1-3. O le ā le faaaliga na vaaia e Peteru, ma aiseā e mana‘omia ai ona tatou malamalama i lona tāua?

 O LE tausaga e 36 T.A. A o tatalo Peteru i le falealuga o se fale e latalata i le sami i le taulaga o Iopa, na ia lagona le māfanafana o le susulu mai o le lā i le tau e afu ai mea. O loo avea o ia ma mālō a lenei aiga mo ni nai aso. O lona lotomalie e nofo ai i inā, na iloa ai lona uiga o le lē faailoga tagata. O lē e ona le fale e suafa iā Simona, e saunia pa‘u o manu, ma e lē o tagata Iutaia uma e fia nonofo faatasi ma se tagata faapena. a Peita‘i, o le a a‘oa‘oina e Peteru se lesona tāua e faatatau i le lē faailoga tagata o Ieova.

² A o tatalo Peteru, na ia vaaia ai se faaaliga i se mea e ono faate‘ia ai so o se tagata Iutaia. O se mea e pei o se ‘ie lino telē o loo tuutuu ifo mai le lagi, o loo iai ni manu e lē mamā e tusa ma le Tulafono. Na ta‘u mai iā Peteru e fasi ma ‘ai, ae na tali atu Peteru: “Ou te leʻi ʻai lava i se mea ua leaga ma lē mamā.” E lē faatasi ae faatolu ona ta‘u mai iā Peteru: “Aua e te toe taʻua e leaga mea ua faamamāina e le Atua.” (Galu. 10:14-16) O lenei vaaiga na lē mautonu ai Peteru, ae e lē mo se taimi umi.

³ O le ā le uiga o le faaaliga na vaaia e Peteru? E tāua lo tatou malamalama i le uiga o lenei mea, auā o le aano o lenei faaaliga, o loo iai le upu moni tāua i le auala e silasila ai Ieova i tagata. I le avea o ni Kerisiano moni, e lē mafai ona tatou avatu se molimau māe‘ae‘a e uiga i le Malo o le Atua, se‘i vaganā ua tatou vāai i tagata e pei o le silasila a le Atua. Ina ia malamalama i le uiga o le faaaliga iā Peteru, se‘i o tatou iloiloina mea mata‘ina o loo aofia ai.

4, 5. O ai Konelio, ma o le ā na tupu a o tatalo o ia?

⁴ E le‘i iloa e Peteru, o le aso na faato‘ā mavae atu, sa vaaia ai fo‘i e se  tamāloa e suafa iā Konelio i Kaisareia e tusa ma le 30 maila [50 km] i le itu i mātū, se faaaliga mai i le Atua. O Konelio, o le ta‘ita‘i o le to‘a 100 o ‘autau a Roma, ma o se tagata e ‘tapuaʻi i le Atua.’ b O ia fo‘i o se tamā sa fai ma faaa‘oa‘oga lelei, auā “sa tapuaʻi faatasi o ia ma lona aiga atoa i le Atua.” O Konelio e lē o se tagata liulotu Iutaia; a o se tagata o Nuu Ese e le‘i peritomeina. Peita‘i, na ia faaalia le alofa i tagata Iutaia o loo mana‘omia le fesoasoani, e ala i le foa‘i atu i ai o meaalofa. Na “tatalo atu e lē aunoa i le Atua” lenei tamāloa faamaoni.—Galu. 10:2.

⁵ A o tatalo Konelio pe tusa o le itula e 3:00 i le afiafi, na ia vaaia ai se faaaliga, o se agelu na ta‘u mai iā te ia: “Ua oo atu au tatalo ma au meaalofa i luma o le Atua, ma ua ia manatuaina.” (Galu. 10:4) E pei ona faatonuina e le agelu, na aauina atu e Konelio ni tamāloloa e aami le aposetolo o Peteru. Ona o se tagata o Nuu Ese e le‘i peritomeina, o le a oo iā te ia se mea e le‘i tupu muamua. Ua toeitiiti ona ia talia lea o le fe‘au o le faaolataga.

