Uso Pele e:

Seʻi faapea o oe o se tasi o aposetolo o loo tū i luga o le mauga o Olive, ae ua tū atu Iesu i ou luma. Ina o le a afio aʻe o ia i le lagi, ua ia faapea atu: “O le a maua e outou le mana pe a oo ifo iā te outou le agaga paia, ma o le a fai outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:8) O le ā sau gaoioiga o le a fai?

Atonu o le a lofitūina oe ona o le telē o le galuega. Atonu o le a e taumānatu, ʻE mafai faapefea e i matou e toʻaitiiti ona avatu se molimau i “tuluʻiga uma o le lalolagi”?’ Atonu o le a e manatua lapataʻiga na avatu e Iesu i le pō a o leʻi maliu o ia: “E lē sili se pologa i lona matai. Afai na latou faasauā mai iā te aʻu, e latou te faasauā foʻi iā te outou. Afai e latou te tausi i laʻu upu, e latou te tausi foʻi i a outou upu. Ae latou te faia nei mea uma e tetee atu ai iā te outou ona o loʻu igoa, auā latou te lē iloa Lē na auina mai aʻu.” (Ioa. 15:20, 21) I le manatunatu i na upu, atonu e te fesili ifo ai, ʻE faapefea ona ou avatu se molimau māeʻaeʻa a o feagai ai ma teteega ma sauāga?’

E faapena foʻi fesili o loo feagai ma i tatou i aso nei. O lo tatou tofiga o ni Molimau a Ieova, ua faapena foʻi ona manaʻomia ai ona tatou avatu se molimau māeʻaeʻa i “tuluʻiga uma o le lalolagi,” ma “tagata o nuu uma lava.” (Mata. 28:19, 20) E faapefea ona faataunuuina lenei galuega, aemaise lava i le iloaina e iai teteega e pei ona valoia?

O le tusi o Galuega a le ʻAuaposetolo, ua aumaia ai iā i tatou ni tala fiafia i le auala na faataunuu ai e le ʻauaposetolo lo latou tofiga i le uluaʻi senituri T.A., faatasi ma le fesoasoani a Ieova. O le lomiga o loo e faitauina, ua saunia e fesoasoani ai iā te oe e suʻesuʻe faamaumauga ma e lagonaina le fiafia i mea mataʻina na tutupu o loo faamauina ai. O le a e maofa i le tele o mea e tutusa ai auauna a le Atua i le uluaʻi senituri, ma ona tagata i aso nei. O le a tatou iloa ai foʻi, o nei mea e tutusa ai, e lē gata e aofia ai le galuega o loo tatou faia, ae faapea foʻi le auala o loo faamaopoopo ai lenā galuega. O le manatunatu i na tulaga tutusa, e mautinoa o le a faamalosia ai lou talitonuga e faapea, o loo faaauau pea ona taʻitaʻia e Ieova le Atua le vaega o lana faalapotopotoga o i le lalolagi.

Matou te faamoemoe ma tatalo, o le iloiloina o le tusi o Galuega, o le a faamalosia ai lou faatuatua o le a fesoasoani atu Ieova iā te oe, ma o le malosi o lona agaga paia o le a e tumau ai. Tau ina ia faalaeiauina oe e faaauau ona ʻavatu se molimau māeʻaeʻa’ e faatatau i le Malo o le Atua, ma fesoasoani i isi ina ia savavali i le ala o le faaolataga.—Galu. 28:23; 1 Timo. 4:16.