1, 2. (a) O le ā e faamaonia ai na pule lo tatou Tupu talu mai le 1914? (e) O le ā o le a iloiloina i lenei mataupu?

 E FAAMALOSIA lo tatou faatuatua i le iloiloina o mea ua faia e le Malo o le Atua i le lotolotoi o ona fili. (Sala. 110:2) Ua aoaoina e lo tatou Tupu se ʻautau o tagata talaʻi maelega. Ua ia faamamāina i latou i le itu tau amio ma le itu faaleagaga. E ui i taumafaiga a fili o le Malo ina ia tatou fevaevaeaʻi, ae o loo tatou olioli pea i le autasi i aso nei. O lenā mea faapea foʻi le tele o isi mea sa tatou iloiloina ua faataunuuina e le Malo, ua avea lea ma faamaoniga maumaututū, na pule lo tatou Tupu i le lotolotoi o fili o le Malo talu mai le 1914.

² E tele atu isi mea mataʻina o le a faia e le Malo i le lumanaʻi. O le a “oo mai” le Malo e “tuʻimomomoina ma faaumatia” ona fili. (Mata. 6:10; Tani. 2:44) Ae a o leʻi oo mai lenā taimi, e iai nisi mea mataʻina o le a tutupu. O ā na mea mataʻina? E tele valoaga o le Tusi Paia o loo taliina ai lenā fesili. O lea, seʻi o tatou iloiloina nisi o na valoaga, ma iloa ai mea o le a tutupu i le lumanaʻi.

3. O le ā le mea muamua o le a tupu o loo tatou faatalitali i ai?

³ Alagaina o le filemu. I le tusi a Paulo i tagata Tesalonia, na ia faailoa mai ai le mea muamua o le a tupu o loo tatou faatalitalia. (Faitau le 1 Tesalonia 5:2, 3.) Na taʻua e Paulo le “aso o Ieova,” lea e amata i le osofaʻia o “Papelonia le Aai Tele.” (Faaa. 17:5) Peitaʻi a o leʻi amataina le aso o Ieova, o le a faapea mai atunuu “Ua filemu ma saogalemu!” O lenei faalauiloaga e mafai ona faasino atu i se faalauiloaga se tasi, po o ni faalauiloaga eseese se tele. Po o le a faia ai se vaega a taʻitaʻi lotu i lenā faalauiloaga? Talu ai o i latou o se vaega o le lalolagi, e ono mafai foʻi ona latou auai faatasi ma atunuu i le faapea mai, “Ua Filemu!” (Iere. 6:14; 23:16, 17; Faaa. 17:1, 2) O lenei faalauiloaga o le filemu ma le saogalemu, e faailoa mai ai o le a amataina le aso o  Ieova. O fili uma o le Malo o le Atua “e latou te lē sao ai lava.”

4. O le ā le aogā o le malamalama i le tāua o le valoaga a Paulo, e faatatau i le faalauiloaina o le filemu ma le saogalemu?

⁴ O le ā le aogā o le malamalama i le uiga o lenei valoaga? Na faapea mai Paulo: “Tou te lē o i le pōuliuli ina neʻi maua mai outou e lenā aso, e pei ona maua o tagata gaoi pe a malamalama.” (1 Tesa. 5:3, 4) E tatou te lē pei o le toʻatele o tagata, auā ua tatou malamalama lelei i le iʻuga o mea o loo tutupu. O le ā le auala o le a faataunuuina ai le valoaga e faatatau i le filemu ma le saogalemu? E tatau ona tatou faatalitali ma mataʻituina le gasologa o le faiga o mea a le lalolagi. O le mea lea, “ia tatou mataala ma faaauau ona mafaufau lelei.”​—1 Tesa. 5:6; Sefa. 3:8.