6, 7. (a) Faamatala se mea na tupu e iloa ai, e talia e le Atua tatalo a ē lotofaamaoni e fia iloa le upu moni e uiga iā te ia. (e) O le ā sa tatou faai‘uga e fai ona o na mea na tutupu?

⁶ Pe e talia e le Atua tatalo a tagata lotofaamaoni i aso nei o loo manana‘o e fia iloa le mea moni e uiga iā te ia? Se‘i mafaufau i le mea na tupu. Na talia e se fafine i Alapania se kopi o Le Olomatamata o loo iai se mataupu e uiga i le tausia a‘e o fanau. c Sa ia faapea atu i le Molimau sa asiasi atu iā te ia: “Pe e te talitonu sa ou tatalo i le Atua e fesoasoani mai i le tausia a‘e o la‘u fanau teine? A o lea ua ia auina mai oe! Ua e tuuina mai faamatalaga tonu o loo o‘u mana‘omia!” Sa amata ona su‘esu‘e le Tusi Paia e le fafine ma lana fanau teine, ma mulimuli ane auai ma lana tane.

⁷ Pe e na o le pau lenā o se faata‘ita‘iga?  E leai! O nei mea na tutupu, o loo ta‘ua soo i le lalolagi atoa—ma e lē mafai la ona faapea atu o se mea na te‘i lava ua tupu. O le ā la sa tatou faai‘uga? Muamua, e talia e Ieova tatalo a ē lotofaamaoni o loo sa‘ili atu iā te ia. (1 Tu. 8:41-43; Sala. 65:2) O lona lua, o loo lagolagoina e agelu la tatou galuega tala‘i.—Faaa. 14:6, 7.

8, 9. O le ā na faailoa atu e le agaga iā Peteru, ma na faapefea ona ia tali mai?

⁸ A o iai pea i le falealuga, sa “popole le loto o Peteru” e uiga i le faaaliga, ae taunuu atu loa avefe‘au a Konelio. (Galu. 10:17) Po o le a lotomalie Peteru e ō ma nei tamāloloa i le fale o se tagata o Nuu Ese, a o lea na ia faafiti faatolu e lē ‘ai i ni mea‘ai e manatu iai e lē mamā, e tusa ai ma le Tulafono? O le agaga paia na faaalia maia le finagalo o le Atua i lenei mataupu. Sa ta‘u atu iā Peteru: “Faauta! e toʻatolu ni tamāloloa o loo saʻili iā te oe. O lea, ia e tulaʻi ma alu ifo i lalo ma ō ma i latou, aua e te masalosalo auā ua ou aauina atu i latou.” (Galu. 10:19, 20) O le faaaliga e pei o se ‘ie lino lea na vaaia e Peteru, e lē masalomia na sauniunia ai o ia e lolo atu i le ta‘ita‘iga a le agaga paia.

⁹ Ina ua iloa e Peteru o le faatonuga a le Atua na auina atu ai nei avefe‘au mai iā Konelio, na ia valaaulia loa e ō atu i le fale “ma talimālō iā i latou.” (Galu. 10:23a) Na faia e lenei aposetolo usiusita‘i ni fetuutuuna‘iga e tusa ma faatulagaga fou, mo le faataunuuina o le finagalo o le Atua.

10. E faapefea ona ta‘ita‘ia e Ieova ona tagata, ma o ā fesili e ao ona tatou fesili ifo ai iā i tatou lava?

¹⁰ O loo faaauau pea ona ta‘ita‘ia e Ieova ona tagata e oo mai i aso nei. (Faata. 4:18) E ala i lona agaga paia, ua ia ta‘ita‘ia ai le “pologa faamaoni ma le faautauta.” (Mata. 24:45) I nisi taimi, atonu e tatou te vaaia ai ni faamaninoga i lo tatou malamalamaga i le Afioga a le Atua, po o le suia o nisi o faatulagaga a le faalapotopotoga. E lelei ona fesili ifo iā i tatou lava: ‘E faapefea ona ou tali atu i nei faamalamalamaga fou? Pe ou te usita‘ia le ta‘ita‘iga a le agaga o le Atua i nei mataupu?’

