1-3. (a) O ā mea na tutupu na ono fevaevaeaʻi ai le uluaʻi faapotopotoga Kerisiano? (e) E faapefea ona aogā iā i tatou le suʻesuʻeina o lenei mataupu, i le tusi o Galuega?

 UA OLIOLI ona ua toe foʻi mai Paulo ma Panapa i Anetioka i Suria i la laʻua uluaʻi malaga faamisionare. Ua fiafia i laʻua ona ua “tatalaina [e Ieova] le faitotoʻa o le faatuatua mo nuu ese.” (Galu. 14:26, 27) E lē gata i lea, ua talaʻia le tala lelei i Anetioka atoa ma e “toʻatele” tagata o Nuu Ese ua faaopoopo i le faapotopotoga.—Galu. 11:20-26.

² Ua oo atu i Iutaia lenei tala fiafia e uiga i le faatelega. Ae nai lo o le olioli ai o tagata uma, o lenei faatelega ua toe lāgā ai le mataupu faaumiumi e uiga i le peritome. O le a faapefea ona fesootaʻi tagata Iutaia ma tagata talitonu e lē o ni Iutaia, ma o le ā le vaaiga a i latou nei e lē o ni Iutaia i le Tulafono a Mose? O lenei mataupu, na māfua ai se feeseeseaʻiga matuiā, ma e ono fevaevaeaʻi ai le faapotopotoga. O le a faapefea ona foʻia lenei mataupu?

³ A o tatou iloiloina lenei mataupu i le tusi o Galuega, o le a tatou aʻoaʻoina ai nisi lesona tāua. E fesoasoani nei mea ina ia tatou gaoioi ai ma le atamai pe a tulaʻi mai ni feeseeseaʻiga i o tatou aso.

4. O ā vaaiga sesē na saga faaauau pea ona talitonu iai nisi tagata ma o ā fesili ua lāgā ai?

⁴ Na tusi le soo o Luka: “Ua ō ifo [i Anetioka] nisi tagata mai i Iutaia ma aʻoaʻo atu i le ʻauuso e faapea: ʻAfai e lē peritomeina outou e tusa ai ma le tū a Mose, e lē mafai ona faaolaina outou.’” (Galu. 15:1) E lē o taʻuina mai po o nei “tagata mai i Iutaia” o ni faresaio ae leʻi faaliliuina e avea ma Kerisiano. Ae po o le ā lava lo latou tulaga, e foliga mai ua taaʻina i latou e manatu o le lotu Iutaia. E lē gata i lea, ua manatu sesē nisi o nei tagata ua fai ma sui o le ʻauaposetolo ma toeaina i Ierusalema. (Galu. 15:23, 24) Aiseā la ua saga faaauau ai pea ona talitonu nei tagata Iutaia i lenei mataupu, ae o lea ua atoa le 13 tausaga, talu ona talia e le aposetolo o Peteru tagata o Nuu Ese e leʻi peritomeina i le  faapotopotoga Kerisiano, e ala i le faatonuga a le Atua? a—Galu. 10:24-29, 44-48.

5, 6. (a) Aiseā na mananaʻo ai Kerisiano Iutaia e taofimau pea i le mataupu o le peritome? (e) Po o le feagaiga o le peritomeina o se vaega o le feagaiga faa-Aperaamo? Faamatala. (Tagaʻi i le faaopoopoga.)

⁵ Atonu e tele ni māfuaaga. Ae o se tasi o na māfuaaga, ona o le peritome sa amataina e Ieova lava ia, ma sa avea o se faailoga o se faiā faapitoa ma ia. Na amata a o leʻi iai le Tulafono, ae mulimuli ane ua avea ma vaega o le Tulafono, ma na amata mai iā Aperaamo ma lona ʻauaiga. b (Levi. 12:2, 3) I le Tulafono a Mose, e oo lava i tagata ese e tatau ona peritomeina, ona faatoʻā mafai lea ona maua ni faaeaga, e pei o le taumamafa i le Paseka. (Eso. 12:43, 44, 48, 49) I mafaufau o tagata Iutaia, o se tamāloa e leʻi peritomeina, e lē mamā ma e inosia.—Isa. 52:1.