5. O le ā le amataga o le “puapuaga tele”?

⁵ Le osofaʻia o lotu. Na tusi Paulo: “Pe a latou faapea ane, ʻUa filemu ma saogalemu!’ ona oo faafuaseʻi mai loa lea o le faaumatiaga iā i latou.” E pei ona sosoo o le emo o le uila ma le pa o se faititili, e faapena foʻi le taimi e faapea mai ai ua “Filemu ma saogalemu!,” ona “oo faafuaseʻi mai loa lea o le faaumatiaga.” O ai o le a faaumatia? Muamua, o “Papelonia le Aai Tele” le emepaea o lotu sesē uma po o le “fafine talitane.” (Faaa. 17:5, 6, 15) O le faaumatiaga o lotu ua faapea mai o Kerisiano ma lotu sesē uma, o le amataga lea o le “puapuaga tele.” (Mata. 24:21; 2 Tesa. 2:8) O lenei mea o le a faateʻia ai le toʻatele. Aiseā? Auā e oo ane i lenā taimi, o loo manatu pea le fafine talitane o ia o se “tupu fafine,” ma “e lē taitai ona faavauvau.” Peitaʻi, o le a faateʻia o ia i le iloa mulimuli ane, e lē o le tulaga moni lenā. O le a pei e faaumatia faafuaseʻi o ia i se “aso e tasi.”​—Faaa. 18:7, 8.

6. O ai o le a osofaʻia “Papelonia le Aai Tele”?

⁶ O ai o le a faaumatiaina “Papelonia le Aai Tele”? O le “manu feʻai” e iai “seu e sefulu.” O loo faasino atu e le tusi o Faaaliga lenei manu feʻai i Malo Aufaatasi. O seu e sefulu, o loo faaataina ai malo faapolotiki malolosi uma i aso nei, o loo lagolagoina lenei “manufeʻai e lanu mūmū sesega.” (Faaa. 17:3, 5, 11, 12) O le ā le mataʻutia o lenei osofaʻiga? O le a aveesea e malo o loo faia aʻe ai Malo Aufaatasi le tamaoaiga o le fafine talitane, ona ʻaina lea o ia ma “susunu uma o ia.”​—Faitau le Faaaliga 17:16. a

7. Na faapefea ona faataunuuina fetalaiga a Iesu i le Mataio 24:21, 22 i le uluaʻi senituri T.A., faapea le lumanaʻi?

⁷ O le a faapuupuuina ia aso. Na faailoa mai e lo tatou Tupu se isi mea o le a tupu, a o faagasolo le puapuaga tele. Na fetalai Iesu: “O le a faapuupuuina ia aso ona o ē ua filifilia.” (Faitau le Mataio 24:21, 22.) Na iai se faataunuuga itiiti o na upu i le 66 T.A., ina ua “faapuupuuina” e Ieova le osofaʻiga a le ʻautau a Roma i Ierusalema. (Mare. 13:20) O  lenā gaoioiga na maua ai le avanoa e faasaoina ai Kerisiano i Ierusalema ma Iutaia. Ae o le ā o le a tupu i le lalolagi atoa pe a oo mai le puapuaga tele? O le a “faapuupuuina” e Ieova e ala mai i lo tatou Tupu le osofaʻiga a Malo Aufaatasi i lotu, ina ia lē faaumatia faatasi ai le tapuaʻiga moni ma tapuaʻiga sesē. O lea, pe a māeʻa ona faaumatia faalapotopotoga faalelotu uma, ona totoe ai lea na o le tapuaʻiga moni. (Sala. 96:5) Seʻi o tatou iloiloina nei mea o le a tutupu, pe a māeʻa lenei vaega o le puapuaga tele.

8, 9. O le ā atonu e faasino i ai mea mataʻutia o le a tutupu i le lagi lea na taʻua e Iesu, ma o le a faapefea ona tali atu tagata i mea o le a latou vaaia?

⁸ O le valoaga a Iesu e faatatau i aso e gata ai, ua faailoa mai ai nisi mea tāua o le a tutupu a o leʻi oo atu iā Amaketo. O vala muamua e lua o le a tatou iloiloina, o loo faamauina i tusi a Mataio, Mareko ma Luka.​—Faitau le Mataio 24:29-31; Mare. 13:23-27; Luka 21:25-28.

