1-3. (a) Aiseā na tula‘i ai le ‘auaposetolo i luma o le ‘au Saniterini, ma o le ā le fesili ua lāgā ai? (e) Aiseā e tatou te naunau ai i le tumau o le ‘auaposetolo?

 UA MATUĀ lilivau i le feita faamasino o le ‘au Saniterini! Ua faamasinoina aposetolo o Iesu i luma o lenei faamasinoga maualuga. O le ā le māfuaaga? Na avatu e le ositaulaga sili o Iosefa Kaiafa se faatonuga malosi iā i latou e faapea: “Na matou matuā fai atu iā te outou, e matuā sā lava ona toe aʻoaʻo atu i lenā igoa.” O le ita tele o lenei ta‘ita‘i, na musu ai e ta‘u le igoa o Iesu. Ua toe faapea atu Kaiafa, “Ae faauta! ua outou faatumu Ierusalema i a outou aʻoaʻoga, ma ua outou maumauaʻi e tuuina mai i o matou luga le toto o lenā tagata.” (Galu. 5:28) E manino le fe‘au: Aua le toe tala‘i—ne‘i oo se mea iā te outou!

² O le ā le tali a aposetolo? O lo latou tofiga e tala‘i, e mai iā Iesu, o lē na tuuina i ai e le Atua le pule. (Mata. 28:18-20) Po o le a lolo atu aposetolo ona o le fefefe i tagata ma lē toe tala‘i ai? Po o le a latou maua le lototele e tumau ai ma faaauau ona tala‘i? O le fesili ua tula‘i mai: O ai o le a latou usiusita‘i i ai, o le Atua po o tagata? E aunoa ma se faatalatū, na tautala atu le aposetolo o Peteru mo le ‘auaposetolo uma. O ana upu na manino ma lē fefe.

³ Ona o ni Kerisiano moni, e tatou te naunau ai i le auala na tali atu ai aposetolo i faamata‘u a le ‘au Saniterini. E faatatau fo‘i iā i tatou lenei faatonuga e tala‘i. I le faia o lenei tofiga mai le Atua, e tatou te ono fesaga‘i ai fo‘i ma ni teteega. (Mata. 10:22) Atonu e taumafai tagata tetee e taofia pe faasā la tatou galuega. O le ā se mea e tatou te faia? E tatou te maua aogā i le iloiloina o le tulaga o le ‘auaposetolo, ma mea na i‘u i ai ina ua faamasinoina i latou i luma o le ‘au Saniterini. a

4, 5. Aiseā na ‘tutumu ai i le lotoleaga’ Kaiafa ma le ‘au Satukaio?

⁴ Ia manatua, ina ua faatonuina i le taimi muamua Peteru ma Ioane e aua ne‘i toe tala‘i, na la tali atu: “E lē mafai ona ma lē taʻu atu mea ua ma  vāai ma faalogo i ai.” (Galu. 4:20) Ina ua mavae lenā fetaia‘iga ma le ‘au Saniterini, na faaauau pea ona tala‘i atu Peteru, Ioane, ma le ‘auaposetolo uma i le malumalu. Na faia e aposetolo ni faailoga mata‘ina e ala i le faamālōlōina o ma‘i, ma le tutuliina o temoni. Na latou faia na faailoga i le “Faapaologa o Solomona,” o se poletito telē i le itu i sasa‘e o le malumalu e faapotopoto ai le to‘atele o tagata Iutaia. Ioe, e oo lava i le lafoia o le ata o Peteru i luga o tagata mama‘i, na mālōlō ai! O le to‘atele o ē na faamālōlōina faaletino, na latou talia upu moni o le Afioga a le Atua. O le i‘uga, “ua faaopoopoina pea le toʻatele o tane ma fafine o ē ua talitonu i le Alii.”—Galu. 5:12-15.

⁵ ‘Na tutumu i le lotoleaga’ Kaiafa ma le ‘au Satukaio, ma tagata o la latou lotu, ma lafo le ‘auaposetolo i le falepuipui. (Galu. 5:17, 18) O le ā le mea na feita ai le ‘au Satukaio? Talu ai na a‘oa‘o e le ‘auaposetolo ua toe faatūina Iesu, ae o le ‘au Satukaio, e lē talitonu i le toetū. Na faapea atu le ‘auaposetolo, e na o le faatuatua iā Iesu e mafai ona faaolaina ai se tasi, ae na fefefe le ‘au Satukaio ne‘i faasalaina i latou e Roma, pe a faatuatua tagata iā Iesu o lo latou Ta‘ita‘i. (Ioa. 11:48) E lētioa ona maumaua‘i le ‘au Satukaio, e vavao le ‘auaposetolo e aua ne‘i toe tala‘i!