11, 12. O le ā na faia e Peteru ina ua taunuu atu i Kaisareia, ma o le ā na ia a‘oa‘oina?

¹¹ I le aso ina ua mavae le faaaliga iā Peteru, na ō atu ai o ia i Kaisareia ma isi e to‘aiva—o avefe‘au e to‘atolu na aauina atu e Konelio, ma “uso [Iutaia] e to‘aono” mai i Iopa. (Galu. 11:12) A o faatalitali iā Peteru, na faapotopoto e Konelio “lona ʻauaiga ma ana uō mamae”—o i latou uma o tagata o Nuu Ese. (Galu. 10:24) Ina ua taunuu atu, sa faia ai e Peteru se mea e le‘i mafaufau muamua lava iai o le a tupu: Ua ulu atu o ia i le fale o le tagata o Nuu Ese e le‘i peritomeina! Sa faamatala atu e Peteru: “Ua outou iloa lelei e sā i le tulafono, ona faifaimea faatasi pe asiasi atu se Iutaia i se tagata o se isi atunuu. Ae ui i lea, ua faailoa mai e le Atua iā te aʻu, e lē tatau ona ou taʻua se tasi e  leaga pe e lē mamā.” (Galu. 10:28) E oo mai i le taimi lea, ua malamalama Peteru o le faaaliga na ia maua na fuafua ina ia a‘oa‘oina ai e ia se lesona, e lē gata e lē faatapulaaina mea‘ai e ‘ai ai se tasi, ae e lē tatau fo‘i ona “ta‘ua se tasi [e oo lava i tagata o Nuu Ese] e leaga.”

¹² Sa matuā faatalitali ma le fiafia tagata uma i mea o le a fai atu ai Peteru. Na faamatala atu e Konelio: “Ua matou iai uma i inei i luma o le Atua, ina ia faalogologo i mea uma na poloaʻi atu ai Ieova iā te oe e te fai mai ai.” (Galu. 10:33) Se‘i manatu i ni ou lagona pe a e faalogo atu i ni upu faapena mai i se tagata fiafia! Ona faapea atu lea o Peteru: “O lea la ua ou malamalama nei, e lē faailoga tagata le Atua, ae o lē e mataʻu iā te ia i nuu uma lava ma faia le mea ua tonu, e talia e ia.” (Galu. 10:34, 35) Ua malamalama Peteru o le silasila a le Atua i tagata e lē fuaina i lanu, ituaiga, po o nisi mea e vaaia. Sa faaauau ona molimau atu Peteru e uiga i le faiva, le maliu, ma le toetū o Iesu.

13, 14. (a) O le ā le mea mata‘ina e uiga i le faaliliuina o Konelio ma isi o Nuu Ese i le 36 T.A.? (e) Aiseā e lē tatau ai ona faamasino tagata e faavae i o latou foliga vaaia?

¹³ Na tupu se mea e le‘i faatalitalia: “A o talanoa atu pea Peteru,” ona liligi ifo ai lea o le agaga paia i luga o “tagata o nuu ese.” (Galu. 10:44, 45) E na o le pau lenei o le taimi o loo ta‘ua ai i le Tusi Paia le liligi ifo o le agaga paia a o le‘i papatisoina. I le iloaina e Peteru, o le faailoga lea o le faamaoniga a le Atua, ona ia “faatonuina loa lea [o lenā vaega o tagata o Nuu Ese] ina ia papatisoina i latou.” (Galu. 10:48) O le liliuina o nei tagata o Nuu Ese i le 36 T.A., na faailogaina ai le mutaaga o le avea o tagata Iutaia ma nuu faapitoa. (Tani. 9:24-27) I le avea o Peteru ma sē e ta‘imua i le molimau atu, sa ia faaaogāina ai le “ki [lona tolu] o le Malo.” (Mata. 16:19) O lenei ki ua tatala ai le avanoa mo tagata o Nuu Ese e le‘i peritomeina, e avea ma Kerisiano faauuina e le agaga.

