SEI vaai atu i le faanoanoa ma le leai o se faamoemoe ua i ai nei i a Iosefa. Faatoa uma lava ona faatau atu o ia e ona uso i tamaloloa o loo malaga atu i Aikupito. O i ina o le a fai ai Iosefa ma pologa. Ua faia e ona uso lena mea leaga talu ai ua loto leaga i latou i a Iosefa.

Sa fiafia tele lo latou tama o Iakopo i a Iosefa. Na faaalia e ala i lona faia o se ofu talaloa umi lava manaia mo ia. Ina ua iloa e le toa 10 o ona uso le alofa tele o Iakopo i a Iosefa, ona amata lea ona loto leaga ma feita iā te ia. Ae e i ai foi le isi mafuaaga na latou feita ai iā te ia.

E lua ni miti na faia e Iosefa. I miti uma ia e lua, o ona uso o loo ifo atu iā te ia. Ina ua taʻu atu e Iosefa i ona uso ua atili ona tupu ai lo latou feita.

O le tasi aso a o vaaia e uso matutua o Iosefa mamoe a lo latou tamā, sa fai atu Iakopo e alu e vaai po o faapefea mai i latou. Ina ua iloa atu e uso o Iosefa ua sau o ia ona fai mai ai lea o isi: ‘Sei o tatou fasioti iā te ia!’ Ae fai mai Reupena le tama pito i matua: ‘Leai, aua le faia lena mea!’ Ona latou pue ai lea o Iosefa ma lafo i se pu ua leai ni vai. Ona latou filifili ai lea po o le a le mea e tatau ona fai iā te ia.

I lena taimi na o mai ai tagata Isamaeli. Sa fai atu Iuta i ona afa uso: ‘Sei o tatou faatau atu o ia i tagata Isamaeli.’ Ma sa latou faatauina atu loa Iosefa mo le na o le 20 fasi tupe ario. O se mea leaga ma le lē alofa lena!

O le ā nei se tala a ona uso i lo latou tamā? Sa latou tapeina le ‘oti ma fufui le ofu talaloa o Iosefa i lona toto. Ona latou avatu lea o le ofu talaloa ma fai atu i lo latou tamā o Iakopo: ‘Sa matou mauaina lenei mea. Vaai i ai pe e lē o le ofu talaloa o Iosefa.’

Na vaai i ai Iakopo, e saʻo. Ona alaga ai lea o ia ua tagi ma faapea: ‘Ua fasiotia Iosefa e se manu feai.’ Ma o le mea tonu lena sa mananao i ai uso o Iosefa e mafaufau i ai lo latou tamā. Sa tagi Iakopo i le tele o aso. Ae e lei oti Iosefa. Sei o tatou vaai po o le a ua tupu i a Iosefa.