O MEA lelei uma ua tatou maua e mai le Atua. Sa ia faia le la e aumai ai le malamalama mo le ao, le masina ma fetu ia i ai sina malamalama i le po. Sa faia foi e ia le lalolagi tatou te ola ai.

Ae o le la, le masina, fetu ma le lalolagi e le o mea muamua ia na faia e le Atua. Pe e te iloa le mea sa muamua? Sa faia e le Atua peresona pei o ia. E le mafai ona tatou vaaia nei peresona, e pei foi ona lē mafai ona tatou vaaia le Atua. I le Tusi Paia o nei peresona e taʻua o agelu. Sa faia e le Atua agelu ia ola ma ia i le lagi.

O le uluai agelu na faia e le Atua sa faapitoa. O le Alo muamua ia o le Atua, ma sa galue o ia ma lona Tamā. Sa fesoasoani o ia i le Atua ia faia isi mea uma lava. Sa la faia le la, le masina, fetu ma lo tatou lalolagi.

Sa faapeʻī la le lalolagi? I le amataga e leai se isi sa mafai ona ola i le lalolagi. Sa na o le sami tele sa ufitia ai le laueleele. Na manao le Atua ia ola tagata i le lalolagi. Sa amata loa ona ia saunia mea mo i tatou. O le ā sa ia faia?

Sa manaomia se malamalama muamua i le lalolagi. Sa faasusulu mai loa e le Atua le la i le lalolagi. Sa ia faia ina ia i ai le ao ma le po. Ina ua uma sa faamanu ane loa e le Atua le eleele mai le sami.

I le amataga sa leai se mea i le eleele. Pei lava o le ata lena e te vaai atu i ai. Sa leai ni fugalaau, laau po o ni mea ola. Sa leai foi se iʻa i le sami. Sa tele la ni galuega a le Atua e faamanaia ai le lalolagi ia ola ai mea ola ma tagata.