¹⁴ O le avea ma ē e folafola le Malo i aso nei, ua tatou iloa ai “e lē faailoga tagata le Atua.” (Roma 2:11) O lona finagalo “ia faaolaina ituaiga uma o tagata.” (1 Timo. 2:4) E lē tatau la ona tatou faamasinoina tagata ona o o latou foliga vaaia. O la tatou galuega o le avatu o se molimau māe‘ae‘a e faatatau i le Malo o le Atua, e aofia ai le tala‘i atu i tagata uma, e tusa lava po o ā lanu, ituaiga, foliga vaaia, po o talaaga faalotu.

15, 16. Aiseā na finau atu ai nisi o Kerisiano Iutaia iā Peteru, ma na faapefea ona ia faamatala atu ana gaoioiga?

¹⁵ E mautinoa le naunau o Peteru e ta‘u atu le mea na tupu, ona ia alu atu ai lea i Ierusalema. Ae e foliga mai, na muamua oo atu le tala ua ‘talia le Afioga a le Atua’ e tagata o Nuu Ese ae e le‘i oo atu Peteru. Ina ua taunuu atu Peteru, “ona faitio atu lea iā te ia o ē lagolagoina le peritome.” Ua lē malilie i latou talu ai ua alu o ia “i le fale o tagata e lē peritomeina ma aai faatasi ma i latou.” (Galu. 11:1-3) O le finauga, e lē ona o le lē manana‘o e avea tagata o  Nuu Ese ma soo o Iesu. Nai lo o lea, na manana‘o nei soo Iutaia ia usita‘ia e tagata o Nuu Ese le Tulafono—e aofia ai ma le peritome—ina ia talia ai la latou tapua‘iga iā Ieova. E manino mai, o loo faafaigatā ona tuuesea e nisi o soo Iutaia le Tulafono a Mose.

¹⁶ Na faapefea ona faamatala atu e Peteru ana gaoioiga? E tusa ai ma le Galuega 11:4-16, sa ia toe ta‘ua ni faamaoniga se fā o le ta‘ita‘iga faalelagi: (1) o le faaaliga na ia maua mai i le Atua (Fuaiupu 4-10); (2) o le faatonuga a le agaga (Fuaiupu 11, 12); (3) o le asiasiga a le agelu iā Konelio (Fuaiupu 13, 14); ma (4) o le liligiina ifo o le agaga paia i tagata o Nuu Ese. (Fuaiupu 15, 16) Na faai‘u le lauga a Peteru i se fesili faalaeiau: “O le mea lea, afai ua foaʻi mai e le Atua iā i latou [tagata o Nuu Ese ua talitonu] le meaalofa foaʻifua [le agaga paia], lea foʻi na ia foaʻi mai iā i tatou [tagata Iutaia] o ē talitonu i le Alii o Iesu Keriso, o ai la aʻu ou te taofia ai le Atua?”—Galu. 11:17.

17, 18. (a) O le ā le tofotofoga na tula‘i mai i Kerisiano Iutaia ona o le molimau a Peteru? (e) Aiseā ua avea ai ma lu‘i le tausia pea o le autasi o le faapotopotoga, ma o ā fesili e lelei ona tatou fesili ifo ai?