⁶ O lea la, ina ia talia aʻoaʻoga fou, sa manaʻomia ai ona faatuatua ma lotomaulalo tagata Iutaia ua faatuatua. Na suia le Tulafono o le Feagaiga i le tulafono fou, o lea la o le fanau mai o se Iutaia, e lē o toe otometi ai ona avea se tasi ma sui o tagata o le Atua. Ae o Kerisiano Iutaia o loo nonofo i vaipanoa Iutaia—e pei o tagata talitonu i Iutaia—e manaʻomia le lototele e talitonu ai i le Keriso, ma talia tagata o Nuu Ese e leʻi peritomeina e avea ma o latou uso.—Iere. 31:31-33; Luka 22:20.

7. O ā upu moni na lē taliaina e nei “tagata mai i Iutaia”?

⁷ Ioe, e lē suia faatulagaga a le Atua. O le faamaoniga o lenā mea, o le feagaiga fou, na aofia ai le agaga o le Tulafono a Mose. (Mata. 22:36-40) O se faaaʻoaʻoga, i le mataupu o le peritome, na tusi Paulo: “O ia o le Iutaia i totonu e lē vaaia, ma ua peritomeina i lona loto e ala i le agaga, ae e lē tusa ma le tulafono na tusia.” (Roma 2:29; Teu. 10:16) O nei “tagata mai i Iutaia,” e latou te leʻi malamalama atoatoa i lenei mataupu, ae na taofimau pea, e lē suia lava le tulafono a le Atua e faatatau i le peritome. Po o le a latou taliaina?

8. Aiseā na avatu ai le mataupu e uiga i le peritome i le vaega pule i Ierusalema?

⁸ Ua faapea atili mai Luka: “Ina ua mavae sina taimi o fevaevaeaʻi i latou [“tagata mai i Iutaia”] ma fefinauaʻi ma Paulo ma Panapa, ona latou fuafua lea ina ia ō aʻe Paulo, Panapa, ma nisi i le ʻauaposetolo ma toeaina i Ierusalema e faatatau i lenei mataupu.” c (Galu. 15:2) O le ʻfevaevaeaʻi ma le fefinauaʻi’,  na atagia ai faalogona malolosi, ma talitonuga maumaututū o itu uma e lua, ma e leʻi mafai ona foʻia e le faapotopotoga i Anetioka le mataupu. Ona o le naunau e tausia le filemu ma le autasi, na fuafua ai ma le atamai e le faapotopotoga, e avatu le fesili “i le ʻauaposetolo ma toeaina i Ierusalema,” o ē o loo faia aʻe ai le vaega pule. O le ā e tatou te aʻoaʻoina mai i toeaina i Anetioka?

9, 10. O le ā le auala na saunia ai e uso i Anetioka, faapea Paulo ma Panapa, se faaaʻoaʻoga lelei mo i tatou i aso nei?

⁹ O se tasi o lesona tāua ua tatou aʻoaʻoina, e manaʻomia ona tatou maufaatuatuaina le faalapotopotoga a le Atua. Ia manatua le mea lenei: Na iloa e uso i Anetioka, o le vaega pule uma, na faia aʻe i Kerisiano e tupuga mai i tagata Iutaia āuliuli. O lea, na latou faatuatuaina ai lenā vaega e foʻia le fesili i le peritome, ina ia ōgatusa ma Tusitusiga Paia. Aiseā? Auā ua mautinoa e le faapotopotoga, o Ieova e na te taʻitaʻia mea e ala i lona agaga paia, ma Iesu Keriso le Ulu o le faapotopotoga Kerisiano. (Mata. 28:18, 20; Efe. 1:22, 23) Pe a tulaʻi mai ni mataupu faigatā i aso nei, seʻi o tatou faataʻitaʻi i le faaaʻoaʻoga lelei a tagata talitonu i Anetioka, i le maufaatuatuaina o le faalapotopotoga a le Atua ma le Vaega Pule, o Kerisiano faauuina.

¹⁰ Ua faamanatu mai foʻi iā i tatou le tāua o le lotomaulalo ma le onosaʻi. Na filifilia patino Paulo ma Panapa e le agaga paia e ō atu i nuu ese, ae la te leʻi faaaogā lenā pule e foʻia ai le mataupu i le peritome, i lea lava taimi i Anetioka. (Galu. 13:2, 3) E lē gata i lea, na tusi mulimuli ane Paulo: “Na ou alu aʻe [i Ierusalema] ona o se faaaliga mai i le lagi”—e faamaonia ai na iai le taʻitaʻiga a le Atua i le mataupu. (Kala. 2:2) O loo taumafai malosi toeaina i aso nei, ia iai lenā lava uiga lotomaulalo ma le onosaʻi, pe a tulaʻi mai ni fesili e ono fevaevaeaʻi ai. Nai lo o le fefinauaʻi, e latou te saʻili atu iā Ieova e ala i le iloiloina o le Tusi Paia, faatonuga ma taʻiala ua saunia mai e le pologa faamaoni.—Fili. 2:2, 3.