⁹ Mea mataʻina o le a tutupu i le lagi. Na valoia e Iesu: “Ona pogisa lea o le lā, o le a lē toe susulu le masina, o le a paʻuʻū foʻi fetu mai i le lagi.” O le mea moni, o le a lē toe saʻili atu tagata i taʻitaʻi lotu mo se taʻitaʻiga. Pe na faasino atu fetalaiga a Iesu i se mea uigaese o le a tupu i le lagi? Atonu o le tulaga lenā. (Isa. 13:9-11; Ioe. 2:1, 30, 31) O le a faapefea ona tali atu tagata i mea o le a latou vaaia? O le a latou “atuatuvale” ona o le “fememeaʻi.” (Luka 21:25; Sefa. 1:17) O lea, o fili uma o le Atua e mai i ʻtupu e oo i pologa,’ o le a latou ʻmatapogia foʻi ona o le fefefe ma faatalitali i mea e oo mai,’ a o latou saʻili mo se lafitaga. Peitaʻi, o le a latou lē maua se nofoaga malupuipuia e sosola ese ai, mai i le toʻasā o lo tatou Tupu.​—Luka 21:26; 23:30; Faaa. 6:15-17.

10. O le ā le faamasinoga o le a faalauiloa mai e Iesu, ma o le a faapefea ona tali atu ai i latou e tetee, ma ē e lagolagoina le Malo?

¹⁰ Faalauiloaga o le faamasinoga. O le a faamalosia fili o le Atua e molimauina se mea o le a atili ai ona latou fefefe. Na fetalai Iesu: “Ona latou vaaia lea o le Atalii o le tagata o loo sau i ao, ma le mana tele, ma le mamalu.” (Mare. 13:26) O lenei faaaliga o le mana o le Atua, ua faailoa mai ai le afio mai o Iesu e faalauiloa le faamasinoga. I le isi vaega o lenei valoaga a Iesu e faatatau i aso e gata ai, na ia aumaia ai isi faamatalaga e faatatau i lenei faamasinoga. E tatou te maua na faamatalaga i le talafaatusa e faatatau i mamoe ma ʻoti. (Faitau le Mataio 25:31-33, 46.) O tagata faamaoni e lagolagoina le Malo o le a faamasinoina o ni “mamoe,” ma e “ea i luga o [latou] ulu,” auā ua latou iloa ʻua latalata ona laveaʻiina i latou.’ (Luka 21:28) Peitaʻi, o i latou e tetee i le Malo o le a faamasinoina o ni “ʻoti,” ma o le a latou “taufaitagituʻi,” auā ua lata mai lo latou “faaumatiaga e faavavau.”​—Mata. 24:30; Faaa. 1:7.

11. O le ā e tatau ona tatou manatua a o iloiloina mea o le a tutupu?

 ¹¹ Pe a māeʻa ona faalauiloa e Iesu le faamasinoga o “atunuu uma,” e iai isi mea mataʻina o le a tutupu a o leʻi gāpā Amaketo. (Mata. 25:32) O isi nei o mea e lua o le a tatou iloiloina: O le osofaʻiga a Koku ma le aoaoina o le ʻaufaauuina. A o tatou iloiloina nei mea o le a tutupu, e tatau ona tatou manatua e lē o faailoaina mai i le Tusi Paia le taimi tonu e tutupu ai nei mea uma. E foliga mai, e iai nisi o nei mea mataʻina o le a tutupu a o faagasolo ona tutupu isi mea mataʻina.

12. O le ā le osofaʻiga mulimuli o le a faia e Satani faasaga i le Malo o le Atua?

¹² Osofaʻiga a Satani. O le a osofaʻia e Koku o Makoku le vaega totoe o le ʻaufaauuina ma a latou aumea o isi mamoe. (Faitau le Esekielu 38:2, 11.) O lenei osofaʻiga i le Malo o le Atua, o le siitaua mulimuli lea a Satani i le vaega totoe o le ʻaufaauuina, talu ona tuliesea o ia mai i le lagi. (Faaa. 12:7-9, 17) Na taumafai Satani e faaleaga le tulaga faaleagaga o le ʻaufaauuina, talu mai le taimi na amata ai ona aoaoina i latou i le faapotopotoga Kerisiano ua māeʻa ona faamamāina. Peitaʻi, e leʻi taulau ana taumafaiga. (Mata. 13:30) Ae i le taimi e faaumatia ai lotu sesē uma, o le a foliga mai o le a nonofo tagata o le Atua “e aunoa ma ni pā puipui, ma e leai foʻi ni o latou laau faalava ma faitotoʻa.” O le a manatu Satani o le taimi lelei lenā e osofaʻia ai tagata o le Atua, ma o le a ia uunaʻia tagata amioleaga e osofaʻia i latou e lagolagoina le Malo.

