1, 2. Aiseā na alu atu ai Paulo i Ierusalema, ma o ā lu‘i o le a feagai ma ia i inā?

 I IERUSALEMA! Ua toe savalia fo‘i e Paulo ona ala vāiti ma le pisi, ma e matuā tumutumu i tagata. E leai se aai o lenei lalolagi e tutusa lona tāua ma lenei aai, i le talafaasolopito o feutagaʻiga a Ieova ma ona tagata. E mitamita le toʻatele o ona tagata i lo latou talaaga mamalu i aso ua mavae. Ua iloa lelei e Paulo, o le toʻatele o Kerisiano ua soona faatuatua i mea na tutupu i aso ua mavae, ma lē taulau ai ona ola e ōgatusa ma fuafuaga aga‘iga‘i i luma a Ieova. E mautinoa na iloa e Paulo e iai se manaʻoga faaleagaga e faaopoopo atu i le manaʻoga faaletino, na uunaʻia ai o ia e faia se filifiliga a o iai i Efeso, e toe asiasi atu i lenei aai tele. (Galu. 19:21) E ui lava e na te iloa e lamatia ai o ia, ae e le‘i suia ai lana faai‘uga.

² O le ā o le a feagai nei ma Paulo i Ierusalema? O se tasi o lu‘i, o le a auala mai i soo o Keriso, o nisi o i latou ua atuatuvale ona o tala taufaaleaga e uiga iā Paulo. O le a auala mai le anoanoaʻi o luʻi mai i fili o Keriso. O le a latou aumaia tuuaʻiga sesē faasaga iā Paulo, sasa ma faamataʻu e fasioti o ia. O nei tulaga ogaoga o le a avatu ai iā Paulo se avanoa e tali atu ai. O le auala na ia taulimaina ai ma le lotomaulalo, lototele ma le faatuatua nei lu‘i, ua aumaia ai se faaa‘oa‘oga lelei mo Kerisiano i aso nei. Se‘i o tatou vāai pe faapefea.

3-5. (a) O le ā le fono na auai atu i ai Paulo i Ierusalema, ma o le ā na talanoaina ai? (e) O ā lesona e tatou te maua mai i le fono a Paulo ma toeaina i Ierusalema?

³ I le aso na sosoo ma le aso na taunuu ai Paulo ma ana aumea i Ierusalema, na latou ō atu ai e faafeiloa‘i toeaina na vaavaaia le faapotopotoga. E lē o ta‘ua i lenei tala ni aposetolo na soifua ai i lenā taimi; atonu na ō atu i latou uma e auauna i nisi vaega o le lalolagi. Peita‘i, sa iai pea Iakopo le uso o Iesu i inā. (Kala. 2:9) E foliga mai na ta‘ita‘ia e Iakopo le fono, a o “iai i inā toeaina uma” faatasi ma Paulo.—Galu. 21:18.

⁴ Na faafeiloaʻia e Paulo toeaina, “ma faamatala auʻiliʻili atu mea ua faia e le Atua i nuu ese e ala i lana talaʻiga.” (Galu. 21:19) Se‘i mafaufau i faalaeiauga na maua e na uso. I aso nei, e tatou te fiafia fo‘i e faalogo atu i le aga‘iga‘i i luma o le galuega i isi atunuu.—Faata. 25:25.

 ⁵ Atonu na ta‘ua e Paulo meaalofa tauofo na ia aumaia mai i Europa. O le manatu mamafa na faaalia e uso mai nofoaga mamao, atonu na faafiafiaina ai loto o le ‘aufaalogologo a Paulo. Ioe, o le tali atu i le faamatalaga a Paulo, ua faapea mai le mau: “Ona latou [toeaina] faamamaluina lea o le Atua”! (Galu. 21:20a) I se tulaga tutusa, o le to‘atele o i latou i aso nei o loo onosaia mala ma ma‘i tigā, e matuā ootia o latou faalogona, pe a ofoina atu le fesoasoani ma upu faalaeiau e o latou uso talitonu.

