1. Faamatala mai le tulaga sa iai i le taimi o le tausamiga o le Penetekoso.

 SA FAATUMULIA le aai o Ierusalema i le fiafia. a Sa alu a‘e le asu mai i le fata faitaulaga o le malumalu, a o usu e le ‘au sa Levī le pese Aleluia (Salamo e 113 e oo i le 118), atonu na latou pepese fetalia‘i ai. Sa faatumulia ala tetele i tagata na asiasi ane. Na ō mai i latou mai i nuu mamao e pei o Elama, Mesopotamia, Kapatokia, Pono, Aikupito ma Roma. b O le ā le mea o loo fai ai? O le Penetekoso, sa ta‘ua fo‘i o “le aso o uluaʻi fua ua matutua.” (Nu. 28:26) O lenei tausamiga faaletausaga, sa faailoga ai le i‘uga o le seleselega o karite ma le amataga o le seleselega o saito. O se aso e olioli tele ai.

2. O ā mea mata‘ina na tutupu i le aso Penetekoso 33 T.A.?

² I le tusa o le tā o le iva i lenā taeao māfanafana o le 33 T.A., na tupu ai se mea ofoofogia ma o loo manatuaina pea mo le tele o senituri. E le‘i umi ae faalogoina le “taalili mai i le lagi e pei o le agi o se matagi malosi.” (Galu. 2:2) Sa faatumulia le fale lea sa faapotopoto ai soo e tusa ma le 120 i le taalili leotele. Ona sosoo ai lea ma se mea na faate‘ia ai. O laulaufaiva e pei o ni afi, na vaaia ua nofo i luga o soo ta‘ito‘atasi. c Ona ‘faatutumuina ai lea o soo i le agaga paia,’ ma amata ona tautatala i gagana eseese! Ina ua tuua e soo le fale, sa matuā maofa tagata asiasi na latou feiloa‘i i ala tetele o Ierusalema, ona ua mafai ona tautatala atu soo ‘i a latou lava gagana’!—Galu. 2:1-6.

3. (a) Aiseā ua ta‘ua ai le aso Penetekoso 33 T.A., o se amataga fou i le talafaasolopito o le tapua‘iga moni? (e) Sa faapefea ona fesoota‘i le lauga a Peteru ma le faaaogāina o “ki o le Malo”?

³ O lenei tala faagaeeloto, o se faailoga o le amataga fou o le tapua‘iga moni—o le faavaeina lea o le nuu o Isaraelu faaleagaga, le  faapotopotoga o Kerisiano faauuina. (Kala. 6:16) Ae e iai se isi mea. Ina ua lauga atu Peteru i le motu o tagata i lenā aso, sa ia faaaogā le ki muamua o “ki [e tolu] o le Malo,” ia e mafai ai ona tatala atu se avanoa, e maua ai e ni vaega o tagata eseese se faaeaga faapitoa. (Mata. 16:18, 19) O le ki muamua, na talia ai e tagata Iutaia ma ē na liliu i le lotu Iutaia le tala lelei, ma faauuina ai i le agaga paia o le Atua. d Ona avea ai lea o i latou ma vaega o le Isaraelu faaleagaga, ma maua ai le faamoemoe e pule o ni tupu ma ositaulaga i le Malo Faa-Mesia. (Faaa. 5:9, 10) Mulimuli ane, na faalautele atu lenā faaeaga i tagata Samaria, ona sosoo ai lea ma tagata o Nuu Ese. O le ā e a‘oa‘oina e Kerisiano i aso nei mai i mea mata‘ina na tutupu i le aso Penetekoso 33 T.A.?

4. Ua faapefea ona faaauauina e le faapotopotoga Kerisiano i aso nei, le faapotopotoga lea na amata mai i le 33 T.A.?

⁴ Na amata le faapotopotoga Kerisiano i soo e tusa ma le 120 ua faauuina e le agaga paia, o ē na ‘faatasitasi uma i le nofoaga e tasi,’ i se potu pito i luga. (Galu. 2:1) E māe‘a ane lenā aso, ua faitau afe i latou o lenā faapotopotoga ua uma ona papatiso. Ma o le amatamataga lenā o se faapotopotoga, lea o loo faaauau ona faatuputeleina e oo mai i aso nei! Ioe, o se nuu o tane ma fafine e matata‘u i le Atua—le faapotopotoga Kerisiano i aso nei—lea o loo auala atu ai le ‘tala‘iina o le tala lelei o le Malo i le lalolagi atoa e fai ma molimau i atunuu uma,’ a o le‘i oo mai le i‘uga o lenei faiga o mea.—Mata. 24:14.

