tatou taumafaiga sili, ae o le fatu o loo tatou totōina, e faoesea i nisi taimi pe pa‘ū i le mea papa. (Mata. 13:18-21) A tupu lenā mea, aua le faavaivai. E pei ona faamanatu mulimuli ane e Paulo i le ‘ausoo i Roma, “e ta‘itasi . . . i tatou uma [e aofia ai i latou o loo tatou talanoa atu i ai e uiga i le Afioga a le Atua] ma tala atu lana amio i le Atua.”—Roma 14:12.

17. Ina ua tuua Teipe, o fea na malaga atu i ai Paulo ma Panapa, ma aiseā?

¹⁷ Ina ua toso faamalosi Paulo i tua o le aai o Lusa ma tuu ai i inā e faapea ua oti, na si‘omia o ia e le ‘ausoo, a ua tū o ia i luga ma alu atu i le aai e mapu ai i le pō. O le aso na sosoo ai, na amata ai ona malaga atu Paulo ma Panapa i Teipe, e tusa ma le 60-maila [100 km] le mamao. E tatou te vāai faalemafaufau i le tigā na oo iā Paulo a o malaga atu o ia i lenei faigāmalaga fitā, ona e le‘i umi se taimi talu ona fetogia o ia i maa. Ae sa finafinau pea i la‘ua ma Panapa, ma ina ua taunuu i Teipe na la “maua mai ai le tele o soo.” Nai lo o le ui atu i se auala puupuu e toe fo‘i ai i le mea o loo faamautū ai i Anetioka i Suria, ae na la ‘toe fo‘i i Lusa, Ikonio, ma Anetioka’ i Pisitia. Mo le ā le fuafuaga? Ina ia “faamalosiau i le ʻausoo, ma faalaeiau i latou ina ia tumau i le faatuatua.” (Galu. 14:20-22) Ma‘eu se faaa‘oa‘oga na la faataatia mo i tatou! Sa la faamuamua mana‘oga o le faapotopotoga nai lo o i la‘ua. Ua faata‘ita‘i fo‘i ovasia femalagaa‘i ma misionare i aso nei i la la‘ua faaa‘oa‘oga.

18. O ā agavaa e mana‘omia i le tofiaina o se tasi e avea ma toeaina?

¹⁸ E lē gata i le faamalosia o soo i a la upu ma faaa‘oa‘oga, ae na tofia e Paulo ma Panapa “toeaina mo i latou i faapotopotoga taʻitasi.” E ui ina “aauina atu nei tane e le agaga paia” i lenei malaga faamisionare, ae sa tatalo pea ma anapopogi Paulo ma Panapa, ina “ua la tuuina atu i latou [toeaina] i le tausiga a Ieova.” (Galu. 13:1-4; 14:23) O le auala fo‘i lenā o loo mulimuli ai toeaina i aso nei. A o le‘i faatūina atu mo ni tofiga, e tatalo ma iloilo e toeaina agavaa faale-Tusi Paia o se uso ua fautuaina. (1 Timo. 3:1-10, 12, 13; Tito 1:5-9; Iako. 3:17, 18; 1 Pete. 5:2, 3) E lē fuaina le filifiliga i le umi o le taimi talu ona avea ma Kerisiano. Ae o le auala e tautala ai se uso, o lana amio, ma lona talaaga, e faamaonia ai le tele o loo galue ai le agaga paia i lona olaga. O lona ausia o mea e mana‘omia o loo i le Tusi Paia e avea ai o se ovasia, e iloa ai po ua agavaa o ia e avea o se leoleo mamoe. (Kala. 5:22, 23) O ovasia matagaluega e iai le matafaioi e tofia ai toeaina.—Faatusatusa i le 1 Timoteo 5:22.

19. O ā mea ua iloa e toeaina e tatau ona latou tali atu ai, ma e faapefea ona latou faata‘ita‘i iā Paulo ma Panapa?

¹⁹ Ua iloa lelei e toeaina tofia, e latou te tali atu i le Atua i le auala o loo latou tausia ai le faapotopotoga. (Epe. 13:17) I le pei o Paulo ma Panapa, e ta‘imua toeaina i le galuega tala‘i. E latou te faalaeiau i uso i a latou upu. Ma e latou te lotomalilie e faamuamua mana‘oga o le faapotopotoga, nai lo o o latou lava lelei.—Fili. 2:3, 4.

20. E faapefea ona aogā iā i tatou le faitau i tala e uiga i galuega faamaoni a o tatou uso?

²⁰ Ina ua taunuu atu Paulo ma Panapa i lo la aiga i Anetioka i Suria, na la faamatala atu “le tele o mea na faia e le Atua e ala iā i laʻua, ma ua ia tatalaina le faitotoʻa o le faatuatua mo nuu ese.” (Galu. 14:27) A o tatou faitau e uiga i galuega faamaoni a o tatou uso Kerisiano, ma iloa ai le auala na faamanuia ai e Ieova a latou taumafaiga, o le a faalaeiauina ai i tatou e “tautatala atu ma le lototetele e ala i le pule mai iā Ieova.”