11, 12. Aiseā e tāua ai le faatalitali iā Ieova?

 ¹¹ I nisi tulaga, atonu e tatou te faatalitali ai iā Ieova e faamalamalama mai nisi o mataupu. Manatua, pe tusa ma le 13 tausaga na faatalitali ai nisi o uso i le vaitaimi o Paulo, mai i le taimi na faauuina ai Konelio i le 36 T.A. seʻia oo i le 49 T.A.—ae faatoʻā aumai e Ieova le faaiʻuga i le mataupu, pe e tatau ona peritomeina tagata o Nuu Ese. Aiseā ua umi ai? Atonu na finagalo le Atua ia lava se taimi e suia ai manatu o tagata Iutaia faamaoni i lenei mataupu tāua. Talu ai e lē o se mataupu faatauvaa le faamutaina o le feagaiga i le peritomeina, lea sa faia ma lo latou augātamā o Aperaamo i le 1,900 tausaga ua mavae!—Ioa. 16:12.

¹² Maʻeu se faaeaga o le toleniina ma faatonuina o i tatou e le Tamā onosaʻi ma agalelei o i le lagi! E tatou te maua ai pea iʻuga lelei ma aogā. (Isa. 48:17, 18; 64:8) O lea, aua lava neʻi o tatou faualuga ma faia mea i o tatou lava manatu, pe e faaalia le lē fiafia i suiga ua faia e le faalapotopotoga, pe faauiga sesē nisi o mau o le Tusi Paia. (Fai. 7:8) Afai ua amata ona iai sina uiga faapena iā te oe, aiseā e te lē manatunatu loloto ai ma tatalo i nei mataupu silisili talafeagai o loo i le Galuega mataupu e 15? d

13. E faapefea ona atagia atu i la tatou faiva le onosaʻi o Ieova?

¹³ E manaʻomia le onosaʻi pe a tatou suʻesuʻeina le Tusi Paia ma tagata e faigatā ona lafoaʻi o latou talitonuga, po o amioga masani e lē faale-Tusi Paia. I se tulaga faapena, e manaʻomia ai ona lava se taimi e galue ai le agaga o le Atua i o latou loto. (1 Kori. 3:6, 7) E manaʻomia foʻi ona tatou tatalo e uiga i lenā mataupu. Po o le ā lava le tulaga, ma i le taimi tatau, e mautinoa o le a fesoasoani le Atua iā i tatou e iloa le auala poto e fai ai.—1 Ioa. 5:14.

14, 15. Na faapefea ona faamamaluina e le faapotopotoga i Anetioka Paulo, Panapa ma isi o le ʻaumalaga, ma na faapefea ona avea o se faamanuiaga lo latou iai ma uso talitonu?

¹⁴ Sa faaauau le faamatalaga a Luka: “Ua momoli i latou e le faapotopotoga i se vaega o le auala, ona faaauau ai lea ona ō nei tane e ui atu i Foinie ma Samaria. Ua latou faamatala auʻiliʻili atu foʻi le faaliliuina o tagata o nuu ese, ma ua matuā olioli ai le ʻauuso uma.” (Galu. 15:3) O le momoli e le faapotopotoga o Paulo ma Panapa ma isi o le ʻaumalaga, o se gaoioiga alofa faa-Kerisiano e faamamaluina ai i latou, e faailoa ai lo latou mananaʻo ia faamanuia e le Atua la latou faigāmalaga. Ua toe taʻua foʻi i inei ni faaaʻoaʻoga lelei a uso i Anetioka tatou te faataʻitaʻi iai! Po o e faaalia le faaaloalo i ou uso ma tuafāfine Kerisiano, “aemaise i latou [toeaina] e galulue mamafa i le upu ma le aʻoaʻo atu”?—1 Timo. 5:17.