5. O ā faamanuiaga e maua mai i le auaufaatasi ma le faapotopotoga Kerisiano, e lē gata i le ulua‘i senituri, ae faapea fo‘i aso nei?

⁵ Ua avea fo‘i le faapotopotoga Kerisiano ma puna o faalaeiauga faaleagaga mo ona sui, e lē gata i le ‘aufaauuina, ae mulimuli ane o “isi mamoe.” (Ioa.  10:16) Na faaalia e Paulo lona talisapaia o le lagolagosua a sui o le faapotopotoga ina ua tusi i Kerisiano i Roma: “Ua ou matuā naunau lava e fia feiloaʻi ma outou, ina ia ou avatu ni meaalofa faaleagaga e faatumauina ai outou; ma ia tatou fefaalaeiauaʻi ai i le faatuatua, o outou atoa ma aʻu.”—Roma 1:11, 12.

6, 7. Ua faapefea ona faataunuuina e le faapotopotoga Kerisiano i aso nei, le poloa‘iga a Iesu e tala‘i i atunuu uma?

⁶ E tutusa lelei fuafuaga a le faapotopotoga Kerisiano i aso nei, ma lea sa iai i le ulua‘i senituri. Sa tuu atu e Iesu i lona ‘ausoo se galuega faigatā e fai, ae e maua ai le olioli. Na ia ta‘u atu iā i latou: “Ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ma ia aʻoaʻoina i latou ia tausi i mea uma ua ou poloaʻi atu ai iā te outou.”—Mata. 28:19, 20.

⁷ O le faapotopotoga Kerisiano o Molimau a Ieova, o le auala lea o loo faataunuu ai lenā galuega i aso nei. E moni o se lu‘i le talanoa atu i tagata e tautatala i gagana eseese. Peita‘i, ua saunia e Molimau a Ieova lomiga faale-Tusi Paia i gagana e sili atu i le 1,000. Afai o loo e auaufaatasi e lē aunoa ma le faapotopotoga Kerisiano, ma faia se vaega i le galuega o le tala‘ia o le Malo ma le faia o soo, ua tatau la ona e olioli. Ua faitaulia oe faatasi ma se vaega to‘aitiiti i le lalolagi, o ē ua iai le faaeaga o le avatuina o se molimau māe‘ae‘a i le suafa o Ieova!

8. O le ā le fesoasoani e tatou te maua mai i le faapotopotoga Kerisiano?

⁸ Ua saunia e Ieova le Atua se aufaatasiga o uso i le lalolagi aoao, ina ia fesoasoani iā te oe e tumau ma le olioli i nei taimi faigatā. Na tusi Paulo i Kerisiano i Eperu e faapea: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, ae ia fefaalaeiauaʻi, ia sili foʻi ona faia faapea auā ua outou iloa  ua matuā latalata mai lava le aso.” (Epe. 10:24, 25) O le faapotopotoga Kerisiano, o se sauniuniga mai iā Ieova ina ia mafai ai ona e faalaeiau i isi ma faalaeiauina ai fo‘i oe. Ia mafuta vavalalata atu i ou uso ma tuafāfine faaleagaga. Aua lava ne‘i lafoa‘iina le faapotopoto faatasi i sauniga faa-Kerisiano!

9, 10. E faapefea ona faaavanoa e nisi i latou lava ia talanoa atu i tagata e tautatala i isi gagana?

⁹ Se‘i manatu i le fiafia na oo i le aofia o tagata eseese, o Iutaia ma tagata liulotu i le aso Penetekoso 33 T.A. O le to‘atele na iai e foliga na tautatala i se gagana taatele, atonu o le gagana Eleni po o le gagana Eperu. A o lea “ua ta‘itasi ma faalogo atu [i le ‘ausoo] o tautala i lana lava gagana.” (Galu. 2:6) E mautinoa, na pā‘ia loto o le ‘aufaalogologo ina ua faalogo atu i le tala lelei i a latou lava gagana. O le mea moni, e lē o tuuina mai i Kerisiano i aso nei se tomai faavavega e tautatala ai i isi gagana. Ae peita‘i, ua faaavanoa e le to‘atele i latou lava e faasalalau atu le fe‘au o le Malo i tagata o atunuu uma. E faapefea? O nisi ua latou a‘oa‘oina se gagana fou ina ia mafai ai ona auauna i faapotopotoga tuaoi e ese a latou gagana, pe e siitia atu fo‘i i se isi atunuu. E masani ona latou iloa, e fiafia tele la latou ‘aufaalogologo i a latou taumafaiga.

