1, 2. O ā aafiaga e leʻi faatalitalia i le uluaʻi senituri, talu ai le taumafai o nisi e taofia le talaʻi atu o le tala lelei?

 UA MATUĀ faateteleina sauāga, ma ua amata ona “soona sauā” Saulo i le faapotopotoga, o se faaupuga i le uluaʻi gagana ua faamatalaina ai ni sauāga ogaoga. (Galu. 8:3) Na sosola le ʻausoo, ma e foliga mai ua iloa e nisi e lē o toe umi ona faataunuu lea o le sini o Saulo, o le soloia atoatoa o le faa-Kerisiano. Peitaʻi, e iai se mea e leʻi faatalitalia na tupu talu ai le faataapeapeina o Kerisiano. O le ā lenā mea?

² O i latou na faataapeapeina, ua amata ona “folafola atu le tala lelei o le afioga a le Atua” i nuu na sosola atu i ai. (Galu. 8:4) Seʻi mafaufau! E lē gata e leʻi taulau ona taofia le tala lelei ona o sauāga, ae na avea lenā tulaga ma auala na salalau atili atu ai le feʻau! O le faataapeapeina o le ʻausoo e ē na sauāina i latou, ua atili salalau atu ai le galuega talaʻi o le Malo i atunuu mamao. E pei ona o le a tatou vāai i ai, e iai se mea faapena o loo tupu i o tatou aso.

3. (a) O ai Filipo? (e) Aiseā na lē oo atu ai le galuega talaʻi i Samaria, ae o le ā le mea na valoia e Iesu o le a tupu i lenā oganuu?

³ O Filipo, o se tasi o le vaega “o i latou ua faataapeapeina.” a (Galu. 8:4; tagaʻi i le pusa “ O Filipo ʻle Faievagelia.’”) Na alu atu o ia i Samaria, o se aai e leʻi oo lava i ai le galuega talaʻi, talu ai sa faatonu e Iesu le ʻauaposetolo i se tasi o taimi: “Aua foʻi le ō atu i so o se aai o Samaria. Ae ia ō atu pea i mamoe ua leiloloa o le aiga o Isaraelu.” (Mata. 10:5, 6) Ae na silafia e Iesu e iai le taimi o le a oo atu ai le molimau māeʻaeʻa i Samaria, auā a o leʻi afio aʻe o ia i le lagi na ia fetalai: “O le a fai outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.”—Galu. 1:8.

4. Na faapefea ona tali atu tagata Samaria i le talaʻiga a Filipo, ma o le ā le mea moni na fesoasoani i la latou tali mai?

 ⁴ Na iloa e Filipo, o Samaria “ua matua mo le seleselega.” (Ioa. 4:35) O lana feʻau, sa avea o se vai mālū iā i latou o loo nonofo ai i inā ma sa faigofie lava ona iloa le pogai, ona e leai ni feutagaʻiga a Iutaia ma Samaria, auā o le toʻatele o tagata Iutaia sa ʻinoʻino iā i latou. Ae i le tuufaafeagai, na iloa e tagata Samaria e lē faailoga tagata i latou o loo talaʻia le tala lelei, ma e eseese mamao ma le ʻau Faresaio manatu faapito. E ala i le molimau maelega ma le lē faailoga tagata i tagata Samaria, na faaalia ai e Filipo e lē o aafia o ia i faiga faailoga lanu, ma le lē vaai faatauvaa iā i latou. E lē o se mea la e faateʻia ai, ona sa faalogo “ma le lotogatasi” lenei motu o tagata Samaria iā Filipo.—Galu. 8:6.

5-7. Aumai ni faaaʻoaʻoga pe na faapefea ona avea le faataapeapeina o Kerisiano, ma mea na iʻu ai i le salalau atu o le tala lelei.

⁵ I aso nei, e ui i le sauāina o tagata o le Atua, ae e lē o mafai ona taofia ai la latou talaʻiga e pei lava o le uluaʻi senituri. O le mea moni, o le tele o taimi e ave faamalosi ai Kerisiano mai i lea nofoaga i lea nofoaga—a lē o le tuuina atu i falepuipui, po o le avatu faamalosi i isi atunuu—ma ua fesoasoani lenā i le faaooina atu o le feʻau o le Malo i tagata o na oganuu fou. O se faataʻitaʻiga, i le vaitaimi o le Taua Lona Lua a le Lalolagi, sa mafai e Molimau a  Ieova ona avatu se molimau mataʻina i nofoaga o faasalaga a Nazi. Na faapea mai se tagata Iutaia na feiloaʻi ma Molimau i inā: “O le tumau faamaoni o pagota Molimau a Ieova, na ou talitonu ai e faavae lo latou faatuatua i le Tusi Paia, ma na iʻu ina avea ai aʻu ma Molimau a Ieova.”