6. O ai le pogai autū o sauāga i auauna a Ieova i aso nei, ma aiseā e lē faate‘ia ai i tatou i lenā mea?

⁶ E faapena fo‘i i aso nei, o tagata autū o loo faapogaia sauāga i auauna a Ieova, o ta‘ita‘i lotu tetee. O i latou na e masani ona uuna‘ia ta‘ita‘i o malo ma ē faia faasalalauga, ina ia taofia la tatou galuega tala‘i. Pe e faate‘ia ai i tatou? E leai. O la tatou fe‘au ua faaalialia ai i lumāmea lotu sesē. O le talia o upu moni o le Tusi Paia, ua tuusa‘oloto ai tagata lotofaamaoni mai i talitonuga, ma faiga e lē faavaea i le Tusi Paia. (Ioa. 8:32) Po o se mea la e faate‘ia ai i tatou ona ua avea la tatou fe‘au ma pogai ua tutumu ai ta‘ita‘i lotu i le lotoleaga?

7, 8. O ā aafiaga e lē taumatea na oo i le ‘auaposetolo, ona o le faatonuga a le agelu, ma o le ā le fesili e lelei ona tatou fesili ifo ai?

⁷ A o iai i le falepuipui ma faatalitali i lo latou faamasinoga, atonu na taumānatu ai le ‘auaposetolo, po o le a fasiotia faamaturo i latou i lima o o latou fili. (Mata. 24:9) Ae peita‘i, na tupu se mea uiga ese e le‘i faatalitalia i le pō—“na tatala e le agelu a Ieova faitotoʻa o le falepuipui.” b (Galu. 5:19) Ona avatu lea e le agelu iā i latou o faatonuga patino: “Inā ō ia outou ma tutū i le malumalu, ma taʻutaʻu atu pea.” (Galu. 5:20) E lē taumatea, o lenā faatonuga na faamautinoa ai i le ‘auaposetolo, e sa‘o le mea na latou faia. Na fesoasoani fo‘i upu a le agelu e faamalosia ai i latou e tumau, e tusa lava po o le ā le mea e tupu. O le faatuatua malosi ma le lototetele o le ‘auaposetolo, na ‘ulufale atu ai i le malumalu i le tafa o ata, ma amata ona aʻoaʻo atu.’—Galu. 5:21.

⁸ E lelei iā i tatou ta‘ito‘atasi ona fesili ifo, ‘Po o lava lo‘u faatuatua ma le lototele e faaauau ai ona tala‘i i tulaga faapena?’ E mafai ona maua lo tatou malosi i le iloaina, o lenei galuega tāua o le “avatu o se molimau māeʻaeʻa e faatatau i  le Malo o le Atua,” o loo iai le lagolagosua ma le faatonutonuga a agelu.—Galu. 28:23; Faaa. 14:6, 7.

9-11. Na faapefea ona tali atu le ‘auaposetolo i le faatonuga a le ‘au Saniterini e aua nei toe tala‘i, ma o le ā le faaa‘oa‘oga ua faataatia mai mo Kerisiano moni?

⁹ Ua sauni nei Kaiafa ma isi faamasino o le ‘au Saniterini e feutaga‘i ma le ‘auaposetolo. I lo latou lē iloa o le mea na tupu i le falepuipui, na aauina atu ai e le faamasinoga leoleo e aumai pagota. Se‘i manatu i le tete‘i o leoleo ina ua iloa ua leai ni pagota, e ui o loo “loka le falepuipui ma faamau uma faitotoʻa, o loo tutū foʻi leoleo i faitotoʻa.” (Galu. 5:23) Na vave ona iloa e le pule o le malumalu ua toe fo‘i mai le ‘auaposetolo i le malumalu, ma o loo molimau atu e uiga iā Iesu Keriso—le galuega lava lea na lafo ai i latou i le falepuipui! Na faavave ona ō atu le pule ma leoleo i le malumalu, ma aumai pagota ma avatu i luma o le ‘au Saniterini.