¹⁵ A o malaga atu, sa avea i latou ma faamanuiaga i uso Kerisiano i Foinie  ma Samaria, ina ua latou “faamatala auʻiliʻili” atu mea na tutupu e uiga i le galuega i oganuu o Nuu Ese. Atonu na aofia ai i ē na faalogologo, tagata talitonu o Iutaia na sosola atu i na atunuu ina ua mavae le faamaturoina o Setefano. E faapena foʻi i aso nei, o lipoti o faamanuiaga a Ieova i le galuega o le faia o soo, o se faalaeiauga mo o tatou uso aemaise i latou o feagai ma tofotofoga. Po o e mauaina ni aogā atoatoa mai i na lipoti pe a e auai i sauniga faa-Kerisiano, fonotaga, tauaofiaga faapea ma le faitauina o tala o mea na tutupu e pei ona lomia i a tatou lomiga po o luga o la tatou upega tafaʻilagi o le jw.org?

16. O le ā e iloa ai na avea le peritomeina o se mataupu tāua?

¹⁶ Ina ua malaga atu agaʻi i saute e tusa ma le 350 maila [550 km], ona taunuu lea o le ʻaumalaga mai i Anetioka i le mea e nonofo ai. Na tusi Luka: “Ina ua taunuu atu i Ierusalema, ua talia fiafia i latou e le faapotopotoga ma aposetolo ma toeaina, ona la faamatala atu lea o le tele o mea ua faia e le Atua e ala iā i laʻua.” (Galu. 15:4) “Peitaʻi, ua tutū i luga nisi mai i le lotu a le ʻau Faresaio o ē ua talitonu ma faapea ane: ʻE tatau ona peritomeina i latou ma faatonuina e tausia le Tulafono a Mose.’” (Galu. 15:5) E manino mai, o le fesili e uiga i le peritomeina o Kerisiano e lē o ni Iutaia, ua avea ma mataupu tāua ma e tatau ona taulimaina.

17. O ai na faia aʻe ai le vaega pule i Ierusalema, ma aiseā atonu na aofia ai “toeaina”?

¹⁷ Ua faapea mai le Faataoto 13:10, “e iai le atamai i ē e saʻili i fautuaga.” Ina ia ōgatusa ma lenā mataupu silisili, “ona faapotopoto lea o aposetolo ma toeaina ina ia talanoaina [le fesili i le peritome].” (Galu. 15:6) Sa avea “aposetolo ma toeaina” ma sui o le faapotopotoga Kerisiano atoa, e pei lava ona faia e le Vaega Pule i aso nei. Aiseā na auauna ai “toeaina” faatasi ma aposetolo? Manatua foʻi na fasiotia le aposetolo o Iakopo, ma atonu mo se taimi sa faafalepuipuiina ai Peteru. Po o le a tupu foʻi ni mea faapena i isi aposetolo? O le iai o isi tane agavaa faauuina, o le a fesoasoani ina ia faamautinoa ai ua sologa lelei le pulega.

18, 19. O ā upu malolosi na tautala atu ai Peteru, ma o le ā le faaiʻuga sa tatau ona faia e lana ʻaufaalogologo?

 ¹⁸ Na faaauau mai Luka: “Ua tele le fefinauaʻi, ona tulaʻi ai lea o Peteru ma faapea atu . . . : ʻLe ʻauuso e, ua outou iloa lelei, na filifilia aʻu e le Atua mai iā te outou i le taimi ua teʻa, ina ia faalogo tagata o nuu ese i le upu o le tala lelei mai i loʻu gutu ma talitonu ai. O le Atua foʻi, o lē e silafia loto o tagata, na molimau o ia e ala i le tuuina atu o le agaga paia iā i latou, e pei foʻi ona ia faia iā i tatou. E na te leʻi faaeseeseina foʻi i tatou ma i latou, i lona faamamāina o o latou loto i le faatuatua.’” (Galu. 15:7-9) E tusa ai ma se tasi faamaumauga, o le upu Eleni ua faaliliuina “fefinauaʻi” i le fuaiupu e 7 e faamatalaina ai foʻi “le saʻilia; po o le suʻesuʻeina.” E moni, e ui ina eseese talitonuga o uso, ae e faamaoni le tagata i ona lava manatu faaalia.

