Na o le toavalu lava tagata sa faasaoina mai le lolo, ae mo se vaitaimi sa faateleina atu i le afe ma afe. I le 352 tausaga mai le lolo, ona fanau mai lea o Aperaamo. Ua tatou aʻoaʻoina e taofi pea le Atua i lana folafolaga i le avatua o se atalii i a Aperaamo e igoa i a Isaako. Ia, mai atalii la e toalua o Isaako, sa filifilia ai Iakopo e le Atua.

Sa toatele le aiga o Iakopo e 12 ona atalii ma ona afafine. Sa inoino atalii e 10 o Iakopo i lo latou uso laitiiti o Iosefa ma faatau atu o ia e fai ma pologa i Aikupito. Ina ua tupu se oge tele, sa tofotofoina ai e Iosefa ona uso pe ua i ai se suiga i o latou loto. Mulimuli ane ona o mai uma lea o le aiga o Iakopo, o sa Isaraelū, i Aikupito. Na tupu lenei mea ina ua mavae le 290 tausaga talu ona fanaua Aperaamo.

Mo le isi 215 tausaga sa ola ai Isaraelu i Aikupito. Ina ua oti Iosefa, ona fai lea o i latou ma pologa i ina. I se taimi, ona fanau mai lea o Mose, ona faaaogaina loa lea o ia e le Atua e faasaoloto mai Isaraelu mai Aikupito. E 857 tausaga o tala faasolopito o loo aofia uma i le Vaega LUA.