6. O le ā le faafitauli na iloa e Paulo?

⁶ Ona faailoa atu lea e toeaina iā Paulo, sa iai se faafitauli i Iutaia na aafia totino ai o ia. Ua latou faapea atu: “Lo matou uso e, ua e iloa o loo iai le faitau afe o tagata Iutaia o ē talitonu, ma ua maelega i latou uma i le Tulafono. Ae ua latou faalogo i tala feaveaʻi e uiga iā te oe e faapea, ua e aʻoaʻo tagata Iutaia uma o loo i nuu ese e fulitua iā Mose, ma taʻu atu iā i latou e aua neʻi peritomeina a latou fanau, pe faia foʻi tū masani.” a—Galu. 21:20e, 21.

7, 8. (a) O le ā le malamalamaga sesē na iai i le to‘atele o Kerisiano i Iutaia? (e) Aiseā na lē avea ai mafaufauga sesē o nisi o Kerisiano Iutaia, ma māfuaaga e faapea ai ua latou ­tetee i le upu moni?

⁷ Aiseā e to‘atele ai pea Kerisiano na maelega e tausia le Tulafono a Mose, ae ua silia i le 20 tausaga talu ona soloia? (Kolo. 2:​14) I le 49 T.A., na fono ai aposetolo ma toeaina i Ierusalema, ma auina atu se tusi i faapotopotoga e faamatala atu ai e faapea, e le‘i manana‘o tagata talitonu mai  i nuu ese e peritomeina i latou ma ola i le Tulafono a Mose. (Galu. 15:23-​29) Peita‘i, e le‘i ta‘ua i lenā tusi le to‘atele o tagata Iutaia ua talitonu, o ē e le‘i malamalama ua lē o toe aogā le Tulafono a Mose.

⁸ Pe na avea na mafaufauga sesē ma māfuaaga na lē agavaa ai na tagata Iutaia ua talitonu, e avea ma Kerisiano? E leai. Auā e le‘i faapea na latou tapua‘i muamua i atua faapaupau, a o lea ua toe faaauau ona mulimuli i tū o tapua‘iga faalotu sa iai muamua. O le Tulafono lea sa matuā faatāuaina e tagata Iutaia ua talitonu, e mai iā Ieova. E leai se mea faatemoni pe sesē na iai. Ae o lenā tulafono sa fesoota‘i ma le feagaiga tuai, a o lenei ua ola Kerisiano i le feagaiga fou. O le tausia o le feagaiga o le Tulafono, ua lē o toe aogā mo le tapua‘iga mamā. O Kerisiano Eperu o ē sa maelega i le Tulafono, e le‘i lava le malamalama ma le mautinoa i le faapotopotoga Kerisiano. E tatau ona tutusa o latou manatu ma le aga‘iga‘i pea i luma o le malamalama o le upu moni. b—Iere. 31:31-34; Luka 22:20.

9. O le ā na a‘oa‘o e Paulo e uiga i le Tulafono a Mose?

⁹ Ae faapefea tala feavea‘i e faapea, na a‘oa‘oina e Paulo tagata Iutaia i nuu ese, “e aua neʻi peritomeina a latou fanau, pe faia foʻi tū masani”? O Paulo o le aposetolo o Nuu Ese, ma i lo latou manatu o loo maumaua‘i pea Paulo i le faai‘uga e lē tatau i tagata o Nuu Ese ona usita‘ia le Tulafono.  Sa ia faalialia fo‘i le sesē o so o se tasi o loo taumafai e tauanau so o se tagata o Nuu Ese ua talitonu, ia peritomeina o se faailoga o le usita‘i i le Tulafono a Mose. (Kala. 5:​1-7) Na tala‘ia fo‘i e Paulo le tala lelei i tagata Iutaia i aai uma na ia asiasi i ai. E mautinoa sa ia faamatala atu i ē sa fia faalogo, o le maliu o Iesu ua soloia ai le Tulafono, ma o le amiotonu e maua i le faatuatua ae lē o galuega o le Tulafono.—Roma 2:28, 29; 3:21-26.

10. O le ā le vaaiga paleni a Paulo i mataupu e faatatau i le Tulafono ma le peritome?

¹⁰ E ui i lea, na malamalama lelei Paulo iā i latou na manatu e tatau ona tausia pea nisi tū faa-Iutaia, e pei o le aua le faia ni galuega i le Sapati, pe aua le ‘aina nisi ituaiga o mea‘ai. (Roma 14:​1-6) E na te le‘i faataatia fo‘i ni tulafono e faatatau i le peritome. E moni sa tatau iā Paulo ona peritomeina Timoteo ina ia lē masalosalo ai tagata Iutaia iā Timoteo, ona o lona tamā o le Eleni. (Galu. 16:3) O le peritome, o se filifiliga a le tagata lava ia. Na ta‘u atu e Paulo i tagata Kalatia: “E lē aogā le peritome po o le lē peritome mo i latou e autasi ma Keriso Iesu, ae o le faatuatua e ala i le alofa.” (Kala. 5:6) Peita‘i, afai e peritome ona o le Tulafono pe ina ia maua ai le faamaoniga a Ieova, ua faaalia ai la le leai o se faatuatua.