¹⁹ O upu malolosi a Peteru na faamanatu atu ai iā i latou uma, sa faatasi o ia ma le uluaʻi tagata o Nuu Ese e leʻi peritomeina, o Konelio ma lona ʻauaiga, ina ua faauuina i le agaga paia i le 36 T.A. O lea, afai ua faamuta e Ieova le faaeseesea o tagata Iutaia ma tagata e lē o ni Iutaia, o le pule la a ai e usitaʻi iai tagata? E lē gata i lea, o le faatuatua i le Keriso ae lē o le usitaʻi i le Tulafono a Mose, e faamamāina ai le loto o le tagata talitonu.—Kala. 2:16.

20. Na faapefea ona ʻtofotofo i le Atua’ i latou na lagolagoina le peritome?

²⁰ Ona e lē fesiligia le Afioga a le Atua ma le agaga paia lea sa faavae ai faamatalaga a Peteru, na ia faapea atu: “Aiseā la ua outou tofotofo ai i le Atua, i le faaee atu i le ʻausoo o le avega e leʻi mafaia e o tatou augātamā, po o i tatou foʻi ona tauaveina? Nai lo o lea, ua tatou talitonu ua faaolaina i tatou ona o le agalelei faifua o le Alii o Iesu, ma e faapena foʻi na tagata.” (Galu. 15:10, 11) O i latou e talitonu i le peritome, ua latou ʻtofotofo i le Atua,’ pe e ʻluʻia lona onosaʻi’, e pei ona faamatalaina e se tasi faaliliuga. Sa latou taumafai e faamalosia lenei tulafono i tagata o Nuu Ese, lea e lē mafai e tagata Iutaia ona usitaʻia atoatoa, ma o lea ua faasalaina ai i latou i le oti. (Kala. 3:10) Nai lo o lenā, sa tatau ona lotofaafetai le ʻaufaalogologo a Peteru, o tagata Iutaia, i le alofa faifua o le Atua e ala mai iā Iesu.

21. O le ā se sao o Paulo ma Panapa i le talanoaga?

²¹ E manino mai, na pāʻia loto o le ʻaufaalogologo i upu a Peteru, “ona lē toe tautatala lea o i latou uma.” Mulimuli ane, na faamatala atu e Paulo ma Panapa “le tele o faailoga ma mea ofoofogia na faia e le Atua i nuu ese e ala iā i laʻua.” (Galu. 15:12) O lea la, o le taimi lea ua tatau ai ona iloilo e le ʻauaposetolo ma toeaina mea uma na tutupu, ma faia ai loa se faaiʻuga e faamautinoa ai le finagalo o le Atua e tusa ma le mataupu i le peritome.

22-24. (a) E faapefea ona mulimuli le Vaega Pule i aso nei i le faaaʻoaʻoga a le vaega pule i le uluaʻi senituri? (e) E faapefea ona faaalia e toeaina le faaaloalo i le pule faatiokarate?

²² I aso nei, pe a feiloaʻi sui o le Vaega Pule, e latou te saʻili ai foʻi i le Afioga a le Atua mo le taʻitaʻiga, ma tatalo faatauanau mo le agaga paia. (Sala. 119:105; Mata. 7:7-11) O le mea lea, e maua ai e sui taʻitasi o le Vaega Pule se faasologa  o mataupu a o leʻi talanoaina, ina ia manatunatu loloto i ai ma tatalo i mataupu taʻitasi. (Faata. 15:28) I taimi o nei fono, o nei uso faauuina, e saʻoloto e faailoa atu ma le faaaloalo o latou lava manatu. E faaaogā i taimi uma le Tusi Paia i nei talanoaga.

²³ E tatau i toeaina o le faapotopotoga ona faataʻitaʻi i lenei faaaʻoaʻoga. Ae pe afai ua māeʻa ona talanoaina e toeaina se mataupu matuiā ae e leʻi foʻia, e mafai e toeaina ona faafesootaʻi atu le ofisa o le lālā i lea vaipanoa po o se sui tofia, e pei o ovasia matagaluega. Ona tusi atu lea o le ofisa o le lālā i le Vaega Pule pe a tatau ai.

²⁴ Ioe, e faamanuia e Ieova i latou e faaaloalo i faatulagaga faatiokarate, ma i latou e faaalia le lotomaulalo, faamaoni, ma le onosaʻi. E pei ona o le a tatou iloa i le mataupu o mulimuli mai, o taui mai le Atua ona o le faia faapea e filemu moni, faatamaoaigaina ai faaleagaga, ma le autasi faa-Kerisiano.