¹⁷ O le molimau a Peteru ua tofotofoina ai manatu o Kerisiano Iutaia. Po o le a tuuesea o latou uiga faailoga tagata, ma talia uso fou faato‘ā papatiso o tagata o Nuu Ese o ni o latou uso Kerisiano? Ua faailoa mai iā i tatou e faapea: “Ina ua latou [aposetolo ma isi Kerisiano Iutaia] faalogo i nei mea, ona latou lē toe finau atu lea, ae ua latou faamamaluina le Atua e faapea: ‘E manino mai, ua tuuina atu foʻi e le Atua le avanoa i tagata o nuu ese e salamō ai, ina ia maua ai e i latou le ola.’” (Galu. 11:18) O lenā uiga mautinoa na tumau ai le autasi o le faapotopotoga.

¹⁸ O le tausia o le autasi i aso nei o se lu‘i, ona o tagata tapua‘i moni e ō mai “i atunuu uma, ma ituaiga, ma nuu, ma gagana.” (Faaa. 7:9) O lea, ua tatou maua ai i le tele o faapotopotoga tagata mai i lanu, aganuu, ma talaaga eseese. E lelei ona tatou fesili ifo: ‘Po ua ou lia‘i ese mai i lo‘u loto ni uiga o le  faailoga lanu? Po ua ou filifili e aua lava ne‘i avea uiga faatavā o lenei lalolagi, e aofia ai le lotonuu, faailoga ituaiga, mimita ona o aganuu ma le faailoga lanu, e taa‘ina ai le auala ou te feagai ai ma o‘u uso Kerisiano?’ Ia manatua le mea na tupu iā Peteru (Kefa) i ni nai tausaga mulimuli ane ina ua mavae le faaliliuina o le ulua‘i tagata o Nuu Ese. Na lolo atu o ia i le faailoga tagata o isi, ma “vavaeesea o ia” mai Kerisiano o Nuu Ese, ma na a‘oa‘ia ai o ia e Paulo. (Kala. 2:11-14) Se‘i leoleoina pea i tatou mai le mailei o le faailoga tagata.

19. O ai na tala‘i i ai Kerisiano Iutaia i Anetioka, ma o le ā le i‘uga?

¹⁹ Pe na amata ona tala‘i soo o Iesu i tagata o Nuu Ese e le‘i peritomeina? Mātau le mea na tupu mulimuli ane i Anetioka i Suria. d O lenei aai, e to‘atele tagata Iutaia e nonofo ai, ae sa lē tele ni feeseesea‘iga i le vā o tagata Iutaia ma tagata o Nuu Ese. O lea sa faigofie ai ona tala‘i atu i tagata o Nuu Ese i Anetioka. O i inei na amata ai ona tala‘ia e nisi soo Iutaia le tala lelei “i tagata e tautatala i le gagana Eleni.” (Galu. 11:20) Na faia lenei tala‘iga e lē na o tagata e tautatala i le gagana Eleni, ae faapea fo‘i tagata o Nuu Ese e le‘i peritomeina. Sa faamanuia e Ieova le galuega, ma “e to‘atele na talitonu.”—Galu. 11:21.

20, 21. Na faapefea ona faaalia e Panapa le faaaloalo, ma e faapefea fo‘i ona tatou faaalia lenei faaaloalo a o faataunuuina la tatou faiva?

²⁰ Ina ia tala‘i atu i tagata o loo fia faalogo, na auina atu ai Panapa i Anetioka e le faapotopotoga i Ierusalema. Ona o le to‘atele o tagata fiafia, sa lē mafai ai ona faia na o ia lea galuega. E leai se tasi e sili ona talafeagai e fesoasoani atu iā te ia nai lo o Saulo, o lē na avea ma aposetolo o nuu ese? (Galu. 9:15; Roma 1:5) Pe na vaai Panapa iā Saulo o sē e faatavā? E leai, sa faaalia e Panapa le faaaloalo tatau. Na tausolomua o ia e alu atu i Taso, e sa‘ili iā Saulo, ma toe aumai o ia e fesoasoani i Anetioka. Na la galulue faatasi mo se tausaga ina ia atia‘e soo i le faapotopotoga i inā.—Galu. 11:22-26a.