11. O ā faatonuga na avatu e toeaina iā Paulo, ma o le ā e ono aofia ai i le faataunuuina o lenei mea? (Taga‘i i le faamatalaga pito i lalo.)

¹¹ O lea, e ui i le sesē o tala feavea‘i, ae sa atuatuvale pea nisi tagata Iutaia ua talitonu. O le māfuaaga lenā na avatu ai e toeaina iā Paulo le faatonuga lenei: “E toʻafā tamāloloa ua iā i matou ua faia ni a latou tautoga. Ia ave nei tamāloloa ma faamamāina oe faatasi ma i latou, ma totogi a latou tupe faaalu, ina ia mafai ai ona sele mamā o latou lauulu. Ona iloa ai lea e tagata uma, e sesē tala feaveaʻi ua latou faalogo  i ai e uiga iā te oe, ae ua saʻo lava lau amio ma ua e tausia foʻi le Tulafono.” c—Galu. 21:23, 24.

12. Na faapefea i le tali atu a Paulo, ona faaalia ai le agaga fetuutuuna‘i ma le felagolagoma‘i i fautuaga a toeaina i Ierusalema?

¹² Sa ono mafai ona finau mai Paulo, o le faafitauli e lē ona o tala feavea‘i e uiga iā te ia, ae o le maelega o na Iutaia ua talitonu i le Tulafono a Mose. Na lotomalie o ia e fetuutuuna‘i, ae aua lava ne‘i faagutugutulua i mataupu silisili a le Atua. I le taimi muamua atu na ia tusi ai: “Sa ou faapei o sē e nofo i le tulafono i ē e nonofo i le tulafono, e ui ou te lē o nofo i le tulafono, ina ia maua ai ē e nonofo i le tulafono.” (1 Kori. 9:​20) I lenei mea na tupu, sa felagolagomaʻi ai Paulo ma toeaina i Ierusalema ma foliga mai e pei o sē “o nofo i le tulafono.” O le faia faapea, na ia faataatia ai se faaa‘oa‘oga lelei mo i tatou i aso nei ina ia felagolagomaʻi ma toeaina, ae aua le tausisi e fai mea i la tatou lava auala.

13. (a) Aiseā na faatupu ai e nisi o tagata Iutaia le vavaō i le malumalu? (e) Na faapefea ona lavea‘iina le ola o Paulo?

¹³ E le‘i sologa lelei mea i le malumalu. A o lata ina faai‘uina aso o le tautoga, na vaaia ai e Iutaia mai i Asia Paulo, ma latou tuua‘ia pepelo ai o ia i le aumaia o tagata o Nuu Ese i le malumalu ma faatupu ai le vevesi. Pe ana lē faalaa ane le ta‘ita‘i‘au a Roma, semanū e sasaina ai Paulo ia oti. Na ave e le ta‘ita‘i‘au Roma o ia ma taofia i le falepuipui. E amata mai i lenā aso, na saisaitia ai Paulo mo le fā tausaga. Peita‘i, e le‘i uma ai i lenā taimi lamatiaga o Paulo. Ina ua fesiligia e le ta‘ita‘i‘au tagata Iutaia pe aiseā ua latou osofa‘ia ai Paulo, na latou alalaga mai i nisi tuua‘iga ese. Ona o le vavaō, na lē mafai ai e le ta‘ita‘i‘au ona lagona se mea. Mulimuli ane, na tatau ai ona ta‘ita‘i ese atu Paulo mai i inā. Ina o le a ulu atu Paulo ma fitafita Roma i le nofoaga o fitafita, na faapea atu Paulo i le ta‘ita‘i‘au: “Ou te ʻaiʻoi atu iā te oe, e tuu mai aʻu seʻi oʻu tautala atu i tagata.” (Galu. 21:39) Na faataga e le ta‘ita‘i‘au o ia, ma faaauau ona puipuia ma le lototele e Paulo lona faatuatua.

