PE E te iloa nei tamaloloa o loo talanoa i ai Iakopo? Ina ua mavae ni aso se tele ona fetaui ai lea o ia ma i latou i le vaieli. Sa fesili atu Iakopo: ‘O fea tou te o mai ai?

Na latou tali mai, ‘I Karana.’

‘Pe tou te iloaina Lapana?’ O le fesili lea a Iakopo.

Sa latou tali mai, ‘Ioe. Vaai, lea ua sau lona afafine o Rasela ma lana lafu mamoe.’ Pe e mafai ona e iloa atu Rasela o loo sau, e fai si mamao atu?

Ina ua vaai atu Iakopo i a Rasela ma ana mamoe, ona alu atu lea o ia ma fuli ese le maa mai le vaieli ina ia mafai ona feinu mamoe. Ona sogi atu lea o Iakopo i a Rasela ma taʻu atu i ai po o ai ia. Sa teʻi tele Rasela ma alu atu loa e taʻu i lona tamā o Lapana.

Sa fiafia tele Lapana e nonofo ma Iakopo. Ma ina ua fai atu Iakopo e fia faaipoipo i a Rasela, sa fiafia tele Lapana. E ui i lea, sa ia fai atu i a Iakopo e galue muamua i lona fanua mo tausaga e fitu. Talu ai sa alofa tele o ia i a Rasela sa fai loa e Iakopo lena mea. Ae ina ua oo i le taimi o le faaipoipoga, pe e te iloa le mea sa tupu?

Sa avatu e Lapana lona afafine matua o Lea ma Iakopo ae e le o Rasela. Ina ua malie Iakopo e toe galue mo Lapana mo le isi fitu tausaga, sa avatu loa e Lapana ia Rasela. Na faataga e le Atua le tele o avā i na ona po. Ae ua faaalia mai e le Tusi Paia i aso nei e na o le tasi lava le avā mo tane taitasi.