²¹ E faapefea ona tatou faaalia le faaaloalo i le faataunuuina o la tatou faiva? O lenei uiga e aofia ai le iloa o mea e gata mai ai lo tatou mafai. O i tatou uma lava e eseese malosi ma tomai. O se faaa‘oa‘oga, o nisi e lelei tele i le molimau lē fuafuaina po o le talaʻi mai i lea fale i lea fale, ae faigatā ona fai toe asiga ma amata su‘esu‘ega faale-Tusi Paia. Afai e te mana‘o e faaleleia ni vala o lau auaunaga, aiseā e te lē talosaga atu ai mo se fesoasoani? O le faia faapea, o le a e fua tele mai ai, ma e matuā olioli ai i lau faiva.—1 Kori. 9:26.

22, 23. Na faapefea ona faaalia e uso i Anetioka lo latou alofa faaleuso, ma ua faapefea ona faia faapea e tagata o le Atua i aso nei?

²² O Anetioka, na “faatoʻā taʻua ai soo o Kerisiano, e ala i le taʻitaʻiga a le Atua.” (Galu. 11:26e) O lenā igoa ua faamaonia e le Atua, ua faamatala ai ma  le sa‘o i latou o loo ola i se olaga e pei o Keriso. A o avea tagata o Nuu Ese ma Kerisiano, pe sa iai se faiā faaleuso i le va o tagata Iutaia ma tagata talitonu o Nuu Ese? Manatu i le mea na tupu pe tusa o le 46 T.A., ina ua oo mai se oge tele. e I aso anamua, sa matuā aafia tagata matitiva pe a oo mai oge, o i latou ia e le‘i teuina ni tupe ma e leai fo‘i ni mea‘ai faaleoleo. I le taimi o le oge, sa mana‘omia ai e Kerisiano matitiva sa nonofo i Iutaia ni mea‘ai. Ina ua iloa e faatatau i le mana‘oga, na aauina atu ai e uso i Anetioka, faapea Kerisiano o Nuu Ese, “se fesoasoani i uso” i Iutaia. (Galu. 11:29) Ma‘eu le faaalia o le alofa moni faaleuso!

²³ E leai lava se eseesega ma tagata o le Atua i aso nei. Pe a tatou iloa ua mafatia o tatou uso i se isi atunuu, po o lo tatou lava vaipanoa, e tatou te aapa atu ma le lotomalilie e fesoasoani iā i latou. E vave lava ona faamaopoopo e Komiti o Lālā ni Komiti o Fesoasoani mo Mala e vaavaaia o tatou uso atonu o loo aafia i mala faalenatura, e aofia ai afā malolosi, mafui‘e, ma sunami. O na taumafaiga uma e avatu ni fesoasoani, e faaalia ai lo tatou alofa moni faaleuso.—Ioa. 13:34, 35; 1 Ioa. 3:17.

24. E faapefea ona faaalia ua tatou malamalama i le uiga o le faaaliga na vaaia e Peteru?

²⁴ I le avea ai ma Kerisiano moni, e tatau ona tatou malamalama i le uiga o le faaaliga na vaaia e Peteru i le falealuga i Iopa, i le uluaʻi senituri. O loo tatou tapua‘i i se Atua e lē faailoga tagata. O lona finagalo ia tatou avatu se molimau māe‘ae‘a e uiga i lona Malo, e aofia ai le tala‘i atu i isi e tusa lava po o le ā le lanu, le atunuu e tupuga mai ai, po o le tulaga i le vā fealoa‘i. Ia tatou maumaua‘i e avatu iā i latou uma o le a faalogo se avanoa e talia ai le tala lelei.—Roma 10:11-13.