14, 15. (a) O le ā na faailoa atu e Paulo i tagata Iutaia? (e) O ā laasaga na faia e le ta‘ita‘i‘au a Roma, ina ia iloa ai le māfuaaga o le feita o tagata Iutaia iā Paulo?

¹⁴ Na amata e Paulo i lona faapea atu: “Ia outou faafofoga mai i laʻu tali atu.” (Galu. 22:1) Na tali atu Paulo i le aofia i le gagana Eperu, o lea na fifilemu ai i latou. Na ia faamatala sa‘o atu le māfuaaga ua avea ai nei o ia  ma soo o Keriso. O le faia faapea, sa faailoa atu ai ma le faaeteete e Paulo manatu e mafai ona faamaonia e tagata Iutaia, pe a manana‘o i ai. Sa a‘oa‘oina Paulo i le falea‘oga o le tagata ta‘uta‘ua o Kamalielu, ma sa sauāina e ia soo o Keriso e pei ona iloa e nisi na iai i inā. Ae peita‘i, o lona alu atu i Tamaseko, na ia vaaia ai se faaaliga o le Keriso ua toe faatūina, lea na fetalai atu iā te ia. Na vaaia e i latou na faimalaga faatasi ma Paulo se malamalama pupula ma faalogoina se leo, ae e latou te le‘i malamalama i upu. (Galu. 9:7; 22:​9) Mulimuli ane, na faatauasoina Paulo ona o le faaaliga, o lea na ta‘ita‘i atu ai o ia e lana ‘aumalaga i Tamaseko. O i inā na iai se tagata e igoa iā Anania, o lē sa lauiloa i tagata Iutaia i lenā vaipanoa, na ia toe faapupulaina ai faavavega Paulo.

¹⁵ Na faaauau ona faamatala atu e Paulo, ina ua toe fo‘i atu i Ierusalema, na faaali atu Iesu iā te ia i le malumalu. I lenā taimi, na matuā faate‘ia ai tagata Iutaia ma ua matuā feita ma faapea atu: “Inā fasioti ia lenei tagata, auā e lē tatau ona ola o ia!” (Galu. 22:22) Ina ia lavea‘iina Paulo, na ave ai o ia e le ta‘ita‘i‘au i le nofoaga o fitafita. O le naunau o le ta‘ita‘i‘au e fia iloa le māfuaaga ua feita ai tagata iā Paulo, na ia faatonuina ai Paulo e nofosauni, auā o le a sasaina o ia i le taimi e su‘esu‘e ai. O lea, na faaaogā ai e Paulo se puipuiga faaletulafono e puipuia ai o ia, ma faailoa atu o ia o se tagatānuu o Roma. Ua faaaogā fo‘i e tagata tapua‘i o Ieova i aso nei le puipuiga faaletulafono ua latou maua, ina ia puipuia ai lo latou faatuatua. (Taga‘i i pusa “ Tulafono a Roma ma Tagatānuu o Roma” ma le “ Taua Faaletulafono i Aso Nei”.) Ina ua faalogo le ta‘ita‘i‘au o Paulo o se tagatānuu o Roma, na manatu ai o ia e tatau ona sa‘ili se isi  auala e maua atili mai ai nisi faamatalaga. I le aso na sosoo ai, na ia avatu ai Paulo i luma o le fono faapitoa a le ‘au Saniterini, o le faamasinoga sili a Iutaia.

16, 17. (a) Faamatala le mea na tupu ina ua talanoa atu Paulo i le ‘au Saniterini. (e) O le ā se faaa‘oa‘oga o le lotomaulalo na faataatia e Paulo ina ua pō o ia e se tasi?

¹⁶ Na amata le tali atu a Paulo i luma o le ‘au Saniterini i lona faapea atu: “Alii e, le ʻauuso e, ua ou gaoioi ma se lotofuatiaifo matuā lelei i luma o le Atua, e oo mai lava i le aso nei.” (Galu. 23:1) Ona lē toe fai atu lea o sana faamatalaga. Na faapea mai le mau: “O le mea lea ua faatonuina ai e le ositaulaga sili o Anania ē o loo tutū latalata ane iā Paulo, ina ia pō lona gutu.” (Galu. 23:2) Pagā se faasauā! Pagā se faaaliga o le faaitu‘au o le faamasino ma ta‘ua Paulo o sē e pepelo, ae e le‘i faalogo i se faamatalaga sa‘o. E lētioa a tali atu Paulo: “O oe na le pā ua faapaʻepaʻeina, o le a pō atu le Atua iā te oe. Pe e te nofo ea e faamasino mai iā te aʻu e tusa ai ma le Tulafono, a o lenā e te solia le Tulafono i lou fai mai e pō aʻu?”—Galu. 23:3.

