A o faatoateleina pea tagata i le lalolagi, o le tele o i latou sa faia mea leaga e pei Kaino. Ae e tasi lava le tagata sa ese. O le tamaloa lea o Enoka. O Enoka o se tagata toa. O tagata uma lava sa i ona tafatafa sa faia mea leaga, ae sa auauna pea Enoka i le Atua.

Pe e te iloa le mafuaaga sa faia ai e tagata i tuā i ina mea leaga e tele? Ia, seʻi, mafaufau, O ai na mafua ai ona agasala Atamu ma Eva i le Atua i lo la aia o le fua o le laau sa

fai atu le Atua e aua le aai ai? Ioe o se agelu leaga, o Satani. Ma o loo taumafai o ia e faaleaga tagata uma lava.

I le isi aso sa fai atu Ieova i a Enoka e taʻu i tagata se mea ae sa latou le fiafia e faalogo i ai. O le mea lenei: ‘O le a i ai se aso e faaumatia ai e le Atua tagata leaga uma lava.’

Atonu sa feita tele tagata e faalogo i ai. Sa latou taumafai foi e fasioti Enoka. E tatau la ona toa Enoka e taʻu atu i tagata le mea o le a faia e le Atua.

Sa le faaolaina umi e le Atua Enoka faatasi ai ma na tagata leaga. Sa ola Enoka i le na o le 365 tausaga lona matua. Aiseā tatou te faapea ai “na o le 365 tausaga?” Auā o tagata i na aso sa sili atu le malolosi ma ola umi. E moni, o le atalii o Enoka o Metusela sa ola mo le 969 tausaga le matua!

Ina ua mavae le oti o Enoka, ua atili ai pea lava ona matuaʻi leaga tagata. Fai mai le Tusi Paia ‘O mea uma e mafaufau i ai ua na o le leaga lava i taimi uma,’ ma sa ‘tumu foi le lalolagi i amioleaga.’

Pe e te iloa le tasi o mafuaaga sa tele ai faalavelave i le lalolagi i na ona po? Talu ai ua i a Satani ni auala fou e maua ai e ia tagata ia faia mea leaga. O mea ia o le a tatou aʻoaʻoina e sosoo mai ai.