13. O le a faapefea ona faasalavei mai Ieova e faasaoina ona tagata?

¹³ Na faamatala e Esekielu le mea o le a tupu. Ua faapea mai le valoaga e faatatau iā Koku: “O le a e sau mai i lou nofoaga, mai i vaega mamao o le itu i mātū, o oe ma le toʻatele o tagata faatasi ma oe, o loo tiʻetiʻe i latou uma i solofanua, o se faapotopotoga e toʻatele, o se ʻautau e toʻatele lava. O le mea moni, e te alu atu e faasagatau i loʻu nuu o Isaraelu e pei o ao e ufitia ai le laueleele.” (Eseki. 38:15, 16) O le ā le tali atu a Ieova i lenā osofaʻiga? Na ia fetalai: “O le a iloa ai loʻu ita tele i oʻu foliga. Ou te valaau atu i le pelu.” (Eseki. 38:18, 21; faitau le Sakaria 2:8.) O le a faasalavei mai Ieova e puipuia ona tagata, ma o le amataga lenā o le taua iā Amaketo.

14, 15. O le ā le isi mea o le a tupu pe a mavae le amataga o le osofaʻiga a Satani?

¹⁴ A o leʻi talanoaina le auala e puipuia ai e Ieova ona tagata i le taua iā Amaketo, seʻi o tatou iloiloina se isi mea o le a tupu. O lenei mea mataʻina, o le a tupu i le va o le amataga o le osofaʻiga mulimuli a Satani, ma le faasalavei mai o Ieova iā Amaketo. E pei ona taʻua i le palakalafa e 11, o lenei mea mataʻina o le aoaoina o le vaega totoe o le ʻaufaauuina.

¹⁵ Le aoaoina o le ʻaufaauuina. Na faamauina e Mataio ma Mareko fetalaiga a Iesu e faatatau i “ē ua filifilia” po o  Kerisiano faauuina, o se vaega o mea mataʻina o le a tutupu a o leʻi gāpā Amaketo. (Tagaʻi i le palakalafa e 7.) Na valoia mai e Iesu se gaoioiga o le a ia faia i le avea ai o ia ma Tupu: “Ona ia aauina atu lea o agelu e latou te aoaoina mai o ē ua filifilia mai i matāmatagi e fā, e mai i le tuluʻiga o le lalolagi e oo atu i le tuluʻiga o le lagi.” (Mare. 13:27; Mata. 24:31) O le ā lenei aoaoina na fetalai ai Iesu? E leʻi fetalai o ia e faatatau i le faamaufaailoga faaiʻu o le ʻaufaauuina, lea e tupu a o toeitiiti amata le puapuaga tele. (Faaa. 7:1-3) Nai lo o lea, sa ia fetalai e faatatau i se mea o le a tupu a o faagasolo le puapuaga tele. E foliga mai pe a mavae le amataga o le osofaʻiga a Satani i tagata o le Atua, ona aoaoina loa lea i le lagi o le ʻaufaauuina o loo totoe i le lalolagi.

16. O le ā le sao o le ʻaufaauuina ua toe faatutūina i le taua o Amaketo?

¹⁶ O le ā le fesootaʻiga o le aoaoina o le ʻaufaauuina, ma le taua iā Amaketo lea e sosoo ai? O lenei mea e faailoa mai ai o le a iai le ʻaufaauuina uma i le lagi, a o leʻi amataina le taua a le Atua o Amaketo. I le lagi, o le a maua e le 144,000 o le a pule faatasi ma Keriso, le pule e latou te faaaogāina ai ma Iesu le “tootoo uʻamea,” o le faaumatiaga o fili uma o le Malo o le Atua. (Faaa. 2:26, 27) O le a mulimuli atu le ʻaufaauuina ua toetutū i le lagi ma agelu i le Tupu Toa o Keriso, a o ia faasagatau atu i le “ʻautau e toʻatele” o fili o le Atua, a o latou lalata atu e osofaʻia tagata o le Atua. (Eseki. 38:15) Pe a tupu lenā mea, ona amata loa lea o le taua o Amaketo.​—Faaa. 16:16.