¹⁰ Se‘i manatu iā Christine, o lē na a‘oa‘oina le gagana Gujarati faatasi ma isi Molimau e to‘afitu. Na talanoa atu o ia i se fafine talavou e la te faigaluega faatasi, e tautala i le gagana Gujarati. Na matuā fiafia le fafine ma mana‘o e fia iloa le māfuaaga ua taumafai ai Christine, e a‘o lenei gagana faigatā o le faa-Gujarati. Sa mafai ai e Christine ona avatu se molimau lelei. Na faapea atu le fafine iā Christine: “Atonu e iai se mea tāua o loo e fia ta‘u mai.”

11. E faapefea ona tatou nofosauni e talaʻi atu le feʻau o le Malo i tagata e tautatala i isi gagana?

 ¹¹ O le mea moni e lē mafai e i tatou uma ona a‘oa‘o se isi gagana. Peita‘i, e mafai ona tatou sauniuni e tala‘i atu le fe‘au o le Malo i tagata e tautatala i isi gagana. E faapefea? O se tasi o auala, o le faaaogā lelei lea o le polokalame o le JW Language^® ina ia aʻoaʻo ai se faafeiloaʻiga faigofie, i se gagana e masani ona faaaogāina i lou vaipanoa. E mafai foʻi ona e aʻoaʻoina ni nai faaupuga i lenā gagana, lea e ono faaosofia ai le naunau o i latou e tautatala ai. Ia faasino i latou i le tatou upega tafaʻilagi o le jw.org, ma faasino i ai lomiga ma vitiō eseese o loo maua i la latou gagana. O le faaaogāina o nei meafaigaluega i le talaʻiga, e tatou te tofo ai foʻi i le olioli na maua e o tatou uso i le uluaʻi senituri, ina ua faalogo tagata mai i isi atunuu i le tala lelei, “i [latou] lava gagana.”

12. (a) Na faapefea ona fesoota‘i le valoaga a le perofeta o Ioelu ma le vavega na faia i le aso Penetekoso o le 33 T.A.? (e) Aiseā na faatalitalia ai le faataunuuga o le valoaga a Ioelu i le ulua‘i senituri?

¹² “Ua tū i luga Peteru” e lauga atu i tagata mai atunuu eseese. (Galu. 2:14) Ua ia faamatala atu i tagata uma na faalogologo e faapea, o le Atua na foa‘i maia le tomai e tautatala ai i gagana ese ina ia faataunuu ai le valoaga a Ioelu: “Ou te liligi ifo loʻu agaga i luga o ituaiga uma o tagata.” (Ioe. 2:28) A o le‘i afio a‘e Iesu i le lagi, na ia ta‘u atu i ona soo e faapea: “Ou te talosaga atu foʻi i le Tamā e foaʻi mai iā te outou se isi fesoasoani,” lea na faailoa mai e Iesu, “o le agaga.”—Ioa. 14:16, 17.

13, 14. Na faapefea ona taumafai Peteru e pā‘ia loto o lana ‘aufaalogologo, ma e faapefea ona tatou faata‘ita‘i i lana auala?

¹³ Sa tuusa‘o atu upu faai‘u a Peteru i le motu o tagata e faapea: “Ia iloa lelei e le aiga uma o Isaraelu, ua faia o ia e le Atua e avea ma Alii ma Keriso, o Iesu lenei na outou tutuʻia i luga o le laau.” (Galu. 2:36) E moni, e le‘i iai uma le to‘atele o le  ‘aufaalogologo a Peteru i le taimi na fasiotia ai Iesu i le laau faaoosala. Peita‘i, ona o i latou o se vaega o le nuu, ua talafeagai ai la ona tuua‘ia i latou i lenei gaoioiga. Mātau fo‘i, na lauga atu ma le faaaloalo Peteru i ona uso Iutaia ma na pā‘ia ai o latou loto. O le sini o Peteru, ia uuna‘ia lana ‘aufaalogologo ia salamō, ae e lē o le ta‘usalaina o i latou. Pe sa lē fiafia tagata i le lauga a Peteru? E leai. Nai lo o lenā, na “tuia . . . o latou loto.” Na latou fesili atu: “O le ā se mea e ao ona matou faia?” E foliga mai, o le auala faaaloalo ma mautinoa na faaaogā e Peteru, na pā‘ia ai loto o le to‘atele ma oo ai ina salamō.—Galu. 2:37.