¹⁰ E pei ona faamatalaina i le amataga o lenei mataupu, na faamanino atu e ta‘ita‘i lotu ua lotoa, e tatau ona taofi le ‘auaposetolo e aua ne‘i toe tala‘i. O le ā le tali a le ‘auaposetolo? I le avea ma fofoga fetalai, na tali atu ai ma le lototele Peteru: “E tatau ona matou usiusita‘i i le Atua o le pule, nai lo o tagata.” (Galu. 5:29) O lea, ua avea ai le tumau o le ‘auaposetolo, ma faaa‘oa‘oga mo Kerisiano moni a o faagasolo taimi. Ua faasā ai e ta‘ita‘i faaletagata le aiā e usiusita‘i ai i mea e mana‘omia e le Atua, ae tāpā mea e faasā e le Atua. I o tatou aso, afai e faasā e “faipule silisili” la tatou galuega tala‘i, e lē mafai ona tatou taofia le faia o lo tatou tofiga mai le Atua, e tala‘i le tala lelei. (Roma 13:1) O le a tatou maua ni auala atamai e faaauau ai ona avatu se molimau māe‘ae‘a, e faatatau i le Malo o le Atua.

¹¹ E lē faate‘ia ai i tatou, ona o le tali ma le lototetele o aposetolo, na māfua ai le matuā feita o faamasino. Ua atili ai ona latou maumaua‘i e “fasiotia” aposetolo. (Galu. 5:33) E foliga mai ua mautinoa, o le a fasiotia faamaturo nei molimau lototetele ma maelega. Ae peita‘i, ua toeitiiti oo mai se fesoasoani e le‘i faatalitalia!

12, 13. (a) O le ā le fautuaga na avatu e Kamalielu i ana aumea, ma o le ā na latou faia? (e) Faamata e faapefea ona faalaa ane Ieova mo ona tagata i aso nei, ma o le ā e tatou te mautinoa pe a faatagaina i tatou e “puapuagatia ona o le amiotonu”?

¹² Ua tautala atu Kamalielu, “o se faiaʻoga o le Tulafono e faaaloalogia e tagata uma.” c O lenei faamasino e lē taumatea e faaaloalogia tele e ana aumea, auā na taulamua o ia e “faatonu atu ina ia tuu atu i fafo [aposetolo] mo sina taimi.” (Galu. 5:34) I lona toe ta‘ua o ni faata‘ita‘iga o teteega na tula‘i mai ina ua mavae le maliu o se ta‘ita‘i, na tauanau ai e Kamalielu le faamasinoga e onosa‘i ma faapalepale i le feagai ai ma aposetolo, auā e le‘i leva ona maliu lo latou Ta‘ita‘i o Iesu. Sa finau faatauanau atu Kamalielu e faapea: “Aua tou te aiā i nei tagata, ae tuu ai pea i latou. Auā afai e mai i tagata lenei fuafuaga po o lenei galuega, o le a soloia la; ae afai e mai i le Atua, e lē mafai ona outou soloia, ina neʻi mea ane ua outou fai taua i le Atua.” (Galu. 5:38, 39) Na utagia e faamasino lenei fautuaga. Ae na latou sasaina pea lava aposetolo ma faatonu, “e aua neʻi toe tautatala i le suafa o Iesu.”—Galu. 5:40.

¹³ E faapena fo‘i aso nei, e ono faaaogā e Ieova ni tagata taualoa e pei o Kamalielu, e faalaa ane mo Ona tagata. (Faata. 21:1) E mafai ona faaaogā e Ieova lona agaga e uuna‘ia ai ta‘ita‘i malolosi, faamasino, po o le ‘aufaitulafono, e gaoioi e talafeagai ma lona finagalo. (Nee. 2:4-8) Peita‘i, afai e na te faatagaina i tatou e “puapuagatia ona o le amiotonu,” e tatou te mautinoa i mea nei e lua. (1 Pete. 3:14) Muamua, e mafai ona tuuina mai e Ieova le malosi e tumau ai. (1 Kori. 10:13) Ma lona lua, ‘e lē mafai ona soloia’ e tagata tetee le galuega a le Atua.—Isa. 54:17.

14, 15. (a) Na faapefea ona tali atu aposetolo ina ua sasaina i latou, ma aiseā? (e) Faamatala se mea na tupu e faaalia ai na tumau ma le olioli tagata o Ieova.

¹⁴ Pe na avea le sasaina o le ‘auaposetolo ma mea e lotovaivai ai, ma faavaivaia ai lo latou filigā? E matuā leai lava! Na latou “ō ese . . . mai i luma o le Faamasinoga Sili, ua olioli.” (Galu. 5:41) “Olioli”—aiseā? E mautinoa e lē ona o tigā ina ua sasaina. Ae na olioli i latou ona ua iloa, na sauāina ona o le tumau i le faamaoni iā Ieova, ma le mulimuli i tulagāaao o lo latou Faaa‘oa‘o Sili, o Iesu.—Mata. 5:11, 12.

