1-3. Aiseā na malaga atu ai Paulo i Korinito, ma o ā faigatā na fesagaʻi ma ia?

 I LE taufaaiʻuiʻuga o le 50 T.A., na iai Paulo i Korinito, le nofoaga autū o fefaatauaʻiga o loo nonofo ai le toʻatele o tagata Eleni, Roma ma Iutaia. a E leʻi malaga atu Paulo i inā e faatau atu ni oloa, pe e saʻilia foʻi se galuega totogi. Nai lo o lenā, na ia malaga atu i Korinito mo se mea e sili atu ona tāua—ia molimau atu e faatatau i le Malo o le Atua. Peitaʻi, sa manaʻomia e Paulo se mea e nofo ai, ma na maumauaʻi e aua neʻi avea o ia ma avega mamafa i isi. E leʻi manaʻo o ia e manatu tagata, o loo ia faaaogā le afioga a le Atua e suʻe ai mea e ola ai. O le ā o le a ia faia?

² Na iā Paulo se tomai faapitoa, o le fai faleʻie. E leʻi faigofie le faia o faleʻie, ae na tauivi pea e faia galuega e tausia ai o ia. Po o le a maua sana galuega i lenei aai pisi? Po o le a ia maua se nofoaga lelei e nofo ai? E ui lava ina fesagaʻi ma nei faigatā, ae sa leʻi tuulafoaʻia ai e Paulo lana faiva.

³ E pei ona aliaʻi mai, sa nofo Paulo i Korinito mo se taimi, ma na matuā taulau manuia lana faiva i inā. O le ā e tatou te aʻoaʻoina mai i gaoioiga na faia e Paulo i Korinito, e fesoasoani ai iā i tatou e avatu se molimau māeʻaeʻa e faatatau i le malo o le Atua i la tatou oganuu?

4, 5. (a) O fea na nofo ai Paulo a o iai i Korinito, ma o le ā lana galuega totogi sa fai? (e) Na faapefea ona avea Paulo ma fai faleʻie?

⁴ I se taimi mulimuli ane talu ona taunuu Paulo i Korinito, na feiloaʻi ai o ia ma se ulugalii talimālō—o se tagata Iutaia e igoa iā Akula ma lana avā o Pisila. Na siitia atu lenei ulugalii i Korinito ona o le faatonuga mai i le Emeperoa o Kalaotio, “ina ia ō ese tagata Iutaia uma mai i Roma.” (Galu. 18:1, 2) Na talileleia e Akula ma Pisila Paulo, e lē gata ina ia latou nonofo faatasi i lo la fale, ae ia latou galulue faatasi foʻi. E tatou te faitau ai e faapea: Na nofo Paulo “i lo la fale, ma ua latou galulue  faatasi auā e tutusa a latou galuega, o ni tagata fai faleʻie.” (Galu. 18:3) Sa avea le fale o lenei ulugalii agalelei ma talimālō, ma nofoaga e faamautū iai Paulo i le taimi o lana faiva i Korinito. A o nofo o ia faatasi ma Akula ma Pisila, atonu sa tusia ai e Paulo ni tusi, na mulimuli ane avea ma vaega o le kanona o le Tusi Paia. b

⁵ Na faapefea ona avea Paulo o sē na ʻaʻoaʻoina e Kamalielu,’ ae na avea foʻi ma sē e fai faleʻie? (Galu. 22:3) E leʻi manatu faatauvaa tagata Iutaia o le uluaʻi senituri, i le aʻoaʻoina o a latou fanau i ni tomai faapitoa, atonu na maua foʻi e nisi o na tamaiti ni aʻoaʻoga faaopoopo. Ona e sau mai i Taso i Kilikia, o se nofoaga e taʻutaʻua i le gaosia o le ʻie e taʻu o le cilicium, lea e fai mai ai faleʻie, atonu la na aʻoaʻoina ai e Paulo lenei matātā a o talavou. O le ā e aofia ai i le faia o faleʻie? O lenei galuega e aofia ai le lalagaina o le ʻie, po o le tipiina ma suʻi o filo mātuatua ma malō, ina ia mafai ona fai ai le faleʻie. Po o le ā lava le tulaga, ae o se galuega faigatā.

6, 7. (a) O le ā le manatu o Paulo i le galuega o le fai faleʻie, ma na faapefea ona tutusa lona manatu ma Akula ma Pisila? (e) E faapefea ona mulimuli Kerisiano i aso nei i le faaaʻoaʻoga a Paulo, Akula ma Pisila?