⁶ I nisi tulaga, e oo lava iā i latou na faia sauāga, na oo atu i ai se molimau ma latou taliaina. O se faaaʻoaʻoga, ina ua siitia atu se Molimau e suafa iā Franz Desch i le nofoaga o faasalaga i Gusen, i Oseteria, sa mafai ona la suʻesuʻe i le Tusi Paia ma se leoleo Siamani. Seʻi manatu i lo la olioli ina ua mavae ni tausaga mulimuli ane, na la toe feiloaʻi ai i se tauaofiaga a Molimau a Ieova, ma ua avea i laʻua uma o ni ē e folafola le tala lelei!

⁷ E faapena foʻi se mea na tupu ina ua sauāina Kerisiano, ma sosola ai mai i le tasi atunuu i le isi atunuu. Mo se faataʻitaʻiga, i vaitausaga o le 1970, na avatu ai se molimau sili i Mozambique, ina ua faamalosia Molimau i Malawi e sosola ese mai i inā. E ui ina aliaʻi mai ni teteega mulimuli ane i Mozambique, ae na faaauau pea le galuega talaʻi. Na faapea mai Francisco Coana: “O le mea moni, e ui ina taofia ma puʻeina faapagota i matou i nisi o taimi ona o la matou galuega talaʻi, ae pe a toʻatele nisi e tali lelei mai i le tala lelei o le Malo, ua matou mautinoa ai, o loo fesoasoani mai le Atua iā i matou e pei ona ia fesoasoani i Kerisiano i le uluaʻi senituri.”

8. O ā aafiaga i le galuega talaʻi, ona o suiga faapolotiki ma le tamaoaiga?

⁸ O le mea moni, e lē na o sauāga le māfuaaga o le faatuputeleina o le Faa-Kerisiano i nisi vaipanoa. Ona o suiga o faiga faapolotiki ma le tamaoaiga i le faitau sefulu o tausaga ua mavae, na maua ai foʻi avanoa e faasalalau atu ai le feʻau o le Malo i tagata i le tele o gagana ma atunuu eseese. O isi e mai atunuu o loo aafia i fetauaʻiga ma le lē lelei o le tamaoaiga, ua sosola atu i atunuu o loo saogalemu, ma amata ona suʻesuʻe le Tusi Paia i mea ua latou nonofo ai. O le lolofi mai o tagata sulufaʻi, ua amata ai nisi oganuu fou e tautatala i isi gagana. Po o e taumafai e talaʻi atu i tagata “mai i atunuu uma, ma ituaiga, ma nuu, ma gagana” i lau oganuu?—Faaa. 7:9.

9. O ai Simona, ma o le ā moni le mea na tosina atu ai o ia iā Filipo?

⁹ Sa faia e Filipo le tele o faailoga i Samaria. O se faaaʻoaʻoga, na ia faamālōlō i latou e lē atoatoa le malosi ma tutuli ese agaga leaga. (Galu. 8:6-8) Sa iai se tasi tamāloa na matuā maofa ona o meaalofa faavavega na maua e Filipo. O ia o Simona, o se faataulāitu, o se tasi e faaaloalogia e tagata ma ua latou faapea mai: “O loo i lenei tagata le mana tele o le Atua.” Ua vaaitino nei Simona i le moni o le mana o le Atua, e pei ona faaalia i vavega na faia e Filipo, ma ua oo ina talitonu ai o ia. (Galu. 8:9-13) Mulimuli ane, na tofotofoina ai faanaunauga o Simona. E faapefea?

10. (a) O ā mea na faia e Peteru ma Ioane i Samaria? (e) O le ā le mea na fai e Simona ina ua vaai atu ua maua e soo fou le agaga paia, ina ua faaee i ai lima o Peteru ma Ioane?

 ¹⁰ Ina ua iloa e aposetolo ua tupu tele le galuega talaʻi i Samaria, ona latou aauina atu lea o Peteru ma Ioane i inā. (Tagaʻi i le pusa “ Ua Faaaogā e Peteru ʻKi o le Malo.’”) Ina ua taunuu i laʻua, na faaee atu ai e nei aposetolo o la lima i luga o soo fou, ma maua ai e i latou taʻitoʻatasi le agaga paia. b Ina ua vaai Simona i lenei mea ua tupu, ona ofo ai lea o ia ma faapea atu: “Ia aumai foʻi iā te aʻu lenā pule, ina ia maua ai e se tasi e faaee i ai oʻu lima le agaga paia.” Sa ofo atu e Simona tupe iā i laʻua, ma le faamoemoe e faatau mai ai lenei meaalofa mai i le Atua!—Galu. 8:14-19.

