AFAI o se tasi e savali atu iā te oe e oo lona umi i le faalo o lo tou fale, o le a sou manatu? O lena tagata o se tagata tinoese! I se isi vaitaimi sa i ai moni lava tagata tinoeese i le lalolagi. Ua faaalia mai e le Tusi Paia o latou tamā o agelu mai le lagi. Faapefea ona mafai lena mea?

Manatua, o le agelu leaga o Satani sa le filemu o ia i le faia o faalavelave. Sa ia taumafai foi e faaleagaina agelu a le Atua. O isi la taimi, sa amata loa ona faalogo isi agelu i a Satani. Ua le toe faia e i latou galuega a le Atua i le lagi. Ua latou o mai i le lalolagi ma fai tino faaletagata. Pe e te iloa le mafuaaga?

Fai mai le Tusi Paia talu ai ona sa tilotilo mai nei atalii a le Atua ua mananaia tele fafine i le lalolagi ma mananao ai e nonofo ma i latou. Ona latou o mai lea i le lalolagi ma faaipoipo atu i nei fafine. E sese lenei mea, aua na faia e le Atua agelu ia ola i le lagi.

Ina ua fai ni pepe a agelu ma a latou avā, sa ese lava. I le amataga atonu sa le ese i latou. Ae ua tutupu lapopoa ma tetelē, ma malolosi seia oo lava ina avea ma tagata tinoeese.

O nei tagata tinoeese sa leaga tele. Talu ai ua lapopoa toe malolosi, latou te mafai ona faaleagaina tagata. Sa latou taumafai ia leaga uma tagata e pei o i latou.

Ua oti Enoka, ae ua i ai se tasi e lelei i le lalolagi. O Noa lona igoa. Na te faia mea uma e fai atu ai le Atua iā te ia e fai.

I se tasi aso na taʻu atu e le Atua i a Noa ua oo mai le taimi e faaumatia ai tagata leaga. Ae na te laveaia Noa, lona aiga ma le tele o isi mea ola. Seʻi o tatou vaai pe na faapefea ona faia e le Atua lenei mea.