¹⁵ I le pei o o tatou uso i le ulua‘i senituri, e tumau lo tatou olioli pe a mafatia ona o le tala lelei. (1 Pete. 4:12-14) O le mea moni, e tatou te lē manana‘o e avea ma taula‘iga o faamata‘uga, sauāga, po o le faafalepuipuiina. Ae e mafai ona matuā faamalieina i tatou, pe a tumau i le faamaoni. O se faaa‘oa‘oga, o Henry Dornik, o lē na onosaia faiga sauā ogaoga i lalo o pulega faatautalatasi. Ua faapea mai o ia, iā Aokuso 1944, na filifili ai ē e pule e auina atu o ia ma lona uso i se nofoaga o faasalaga mamafa. Na faapea mai tagata tetee: “E matuā lē mafai lava ona tauanau i latou e faia so o se mea. E olioli i latou e tusa lava pe faamaturoina.” Ua faamatala e le uso o Dornik e faapea: “E ui e lē o iai so‘u faanaunauga e faamaturoina a‘u, ae o o‘u puapuaga ma le lototele, ma le to‘afimālie  ona o lo‘u faamaoni iā Ieova, na ou olioli ai.”—Iako. 1:2-4.

16. Na faapefea ona faaalia e le ‘auaposetolo le maumaua‘i e avatu se molimau māe‘ae‘a, ma e faapefea ona tatou mulimuli i le auala na tala‘i ai aposetolo?

¹⁶ E le‘i toe faama‘imauina e aposetolo se taimi, ae amata loa ona tala‘i. Sa faaauau “i aso uma lava . . . i le malumalu ma mai i lea fale i lea fale,” la latou galuega o le ‘folafola atu o le tala lelei e uiga i le Keriso.’ d (Galu. 5:42) Na maumaua‘i nei tagata tala‘i maelega e avatu se molimau māe‘ae‘a. Mātau, na latou avatu le fe‘au i aiga o tagata, e pei ona faatonuina ai e Iesu Keriso. (Mata. 10:7, 11-14) E lē taumatea, o le auala lenā na faatumuina ai Ierusalema i a latou a‘oa‘oga. Ua lauiloa Molimau a Ieova i aso nei i le mulimuli i le auala na tala‘i ai aposetolo. O le asiasi atu i fale ta‘itasi i la tatou oganuu, ua faaalia manino ai, e tatou te manana‘o fo‘i ia molimau māe‘ae‘a atu i ē uma e maua le avanoa e faalogo ai i le tala lelei. Po ua faamanuia e Ieova la tatou faiva mai i lea fale i lea fale? Ioe, ua ia faia faapea! E faitau miliona ua tali lelei mai i le fe‘au o le Malo i lenei taimi o le i‘uga, ma e to‘atele fo‘i na mua‘i faalogo i le tala lelei, ina ua afea e se Molimau lo latou fale.

17-19. O le ā le faafitauli ua tula‘i mai, ma o le ā le faatonuga na avatu e le ‘auaposetolo ina ia fo‘ia ai?

¹⁷ Ua fesaga‘i nei lenei faapotopotoga fou, ma se lamatiaga iloagatā e faamata‘uina ai. O le ā lenā lamatiaga? O le to‘atele o soo ua uma ona papatisoina, na asiasi atu i Ierusalema ma manana‘o e a‘oa‘o atili nisi mea, a o le‘i fo‘i atu i o latou aiga. O soo na nonofo i Ierusalema, na foa‘i atu ma le lotomalilie tupe e faatau ai mea‘ai ma isi mea na mana‘omia. (Galu. 2:44-46; 4:34-37) I le taimi lea, ua tula‘i mai ai se faafitauli. E le‘i ‘faaaofia fafine ua oti a latou tane’ e tautatala i le gagana Eleni, “i mea na tufatufaina i aso fai soo.” (Galu. 6:1) Ae peita‘i, na aofia ai na o fafine ua oti a latou tane, e tautatala  i le gagana Eperu. O le faafitauli la, e foliga mai o le faailoga tagata. E iai isi mataupu e ono tula‘i mai ai ni fevaevaea‘iga nai lo o lenei.