11. O le ā le apoapoaʻiga a Peteru na fai atu iā Simona, ma o le ā lana tali mai?

¹¹ Na matuā maumauaʻi Peteru i lana tali iā Simona. “Ia fano au siliva faatasi ma oe, auā ua e manatu e mafai ona e maua le meaalofa foaʻifua a le Atua i tupe. E leai sau vaega po o sou tofi i lenei mea, auā e lē tonu lou loto i le silafaga a le Atua.” Ona uunaʻia lea e Peteru ia Simona ina ia salamō ma tatalo mo le faamagaloga. Na faapea atu Peteru: “Ia faatoga atu iā Ieova, ina ia faamagalo oe pe afai e mafai, ona o manatunatuga leaga o lou loto.” O le mea moni, o Simona e lē o se tagata leaga; na manaʻo o ia e fai le mea ua tonu ae ua faasesēina o ia i lenā taimi. Sa ia ʻaiʻoi atu i aposetolo: “Ia oulua faatoga atu iā Ieova mo aʻu, ina ia aua neʻi oo mai iā te aʻu se tasi o mea ua oulua fai mai ai.”—Galu. 8:20-24.

12. O le ā le “faasimona,” ma ua faapefea ona faamaonia o se mailei i lotu Kerisiano ua fulitua i le upu moni?

 ¹² O le aʻoaʻiga na avatu e Peteru iā Simona, ua lapataʻia ai Kerisiano i aso nei. O le mea moni, o le upu faa-Peretania o le “faasimona,” na māfua mai ona o lenei mea na tupu. O le “faasimona,” e faasino atu i le faatau mai ma le faatau atu o tulaga i tupe, aemaise lava i tofi faalotu. Ua tumu le talafaasolopito o lotu Kerisiano o ē ua fulitua i le upu moni, i nei faiga inosia. Ua mātaulia i le lomiga lona iva o le The Encyclopædia Britannica (1878) e faapea: “O se suʻesuʻega sa faia i le talafaasolopito o le fono faalilolilo a katinale Katoliko, lea e filifilia mai ai le pope, na faatalitonuina ai tagata aʻoga e faapea, e leai lava se palota a le lotu sa faia e aunoa ma le aafia ai o le faasimona, e pei lava ona iai i le tele o mea na fai. O fono e filifilia ai pope, ua matuā aliali manino mai ai le faasimona, o ni faiga e sili atu ona leaga ma matagā.”

13. O ā vala e tatau ona puipuia ai se Kerisiano mai i le faasimona?

¹³ E tatau ona puipuia Kerisiano mai i le agasala o le faasimona. Mo se faaaʻoaʻoga, e lē tatau ona latou taumafai e foaʻi atu ni meaalofa i ni auala faatogafalea, ina ia maua ai ni tofi i le faapotopotoga. Ae i le isi itu, o i latou e manatu o loo i tulaga e avatua faaeaga, e ao ona faaeteete i le faaalia o le faaituʻau iā i latou e mauoloa i le faapotopotoga. O nei gaoioiga uma e aofia i le faasimona. O le mea moni, o auauna uma a Ieova e tatau ona manatu iā i latou o ni “tagata faatauvaa,” ma faatalitali i le agaga o Ieova e faia filifiliga mo faaeaga i le auaunaga. (Luka 9:48) E leai se avanoa i le faalapotopotoga a le Atua mo i latou e taumafai e ʻsaʻili lo latou lava mamalu.’—Faata. 25:27.

14, 15. (a) O ai le “eunuka Aitiope,” ma na faapefea ona maua e Filipo? (e) Na faapefea ona tali mai le tamāloa Aitiope i le feʻau a Filipo, ma aiseā na avea ai lona papatisoga e lē o se gaoioiga na faia faafuaseʻi? (Tagaʻi i le faamatalaga pito i lalo.)

¹⁴ Ua faatonuina nei e le agelu a Ieova Filipo e malaga atu i le auala mai i Ierusalema i Kasa. O ni fesili sa i le mafaufau o Filipo i le māfuaaga e alu atu ai i inā, na vave ona taliina ina ua la feiloaʻi ma le eunuka Aitiope, o lē sa  “faitau leotele le tusi a le perofeta o Isaia.” (Tagaʻi i le pusa “ Se ʻEunuka’ i le ā le Uiga?”) Na uunaʻia e le agaga paia o Ieova Filipo e faalatalata atu i le kariota a le tamāloa. Na fesili atu o ia i le Aitiope a o tamoʻe i autafa o lana kariota. “Po o e malamalama i mea o loo e faitauina?” A ua tali mai o ia, “E faapefea ona ou malamalama pe a lē faasino mai e se tasi iā te aʻu?”—Galu. 8:26-31.