⁶ E leʻi manatu Paulo e avea le fai faleʻie o sana galuega tumau. Na ia galue i lenei galuega ina ia tausia ai o ia i lana faiva, o le faalauiloa atu o le tala lelei “e aunoa ma se totogi.” (2 Kori. 11:7) O le ā le vaaiga a Akula ma Pisila i la laʻua galuega totogi? Ona o ni Kerisiano, e mautinoa na tutusa o laʻua manatu ma Paulo. Ina ua tuua e Paulo Korinito i le 52 T.A., na faapena foʻi ona tuua e Akula ma Pisila lo la fale e fai ai sauniga a le  faapotopotoga, ae mulimuli atu iā te ia i Efeso. (1 Kori. 16:19) Mulimuli ane, na toe foʻi atu i laʻua i Roma, ma agaʻi atu ai i Efeso. Na faamuamua e lenei ulugalii maelega manaʻoga o le Malo, ma lotomalilie e faaaogā lo la malosi e auauna atu ai i isi, ma ua talisapaia ai i laʻua e “faapotopotoga uma i nuu ese.”—Roma 16:3-5; 2 Timo. 4:19.

⁷ E mulimuli Kerisiano i aso nei i faaaʻoaʻoga a Paulo, Akula ma Pisila. O faifeʻau maelega i aso nei, e galulue mamafa “ina ia aua neʻi faatigāina” nisi. (1 Tesa. 2:9) E avatu le faamālō i le toʻatele o i latou o loo auauna faataimi atoa i le faalauiloaina o le Malo, pe e galulue faavaitaimi ina ia lagolagoina la latou galuega autū, o le faiva faa-Kerisiano. I le pei o Akula ma Pisila, e toʻatele auauna a Ieova ua faaalia le talimālō, e ala i le faaavanoaina o o latou fale mo ovasia matagaluega. Ua iloa e i latou o loo “faaalia le agaga talimālō,” le faalaeiau ma le atiaʻe ai ona o lo latou faia faapea.—Roma 12:13.

8, 9. Na faapefea ona tali atu Paulo ina ua teena e tagata Iutaia lana molimau malosi, ma o fea na toe alu atu e talaʻi ai?

⁸ Sa manatu Paulo i lana galuega totogi ua na o se fesoasoani i lana faiva, ma na manino mai lenā mea ina ua taunuu ane Sila ma Timoteo mai i Maketonia ma le tele o meaalofa. (2 Kori. 11:9) Na amata loa ona “matuā tinoū Paulo e talaʻi atu le upu.” (Galu. 18:5) Peitaʻi, o lenei talaʻiga malosi i tagata Iutaia, na faapogaia ai ni teteega matuiā. Ina ia aua neʻi taʻusalaina Paulo ona o lo latou mumusu e talia le feʻau faasaoola e uiga iā Keriso, sa lūlū atu e Paulo lona ofu tele ma taʻu atu i tagata tetee Iutaia: “Ia i luga o o outou ulu lo outou toto. Ua mamā aʻu. E amata atu nei ona ou alu i tagata o nuu ese.”—Galu. 18:6; Eseki. 3:18, 19.

⁹ O fea nei la o le a talaʻi i ai Paulo? O le tamāloa e igoa iā Titi Iuso atonu o se Iutaia liulotu, e tuaoi lona fale ma le sunako, ma sa faaavanoa atu lona fale iā Paulo. Ona tuua loa lea e Paulo le sunako, ae alu atu i le fale o Iuso. (Galu. 18:7) Sa avea pea le fale o Akula ma Pisila ma nofoaga o Paulo a o iai i Korinito, a ua avea le fale o Iuso ma nofoaga autū e faamaopoopo ai le galuega talaʻi a le aposetolo.

