IA VAAI atu i lenei lalolagi! E ese le matagofie o mea uma! Vaai atu i mutia ma laau, fugalaau ma mea ola. Pe e mafai ona e faasinoina mai le leona ma le elefane?

Sa faapefea ona i ai lenei faatoaga manaia? Seʻi o tatou vaai pe faapefea ona saunia e le Atua le lalolagi mo i tatou.

Muamua, sa faia e le Atua mutia lanu meamata ia ufitia ai le eleele. O ituaiga o laau iti, togavao ma laau. O na la mea tutupu e fesoasoani e faamanaia ai le lalolagi. Ae latou te faia ni isi mea e sili atu. O le tele o na mea e faia ai a tatou mea ai manogi.

Mulimuli ane sa faia e le Atua iʻa e aau i le sami ma manu e felelei i le lagi. O maile ma pusi ma solofanua; manu lapopoa ma manu laiti. O ā ni mea ola o ola i tafatafa o lou fale? Pe tatou te le fiafia ua faia e le Atua mea uma lava mo i tatou?

Mulimuli lava, sa faia loa e le Atua se vaega o le lalolagi faapitoa. Sa ia faaigoaina o le faatoaga o Etena. Sa lelei atoatoa. Sa matagofie uma lava. Na finagalo foi le Atua ia faapea le lalolagi atoa e pei o le faatoaga manaia ua uma ona ia faia.

Seʻi toe vaai atu i le ata. Pe e te iloaina le mea na silasila atu le Atua ua leai? Seʻi o tatou vaai.