I FAFO o le vaa, sa ola pea tagata e pei ona masani ai muamua. Sa lē talitonu pea i latou o le a i ai se lolo. Atonu sa atili ai ona toē i latou. Ae mulimuli ane ua lē toe toē i latou.

I se taimi faafuasei lava sa amata ona toʻulu mai vai. Ua masaa mai le lagi e pei lava o lou sasaaina o se pakete vai. Ua saʻo Noa! Ae ua tuai tele mo se tasi ona toe ulu atu i le vaa. Ua tapunia mau e Ieova le faitotoa.

Sa lei umi lava ae ufitia uma eleele mauālalo. Na amata nei ona pei o vaitafe tetele le vai. Sa tafefea i lalo laau ma faataavavale i lalo maa tetele, ua tele ai ma le paʻo. Na fefefe tagata. Sa latou feʻaʻēi atu nei i mea mauāluluga. Maimau pe ana latou faalogo i a Noa ma ulu atu i le faitotoa a o avanoa mo i latou! Ae ua fai nei si tuai.

Sa tuputupu pea ina maualuga le vai. Mo le 40 ao 40 po sa maligi mai pea vai mai le lagi. Sa feosofi aʻe i itu uma o mauga ma mulimuli ane sa iʻu ina ufitia uma mauga mauāluluga. Na pei lava ona tulei i ai le Atua, o tagata ma mea ola sa i fafo o le vaa na feoti uma. Ae sa saogalemu uma ē sa i totonu.

Sa lelei le galuega a Noa ma lana fanau i le fauina o le vaa. Na sii i luga e le vai ma sa opeopea ai. O le isi la aso, sa uma ai loa le timu, ae ua amata ona susulu le la. Sa o se vaaiga uiga ese! Sa na o se sami tuloto lava i mea uma. Na o le tasi lava le mea sa vaaia o le vaa tele sa tafefea i luga.

Ua le toe i ai nei ni tagata tinoeese. Ua lē toe i ai i latou o ē fasia tagata. Ua feoti uma i latou, o latou tinā ma le tele o tagata leaga. Ae o le ā le mea ua tupu i o latou tamā?

O tamā o nei tagata tinoeese e lē o ni tagata e pei o i tatou. O i latou o agelu sa o mai i le lalolagi e ola ai e pei o tagata. Ina ua sau le lolo sa lei feoti i latou faatasi ma le tele o tagata. Ua lē toe faaaogaina nei o latou tino faaletagata na latou faia, ma ua toe foi atu i le lagi o ni agelu. Ae ua le toe faatagaina i latou e toe avea ma vaega o le aiga agelu a le Atua. Ma ua avea ai i latou ma agelu a Satani. Ua taʻua i latou e le Tusi Paia o temoni.

Sa faaagi mai loa e le Atua le savili, ma ua amata ona maui atu le vai o le lolo. Lima masina ua mavae ona malolo ai lea o le vaa i luga o le tumutumu o le mauga. Na mavae aso e tele, ona tilotilo mai lea o e na i totonu o le vaa ma iloa atu tumutumu o mauga. Ua faaauau ona maui atu pea le vai.

Ona faalele ese atu lea e Noa le oreva i fafo mai le vaa. Sa lele ese mo na o sina taimi ona toe fai mai lea, talu ai e leai se mea e tu ai. Sa faaauau pea ona faia faapea i taimi uma e foi mai ai e malolo lava i luga o le vaa.

Ua fia iloa nei e Noa pe ua maui uma ese le vai mai le eleele o lea na ia faalele ai se lupe mai le vaa. Sa toe foi mai le lupe talu ai e leai se mea e malolo ai. Sa toe auina faalua atu e Noa ma sa toe foi mai ma le lau olive mata i lona gutu. Ma ua iloa nei e Noa ua maui le vai i lalo. Ona toe auina atu lea e Noa le lupe faatolu, mulimuli ane sa maua lea e ia se nofoaga matutu e mau ai

Ua tulei atu nei le Atua i a Noa, ‘Ulu atu nei i fafo mai le vaa. Ave lou aiga ma mea ola uma.’ Sa i ai i latou i totonu o le vaa e sili atu i le tausaga. Sei o tatou mafaufau atu i le fiafia tele o i latou ina ua o i fafo ma o loo feola pea!