¹⁵ Na valaaulia e le Aitiope Filipo e la te tiʻetiʻe i lana kariota. Seʻi mafaufau i se talanoaga fiafia! O le mataupu e faatatau i “mamoe” po o “auauna” i le valoaga a Isaia, ua leva ona avea o se mea lilo. (Isa. 53:1-12) A o la faimalaga, na faamatala atu e Filipo i le eunuka Aitiope, o lenei valoaga na faataunuuina iā Iesu Keriso. I le pei o i latou na papatiso i le Penetekoso o le 33 T.A., na vave ona iloa e le Aitiope—o lē ua uma ona liliu i le lotu a Iutaia—le mea e tatau ona ia faia. Na fai atu o ia iā Filipo, “Faauta! O le vai; o le ā se mea e taofia ai aʻu mai i le papatisoina?” E leʻi toe faatali Filipo ae papatiso loa le Aitiope! c (Tagaʻi i le pusa “ Papatisoga ʻi le Vai.’”) Ina ua mavae lenā, na taʻitaʻiina atu loa e le agaga Filipo i lona tofiga fou i Asetota, ina ia faaauau ai ona talaʻi le tala lelei.—Galu. 8:32-40.

16, 17. Ua faapefea ona aafia agelu i le galuega talaʻi i aso nei?

¹⁶ Ua faaeaina Kerisiano i aso nei e auai i le galuega sa faia e Filipo. E masani ona latou maua avanoa e molimau lē fuafuaina atu ai, le feʻau o le Malo pe a faimalaga. I le tele o taimi, e latou te feiloaʻi ai ma nisi e faaalia le lotofiafia. E tatau ona faatalitalia lenei mea, talu ai ua taʻua manino i le Tusi Paia, o loo taʻitaʻia le galuega talaʻi e agelu ina ia oo atu lenei feʻau i “atunuu uma, ma ituaiga uma, ma gagana uma, ma tagata uma.” (Faaa. 14:6) O le taʻitaʻiga a agelu i le galuega  talaʻi, o le mea moni lenā na valoia e Iesu. I lana faataoto e uiga i saito ma vao leaga, na fetalai Iesu, o le taimi o le seleselega—le taufaaiʻuiʻuga o faiga o mea a le lalolagi—“o ē e selesele, o agelu ia.” Na fetalai atili o ia, o nei meafaiola agaga, e “latou te ao ese mai i lona Malo, o mea uma e māfua ai ona tausuai, ma tagata e solitulafono.” (Mata. 13:37-41) I le taimi e tasi, e aoaoina mai e agelu ia suli o le Malo o le lagi—ma mulimuli ane “o se motu o tagata e toʻatele” o “isi mamoe”—o ē e finagalo Ieova e aumai i lana faalapotopotoga.—Faaa. 7:9; Ioa. 6:44, 65; 10:16.

¹⁷ O se faamaoniga o lenei mea, ua faapea mai nisi e tatou te feiloaʻi i ai i le faiva, sa latou tatalo i le Atua mo se fesoasoani. Seʻi manatu i se mea na tupu i ni tagata talaʻi o le Malo sa ō atu faatasi ma se tamaitiiti. I le faaiʻuga o le galuega i le taeao, na manatu ai Molimau e toʻalua ua tatau ona lava le talaʻiga, ae sa naunau lava le tamaitiiti e ō atu i le fale e sosoo ai. Na alu atu le tamaitiiti na o ia ma tuʻituʻi le faitotoʻa! Ina ua tatala mai e se tamaʻitaʻi talavou le faitotoʻa, na faalatalata atu loa Molimau e toʻalua e talanoa iā te ia. Na faateʻia i laʻua ina ua faamatala mai e le teine, e faatoʻā uma lava ona tatalo mo se tasi e asiasi mai iā te ia e fesoasoani ina ia malamalama i le Tusi Paia. Na faatulaga ai loa se suʻesuʻega faale-Tusi Paia!

18. Aiseā e lē tatau ai ona tatou manatu māmā i la tatou faiva?

¹⁸ I le avea o se vaega o le faapotopotoga Kerisiano, ua e maua se faaeaga e galulue faatasi ai ma agelu a o faia le galuega talaʻi i se tulaga aupito sili i aso nei. Aua lava neʻi e manatu māmā i lenei faaeaga. A o e finafinau i au taumafaiga, o le a e maua le olioli a o faaauau ona e folafola “le tala lelei e uiga iā Iesu.”—Galu. 8:35.