¹⁸ O aposetolo, ua avea o le vaega pule a le faapotopotoga ua faato‘ateleina, na latou iloa e lē tatau ona “tuua le afioga a le Atua ae tufatufa atu meaʻai.” (Galu. 6:2) Ina ia fo‘ia lenei faafitauli, na latou faatonuina ai soo ia sa‘ili ni tane agavaa se to‘afitu, ua “tutumu i le agaga ma le atamai,” ina ia tofia e aposetolo e faia lenei “galuega tāua.” (Galu. 6:3) Sa mana‘omia ni tane agavaa, ona e foliga mai, o lenei galuega e lē gata e aofia ai le tufatufaina atu o mea‘ai, a o le faasoaina fo‘i o tupe, le faatauina o mea e mana‘omia, ma le tausia lelei o faamaumauga. O tane uma na filifilia, e iai o latou igoa Eleni, atonu ina ia taliagofie ai i latou e fafine ua feita. Ina ua uma ona iloiloina ma le faaeteete ma le tatalo le filifiliga na faia, na tofia ai loa e aposetolo nei tane e to‘afitu e vaaia lenei “galuega tāua.” e

¹⁹ Po o le tufatufaina atu o mea‘ai, na tuusa‘oloto ai nei tane e to‘afitu mai i le faia o lo latou tiute o le folafola atu o le tala lelei? E matuā leai lava! Sa aofia i tane na filifilia Setefano, o lē na faamaonia o ia lava o se molimau malosi ma le lototele. (Galu. 6:8-10) O Filipo fo‘i, o se tasi o le to‘afitu, na ta‘ua o le “faievagelia.” (Galu. 21:8) E aliali mai la, o nei tane e to‘afitu, na faaauau ona avea o ni tagata tala‘i maelega o le Malo.

20. E faapefea i tagata o le Atua i aso nei ona mulimuli i le faaa‘oa‘oga a le ‘auaposetolo?

²⁰ O loo mulimuli tagata o Ieova i aso nei i le faaa‘oa‘oga na faataatia e le ‘auaposetolo.  O tane ua tofia atu i ai tiute tauave i le faapotopotoga, e tatau ona faaalia le atamai o le Atua ma ia faamaonia atu, o loo galue le agaga paia iā i latou. I le ta‘ita‘iga a le Vaega Pule, e tofia ai tane ua ausia agavaa faaleagaga, e avea ma toeaina po o ni auauna o le faiva i faapotopotoga. f (1 Timo. 3:1-9, 12, 13) O i latou ua ausia agavaa, e mafai ona faapea atu, ua tofia e le agaga paia. O nei tane galulue mamafa, e vaavaaia le tele o “galuega tāua.” O se faaa‘oa‘oga, e ono faamaopoopo e toeaina se fesoasoani mo tagata matutua faamaoni e iai moni mana‘oga faapitoa. (Iako. 1:27) O loo feagai nisi toeaina ma le fausiaina o Maota mo Sauniga, faamaopoopo tauaofiaga ma fonotaga, po o le galulue foʻi ma sui o le Komiti o Mataupu Tau Falema‘i i la outou vaipanoa. E anoanoa‘i tiute o loo feagai ma auauna o le faiva a le faapotopotoga, e lē o aofia ai asiasiga faaleoleo mamoe ma le a‘oa‘o atu. E tatau ona paleni tiute tauave a tane agavaa uma ma le faapotopotoga, ma tiute tauave faaleaiga, ma le matafaioi ua tofia mai e le Atua, e tala‘i le tala lelei o le Malo.—1 Kori. 9:16.

21, 22. O le ā e faaalia ai na faamanuia e Ieova le faapotopotoga fou?

²¹ Ona o le fesoasoani a Ieova, na faasaoina ai le faapotopotoga fou i sauāga mai i fafo, ma fevaevaea‘iga ona o faafitauli mai totonu o le faapotopotoga. E mautinoa le faamanuiaga a Ieova auā ua ta‘u mai iā i tatou: “Ua tupu pea le afioga a le Atua, ma ua matuā faatoʻateleina pea soo i Ierusalema; e toʻatele foʻi ositaulaga ua usiusitaʻi i le faatuatua.” (Galu. 6:7) E na o se tasi lenei o lipoti i le aga‘iga‘i luma o le faapotopotoga, mai i le tele o lipoti o loo maua i le tusi o Galuega. (Galu. 9:31; 12:24; 16:5; 19:20; 28:31) I aso nei, pe e lē faalaeiauina ai ea i tatou i le faalogo atu i lipoti, i le aga‘iga‘i i luma o le galuega tala‘i o le Malo i isi vaipanoa o le lalolagi?

²² I tuā i le ulua‘i senituri T.A., e le‘i faavaivai ta‘ita‘i lotu ua lilivau. Ua amata ona fotua‘i mai sauāga eseese. Ma e le‘i pine, ae oo loa sauāga ogaoga iā Setefano, e pei ona o le a tatou iloa i le mataupu e sosoo mai.