10. O le ā e faaalia ai e leʻi manatu Paulo e talaʻi atu na o tagata o nuu ese?

¹⁰ Po o le uiga o le faamatalaga a Paulo o le a alu atu i tagata o nuu ese, o le a lē toe uaʻi atu lava i tagata Iutaia uma ma Iutaia e liulotu, e oo foʻi iā i latou o loo tali lelei mai? E lē o le tulaga lenā. Mo se faaaʻoaʻoga, o “Kiripo le pule o le sunako, ua talitonu o ia i le Alii, atoa foʻi ma lona aiga uma.” E mautinoa, e toʻatele nisi na galulue faatasi ma Kiripo i le sunako na aufaatasi ma ia, auā ua faapea mai le Tusi Paia: “E toʻatele foʻi tagata i Korinito o ē na faalogo i le feʻau, ua talitonu ma papatisoina i latou.” (Galu. 18:8) O lea, na avea ai le fale o Titi Iuso ma nofoaga na feiloaʻi ai le faapotopotoga fou o Kerisiano i Korinito. Afai na tusia le tusi o Galuega i le auala e masani ai Luka—o le faasolosolo lelei o taimi o lona uiga la, o le faaliliuina o tagata Iutaia po o tagata liulotu i le lotu Iutaia, na tupu ina ua uma ona lūlū atu le ofu tele o Paulo. O le mea na tupu, e faaalia ai le nofosauni o Paulo e fetuutuunaʻi ina ia talafeagai ma tulaga o mea.

11. E faapefea i Molimau a Ieova i aso nei ona faataʻitaʻi iā Paulo, a o talaʻi atu i tagata e faapea mai o Kerisiano?

¹¹ I le tele o atunuu i aso nei, o lotu e faapea mai o Kerisiano, e maopoopo lelei ma e malolosi a latou taaʻiga i a latou tagata lotu. O le tele o isi atunuu ma atumotu, ua faia ai e misionare o nei lotu e faapea mai o Kerisiano, le galuega tele o le faaliliuina o tagata. O le toʻatele o nei tagata, e masani ona piimau atu pea i tū ma aganuu e pei ona sa faia e tagata Iutaia i le uluaʻi senituri i Korinito. E ui i lea, i le pei o Paulo, e ao iā i tatou o Molimau a Ieova, ona saʻilia ma le maelega na tagata ma fesoasoani i ai ia faateleina lo latou  malamalama i le Tusi Paia. E tusa lava pe e latou te tetee mai iā i tatou, pe e sauāina i tatou e o latou taʻitaʻi lotu, ae o le a lē mou atu ai lo tatou faamoemoe. E toʻatele nisi e “maelega i le Atua ae e lē tusa ai ma le poto saʻo,” ma e ono aofia ai iā i latou na, nisi e agamalu e manaʻomia ona saʻilia ma maua.—Roma 10:2.

12. O le ā na faamautinoa atu e lenei faaaliga iā Paulo?

¹² Pe ana faapea e taumasalosalo Paulo i le faaauauina o lana faiva i Korinito, atonu la na mou ese atu lenā masalosalo i le pō na faaali atu ai iā te ia le Alii o Iesu i se faaaliga, ma faapea atu: “Aua e te fefe, ae ia tautala atu pea ma aua le mapu e talaʻi, auā ou te faatasi ma oe ma e leai se tagata e faia se mea leaga e te manuʻa ai; auā e toʻatele oʻu tagata i lenei aai.” (Galu. 18:9, 10) Maʻeu se faalaeiauga o lenei faaaliga! Na faamautinoa atu e le Alii lava ia iā Paulo, o le a leoleoina o ia ina neʻi faia e se tagata se mea leaga e manuʻa ai, ma e maua i le aai le toʻatele o tagata ua tatau i ai le feʻau. Na faapefea ona tali atu Paulo i lenei faaaliga? Ua tatou faitau ai e faapea: “Ona nofo ai lea o ia i inā mo le tausaga ma masina e ono, ua aʻoaʻo atu iā i latou le afioga a le Atua.”—Galu. 18:11.

13. O le ā se mea na tupu atonu na mafaufau i ai Paulo a o agaʻi atu i le nofoa faamasino, ae o le ā le māfuaaga na ia faatalitalia ai se iʻuga e ese mai?