17. O le ā o le a tupu i “ʻoti” a o faagasolo Amaketo?

¹⁷ Faaooina mai o le faasalaga. O le taua o Amaketo o le vaega faaiʻu lea o le puapuaga tele. I lenā taimi, o le a iai se isi matafaioi faaopoopo a Iesu. E ese mai i le avea o ia ma Faamasino o “atunuu uma,” ae o le a avea foʻi o ia ma Faaoosala o atunuu, po o tagata ua faamasinoina o ni “ʻoti.” (Mata. 25:32, 33) O le a faaaogā e lo tatou Tupu le “pelu maʻai umī” e ʻtaia ai atunuu.’ O i latou uma e pei o ni ʻoti, e amata mai i “tupu” e oo i “pologa,” o le a ʻō atu i le faaumatiaga e faavavau.’​—Faaa. 19:15, 18; Mata. 25:46.

18. (a) O le ā le suiga o le a iai mo “mamoe”? (e) O le a faapefea ona faamāeʻa e Iesu lana manumalo aʻiaʻi?

¹⁸ Maʻeu se suiga o le a iai mo i latou o le a faamasinoina o ni “mamoe”! O le a lē faaumatiaina i latou e le ʻautau tele o “ʻoti” a Satani. Nai lo o lea, o le “motu o tagata e toʻatele” e foliga mai o ni “mamoe” ua leai se puipuiga, o le a faasaoina mai i lenei osofaʻiga a le fili, faapea “le puapuaga tele.” (Faaa. 7:9, 14) Pe a māeʻa ona faatoʻilaloina e Iesu fili faaletagata o le Malo o le Atua, ona ia lafoina lea o Satani ma ana temoni i le tō. O i inā o le a saisaitia ai i latou e pei ua feoti, ma lē mafai ai ona toe gaoioi mo le afe tausaga.​—Faitau le Faaaliga 6:2; 20:1-3.

19, 20. E faapefea ona tatou faatatauina le lesona mai i le Isaia 26:20 ma le Isaia 30:21?

¹⁹ E faapefea ona sauniunia i tatou mo nei mea mataʻina o le a tutupu? I nai tausaga ua mavae na taʻua ai i le Watchtower le manatu lenei: “O le a faalagolago le faasaoina i le usiusitaʻi.” Aiseā e tāua ai lenā vala? E maua le tali i le lapataʻiga na avatu e Ieova i tagata Iutaia na faaaunuua i Papelonia. Na faailoa mai e Ieova o le a ia faaumatiaina Papelonia. Ae o le ā na tatau ona faia e tagata o le Atua e sauniunia ai i latou mo lenā mea o le a tupu? Na fetalai Ieova: “Loʻu nuu e, ia outou ō ma ulu atu i o outou potu i totonu ma tapuni o outou faitotoʻa. Ia outou lalafi mo se taimi puupuu seʻia mavae atu le toʻasā.” (Isa. 26:20) Seʻi mātau gaoioiga sa tatau ona latou faia o loo taʻua i le mau: “ō,” “ulu atu,” “tapuni,” “lalafi,” ma sa avatu e Ieova o se faatonuga. O tagata Iutaia sa usitaʻia le lapataʻiga na nonofo i o latou fale, ma taumamao ese mai fitafita sa faatoʻilaloina le aai. O lea, sa faalagolago le faasaoina o i latou i le usitaʻia o faatonuga a Ieova. b

²⁰ O le ā le lesona e tatou te aʻoaʻoina mai ai? E pei o auauna a Ieova i aso anamua, e faalagolago foʻi le faasaoina o i tatou mai i mea o le a tutupu, i lo tatou usitaʻia o faatonuga a Ieova. (Isa. 30:21) O na faatonuga ua auala mai i faatulagaga i le faapotopotoga. O lea, e manaʻomia ai ona tatou usitaʻia taʻiala ua tatou mauaina. (1 Ioa. 5:3) Pe a tatou faia faapea i aso nei, o le a sili atu la ona tatou lotomalilie e usiusitaʻi i le lumanaʻi, ma maua ai le puipuiga mai i lo tatou Tamā o Ieova, ma lo tatou Tupu o Iesu. (Sefa. 2:3) O lenā puipuiga mai i le Atua, o le a mafai ai ona tatou vaaitino i le auala e aveesea atoatoa ai e le Malo o le Atua ona fili. Maʻeu se vaaiga e lē mafai ona faagaloina!