O Ieova o se Atua e fai mea maopoopo. (1 Korinito 14:33) O lea la, e faatalitalia foʻi ona tagata e faia faapea. E faapefea ona faamaopoopo le faapotopotoga Kerisiano? O le ā la le tatou vaega fai i le faamaopoopoina o le faapotopotoga?

1. O ai o loo taʻitaʻia le faapotopotoga?

“O Keriso o le ulu ia o le faapotopotoga.” (Efeso 5:​23) O loo ia taʻitaʻia mai le lagi galuega a tagata o Ieova i le lalolagi aoao. Ua tofia e Iesu le pologa faamaoni ma le faautauta, o se vaega toʻaitiiti o toeaina taʻumatuaina lea e taʻua o le Vaega Pule. (Faitau le Mataio 24:​45-​47.) I le pei o aposetolo ma toeaina i Ierusalema i le uluaʻi senituri, e aumaia e le Vaega Pule faatonuga i faapotopotoga i le lalolagi aoao. (Galuega 15:2) Ae o nei tane e lē o ni taʻitaʻi o le matou faalapotopotoga. E latou te faalagolago iā Ieova ma lana Afioga mo le taʻitaʻiga, ma gauaʻi i faatonuga mai iā Iesu.

2. O le ā le matafaioi a le ʻautoeaina?

O le ʻautoeaina o ni tane Kerisiano taʻumatuaina e aʻoaʻo atu mai i Tusitusiga Paia, ma leoleo tagata o Ieova e ala i le fesoasoani ma faalaeiau iā i latou. E lē totogia le latou galuega ae e latou te “faia ma le lotomalie.” E lē ʻfaia ona o le fia maua o mea i se auala faapiʻopiʻo, ae e faia ma le lotonaunau.’ (1 Peteru 5:​1, 2) E iai foʻi uso e taʻua o auauna o le faiva, e fesoasoani i lenei ʻautoeaina. A o faagasolo taimi, e mafai foʻi ona agavaa nei auauna o le faiva e avea ma toeaina.

E tofia e le Vaega Pule nisi toeaina e avea ma ovasia o le matagaluega. E asia e nei ovasia faapotopotoga eseese, ma avatu le taʻitaʻiga ma faalaeiauga i uso ma tuafāfine. E tofia foʻi e ovasia matagaluega toeaina ma auauna o le faiva, o ē ua ausia agavaa faale-Tusi Paia.​—1 Timoteo 3:​1-​10, 12; Tito 1:​5-9.

3. O le ā le vaega fai a sui taʻitasi o le faapotopotoga?

E “vivii atu [sui uma o le faapotopotoga] i le suafa o Ieova” e ala i le faia o sao i sauniga ma le talaʻiga, e fua i mea e mafai ona latou faia.​—Faitau le Salamo 148:​12, 13.

 SAʻILIʻILI ATILI

4. O Iesu o se taʻitaʻi agalelei

Ua ofo mai e Iesu se valaaulia māfana mo i tatou. Faitau le Mataio 11:​28-​30, ona talanoa lea i le fesili lenei:

• O le ā le ituaiga taʻitaʻi e iai Iesu, ma o ā o tatou faalogona e faatatau i lana taʻitaʻiga?

5. E aʻoaʻo atu toeaina e ala i a latou faaaʻoaʻoga

1. A. E faamalosia pea e toeaina o latou itu faaleagaga, ma itu faaleagaga o o latou aiga

2. E. E manatu mamafa toeaina i tagata uma o le faapotopotoga

3.  I. E talaʻi e lē aunoa toeaina

4. O. O toeaina o ni faiaʻoga, ma e latou te fesoasoani foʻi i galuega faamamā ma isi mea

6. E matou te galulue faatasi ma le ʻautoeaina

Ua aumaia e le Tusi Paia iā i tatou se māfuaaga tāua, e tatau ai ona galulue faatasi ma le ʻautoeaina. Faitau le Eperu 13:​17, ona talanoa lea i le fesili lenei:

• Aiseā ua faalaeiau mai ai le Tusi Paia iā i tatou, ina ia usiusitaʻi ma gauaʻi iā i latou o taʻimua?

Faitau le Luka 16:​10, ona talanoa lea i le fesili lenei:

• Aiseā e tāua ai le galulue faatasi ma le ʻautoeaina, e oo lava i mataupu lāiti?

 AOTELEGA

O Iesu o le ulu o le faapotopotoga. E matou te fiafia e galulue faatasi ma le ʻautoeaina i lalo o le taʻitaʻiga a Iesu, auā e latou te faafouina ma aʻoaʻoina i matou e ala i a latou faaaʻoaʻoga.

Fesili Autalu

• O ai le ulu o le faapotopotoga?

• E faapefea ona fesoasoani toeaina i le faapotopotoga?

• O le ā le tiute tauave a tagata taʻitoʻatasi o loo tapuaʻi iā Ieova?