¹³ Pe tusa o le tausaga talu ona iai Paulo i Korinito, na ia maua ai se isi faamaoniga o le lagolagosua a le Alii. “Ua lotogatasi tagata Iutaia e tetee atu iā Paulo, ma taʻitaʻi atu o ia i luma o le nofoa faamasino” e taʻua o le beʹma. (Galu. 18:12) Ua manatu nisi, o lenei nofoa o se pulelaa maualuga e faia i le maamora lanu moana ma paʻepaʻe, e teuteuina i ata ua vaneina, ma atonu na tū lenei pulelaa e latalata i le ogatotonu o le maketi i Korinito. O le malae i luma o lenei pulelaa, e ofi ai se aofia e toʻatele. I mea na maua e le ʻau eli palapala, e taʻu mai ai o lenei nofoa faamasino e lē mamao ese mai le sunako, o  lona uiga la, e lē mamao foʻi la mai i le fale o Titi Iuso. A o latalata atu Paulo i le beʹma, atonu na mafaufau o ia i le fetogiina o Setefano i maa, lea e taʻua i nisi o taimi o le uluaʻi Kerisiano na faamaturoina. O le taimi lenā a o iloa Paulo i lona igoa o Saulo, ma na ioe foʻi o ia ʻi le fasiotiga o Setefano.’ (Galu. 8:1) Po o le a tupu foʻi lenā mea iā Paulo? E leai, auā ua uma ona folafola atu i ai: “E leai se tagata e faia se mea leaga e te manuʻa ai.”—Galu. 18:10.

14, 15. (a) O ā moliaga na faia e tagata Iutaia faasaga iā Paulo, ma aiseā na faalēaogā ai e Kaliona na moliaga? (e) O le ā na tupu iā Sosene, ma o le ā atonu na oo iā te ia talu ai na mea?

¹⁴ O le ā na tupu ina ua taunuu atu Paulo i le nofoa faamasino? O le faamasino sa nofoia le nofoa, o le suikonesula o Akaia, o lona suafa o Kaliona—o le uso matua o le faifilosofia a Roma o Seneca. Sa folasia mai e tagata Iutaia a latou moliaga faasaga iā Paulo e faapea: “Ua faatalitonu e lenei tamāloa tagata ina ia tapuaʻi i le Atua, i se auala e lē tusa ma le tulafono.” (Galu. 18:13) Ua faapea mai tagata Iutaia, e lē faaletulafono le faaliulotuina e Paulo o tagata. Peitaʻi, ua iloa e Kaliona, e leai se “mea sesē” po o se “mea leaga” na faia e Paulo. (Galu. 18:14) E leʻi manaʻo Kaliona e aafia fua o ia i feeseeseaʻiga a tagata Iutaia. O lea, a o leʻi amata ona faia se faamatalaga a Paulo e puipuia ai o ia, ae ua faalēaogā e Kaliona moliaga! Na matuā feita ē na moliaina o ia. Na faataunuu iā Sosene lo latou ita, o sē atonu na suitulaga iā Kiripo le pule o le sunako. Na latou puʻe iā Sosene “ma sasa iā te ia i luma o le nofoa faamasino.”—Galu. 18:17.

¹⁵ Aiseā na lē taofia ai e Kaliona le sasaina o Sosene? Atonu na manatu Kaliona o Sosene o le taʻitaʻi o ē na tetee iā Paulo, ma ua tatau la i ai lenā faasalaga. E tusa pe e saʻo pe e sesē lenā manatu, ae atonu o le mea na tupu, na iʻu ai i ni iʻuga lelei. I lana uluaʻi tusi i le faapotopotoga i Korinito, lea na tusia i ni tausaga mulimuli ane, na taʻua ai e Paulo Sosene o se uso. (1 Kori. 1:1, 2) Po o Sosene lava lenei e tasi na sasaina i Korinito? Afai o lea, atonu na fesoasoani mea tigā na tutupu iā Sosene e avea ai ma Kerisiano.

16. O le ā se aafiaga i la tatou faiva o fetalaiga a le Alii, “ia tautala atu pea ma aua le mapu e talaʻi, auā ou te faatasi ma oe”?

¹⁶ Manatua, ina ua teena e tagata Iutaia le talaʻiga a Paulo, na faamautinoa atu e le Alii o Iesu: “Aua e te fefe, ae ia tautala atu pea ma aua le mapu e talaʻi, auā ou te faatasi ma oe.” (Galu. 18:9, 10) E tatau ona tatou manatua na upu, aemaise lava pe a teena la tatou feʻau. Aua lava neʻi galo, e silafia e Ieova loto ma tosina mai tagata lotofaamaoni iā te ia. (1 Samu. 16:7; Ioa. 6:44) Maʻeu le faalaeiauina ai o i tatou i lenā mea, ina ia pisi ai pea i le faiva! I tausaga taʻitasi, e tusa ma le tolu selau afe i latou e papatisoina—e tusa lea ma le valu selau i aso taʻitasi. O i latou e utagia le faatonuga “ia outou ō atu e fai tagata o nuu uma lava ma soo,” ua faamautinoa mai e Iesu: “Ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.”—Mata. 28:19, 20.