¹⁴ E mafai ona tatou faata‘ita‘i i le auala na pā‘ia ai e Peteru loto o tagata. Pe a molimau atu i isi, e lē tatau ona tatou finau atu i mataupu e lē faale-Tusi Paia e ono lāgā e le tagata e ona le fale. Ae e lelei ona tatou talanoa i manatu e tatou te ioe faatasi i ai. Pe afai e tatou te talanoa i mataupu e ioe iai la tatou ‘aufaalogologo, e mafai la ona tatou fefulisa‘i ma le faautauta manatu mai i le Afioga a le Atua. E masani lava, pe a faailoa atu ni manatu e ioe faatasi i ai mai i le Tusi Paia, e ono tali lelei mai tagata lotofaamaoni.

15. (a) O le ā le faamatalaga na faia e Peteru ma o le ā le tali mai a tagata? (e) Na faapefea ona agavaa mo le papatisoga le faitau afe na faalogo i le tala lelei i le aso Penetekoso o le 33 T.A.?

¹⁵ I le aso mata‘ina o le Penetekoso i le 33 T.A., na faapea atu ai Peteru i tagata Iutaia ma tagata liulotu na tali lelei ane: “Inā salamō ia ma ia ta‘itasi ma papatisoina outou.” (Galu. 2:38) O le i‘uga, e tusa ma le 3,000 na papatisoina, atonu i vai ta‘ele i Ierusalema pe e latalata ane fo‘i. e Po o se gaoioiga faavavevave ea lenei? Po ua avea lenei faamatalaga o se faaa‘oa‘oga mo tagata a‘oga o le Tusi Paia, ma fanau a mātua Kerisiano, e faanatinati ai ona papatiso ae e le‘i sauni? E matuā leai  lava. Ia manatua, o tagata Iutaia ma tagata na liulotu, o ē na papatiso i le aso Penetekoso i le 33 T.A., o ni tagata a‘oga maelega o le Afioga a le Atua, ma o i latou o se vaega o le nuu ua uma ona tuuina atu iā Ieova. E lē gata i lea, ua faaalia lo latou maelega—e ala i le malaga mamao atu ina ia auai i lenei tausamiga. Ina ua māe‘a ona talia le mea moni e faatatau i le vaega a Iesu i le faataunuuina o le finagalo o le Atua, ona faaauau ai lea ona latou auauna i le Atua—ma avea ai ma soo papatiso o Keriso.

16. Na faapefea ona faaalia e Kerisiano o le ulua‘i senituri le agaga faataulagaina?

¹⁶ E mautinoa sa iai le faamanuiaga a Ieova i lenā vaega. Na faapea mai se faamatalaga: “Ona faapotopoto faatasi lea o na soo fou uma, ma fetufaa‘i mea uma na iai iā i latou, ma ua faatau atu a latou meatotino, ma fanua, ma tufatufa atu le tau o nei mea i tagata uma, e tusa ai ma manaʻoga o tagata taʻitoʻatasi.” f (Galu. 2:44, 45) E mautinoa e manana‘o Kerisiano moni uma e faata‘ita‘i i lenā agaga alofa faataulagaina.

17. O ā vala e tatau ona ausia e se tagata ona agavaa lea mo le papatisoga?

¹⁷ O le tuuina atu ma le papatisoga faa-Kerisiano, e aofia ai ni laasaga faale-Tusi Paia e ao ona ausia. E ao i le tagata ona ave i fale le poto sa‘o i le Afioga a le Atua. (Ioa. 17:3) E mana‘omia ona faaalia le faatuatua, ia salamō moni ma liliu ese mai i ona ala tuai. (Galu. 3:19) E tatau fo‘i ona liliu ma fulitua i na mea, ma auai i galuega sa‘o ia e ōgatusa ma le finagalo o le Atua. (Roma 12:2; Efe. 4:23, 24) O laasaga na e mulimuli mai pe a uma ona ia faia se tuuina atu i le Atua i le tatalo, ma papatisoina.—Mata. 16:24; 1 Pete. 3:21.

18. O le ā le faaeaga ua faaavanoa atu mo soo papatiso o Keriso?

¹⁸ Po o oe o se soo tuuina atu ma papatisoina o Iesu Keriso? Afai o lea, ia e fiafia i le avanoa ua faalautele atu iā te oe. E pei o soo i le ulua‘i senituri na faatumuina i le agaga paia, e mafai fo‘i la ona faaaogāina oe i se auala lelei, e avatu ai se molimau māe‘ae‘a ma faia le finagalo o Ieova!