¹⁷ Na faate‘ia nisi o i latou na iai​—⁠e lē o le tagata na pō atu iā Paulo ae ona o le tala a Paulo! Ua latou faapea mai: “Pe e te tautala lē mafaufau ea i le ositaulaga sili a le Atua?” I lana tali, na a‘oa‘o atu ai e Paulo iā i latou se lesona o le lotomaulalo ma le faaaloalo i le Tulafono. Na ia faapea atu: “Le ʻauuso e, ou te leʻi iloa o ia o le ositaulaga sili. Auā ua tusia, ‘Aua e te faia ni tala leaga i se taʻitaʻi o lou nuu.’” d (Galu. 23:​4, 5; Eso. 22:28) E ese le auala lea ua faaaogā nei e Paulo. I le mātauina o loo faia a‘e le ‘au Saniterini i le ‘au Faresaio ma le ‘au Satukaio, na ia faapea atu: “Alii e, ma uso e, o aʻu o le Faresaio, o le atalii o le ʻau Faresaio. Ua faamasinoina aʻu i le faamoemoe o le toetū o ē ua oti.”—Galu. 23:6.

18. Aiseā na ta‘ua ai e Paulo o ia lava o se Faresaio, ma e faapefea ona tatou faaaogā manatu faapena i nisi o tulaga?

¹⁸ Aiseā na ta‘ua ai e Paulo o ia o se Faresaio? Auā o ia “o le atalii o le ʻau Faresaio,” e mai i se aiga e auai i lenā lotu. Peita‘i, e manatu pea le to‘atele  iā te ia o se Faresaio. e E faapefea la ona ta‘ua Paulo o se Faresaio ae e talitonu i le toetū? Ua ta‘ua e faapea, e talitonu le ‘au Faresaio e iai se vaega o le tagata e ola pea pe a oti, ma o agaga o ē e amiotonu, o le a toe ola mai i nisi tino. Ae e le‘i talitonu Paulo i na a‘oa‘oga. Sa talitonu o ia i le toetū e pei ona sa a‘oa‘oina e Iesu. (Ioa. 5:​25-​29) Ae e le‘i ioe Paulo i manatu o le ‘au Faresaio e faapea, e iai se faamoemoe o le ola i tala atu o le oti, ma sa tetee fo‘i i le ‘au Satukaio, o ē e lē talitonu i se olaga i le lumana‘i. E mafai fo‘i ona tatou faaaogā na manatu pe a talanoa ma tagata Katoliko ma tagata Porotesano. E mafai ona faapea atu e tatou te talitonu i le Atua. Peita‘i, e latou te talitonu i le Tolutasi, ae o loo tatou talitonu i le Atua o le Tusi Paia. O lea, e tatou te talitonu faatasi ma i latou, e iai le Atua.

19. Aiseā na vaeluaina ai le fono a le ‘au Saniterini?

¹⁹ O le faamatalaga a Paulo na vaeluaina ai le ‘au Saniterini. Ua faapea mai le mau: “Ona matuā vāvāō ai lea o tagata, ma ua matuā finau atu nisi o le ʻautusiupu o le vaega a le ʻau Faresaio e faapea: ‘E matou te leʻi maua se mea sesē ua faia e lenei tagata, ae afai ua tautala mai se agaga, po o se agelu iā te ia​—.’” (Galu. 23:9) O le faaupuga e faapea atonu na tautala atu se agelu iā Paulo, sa matuā lē taliaina e le ‘au Satukaio o ē e lē talitonu i agelu! (Taga‘i i le pusa “ Le ‘Au Satukaio ma le ‘Au Faresaio.”) Na matuā tele le vavaō, o lea, na toe lavea‘i ai fo‘i e le ta‘ita‘i‘au a Roma le aposetolo. (Galu. 23:10) Peita‘i, sa lamatia pea le ola o Paulo. O le ā le mea ua tupu nei i le aposetolo? O le a tatou iloa atili i le mataupu o sosoo mai.