17, 18. O le ā atonu sa toe mafaufau i ai Paulo a o folau atu i Efeso?

¹⁷ E lē o mautinoa po o le uiga na faaalia e Kaliona i tagata na molia Paulo, na iʻu ai i se vaitaimi filemu mo le faapotopotoga Kerisiano fou i Korinito. Peitaʻi, sa nofo pea Paulo mo “aso e tele,” ona faatoʻā faamavae atu ai lea i ona uso i Korinito. I le tau e totogo ai mea i le 52 T.A., na tuuvaa atu ai i Suria mai i le taulaga o Kenikerea, e tusa ma le fitu maila [11 km] i le itu i sasaʻe o Korinito. A o leʻi tuua e Paulo Kenikerea, na ia “ʻoti faapupuu lona ulu . . . ona o se tautoga na ia faia.” c (Galu. 18:18) Mulimuli ane, ona ia ave lea o Akula ma Pisila ma latou folau atu i le sami o Ainea i Efeso ma Asia Itiiti.

¹⁸ A o folau atu Paulo mai i Kenikerea, atonu sa toe manatunatu i le taimi a o iai i Korinito. E tele mea mananaia na ia manatua lea na matuā olioli tele ai. E tele iʻuga lelei na maua mai i le 18 masina o lana faiva i inā. Na faatūina le uluaʻi faapotopotoga i Korinito, ma ua avea le fale o Iuso o se nofoaga e feiloaʻi ai. E aofia ai iā i latou ua talitonu, o Iuso, Kiripo ma lona aiga ma isi e toʻatele. Na pele iā Paulo tagata talitonu fou na ia fesoasoani i ai e avea ma Kerisiano. Mulimuli ane, na tusi atu Paulo ma faamatala atu, ua avea i latou o ni tusi e taʻuleleia ua tusia i lona loto. E oo foʻi iā i tatou lenā faalogona o le tosina vavalalata atu iā i latou na tatou fesoasoani i ai e talia le tapuaʻiga moni. Maʻeu le faamalieina i le vaai atu iā i latou, ua avea moni o ni “tusi e taʻuleleia”!—2 Kori. 3:1-3.

19, 20. O le ā na faia e Paulo ina ua taunuu i Efeso, ma o le ā e tatou te aʻoaʻoina mai iā te ia i le tuliloaina o sini faaleagaga?

¹⁹ Ina ua taunuu atu i Efeso, na amata loa le galuega a Paulo. Na “alu atu i le sunako ma fefulifulisaʻi ai ma tagata Iutaia.” (Galu. 18:19) E leʻi umi se taimi na nofo ai Paulo i Efeso i lana malaga lenei. E ui ina sa talosaga atu i ai e nofo mo se taimi umi, “ae e leʻi manaʻo ai o ia.” Ina ua latou faamavae, na ia taʻu atu i tagata Efeso: “Ou te toe foʻi mai iā te outou pe a finagalo i ai Ieova.” (Galu. 18:20, 21) E mautinoa na ia iloa e tele se talaʻiga e tatau ona fai i Efeso. Na fuafua le aposetolo e toe foʻi mai, ae na ia filifili e tuu na mataupu i aao o Ieova. Pe e lē o se faaaʻoaʻoga lelei ea lenā e tatau ona tatou manatua pea? I le tuliloaina o sini faaleagaga, e tatau ona tatou tausolomua e fai. Peitaʻi, e tatau lava ona tatou faamoemoe i le taʻitaʻiga a Ieova, ma gaoioi ina ia ōgatusa ma lona finagalo.—Iako. 4:15.

²⁰ Na tuua Akula ma Pisila i Efeso, ae folau Paulo agaʻi atu i Kaisareia. Na vave ona ia “alu aʻe” i Ierusalema, ina ia feiloaʻi ma le faapotopotoga i inā. (Galu. 18:22; fpl.) Ona agaʻi atu ai lea o Paulo i lona nofoaga autū—i Anetioka i Suria. Na taulau manuia lana faigāmalaga faamisionare lona lua. O le ā o faatalitalia mai mo ia i lana malaga faamisionare mulimuli?