O IOSEFA sa na o le 17 tausaga ina ua ave o ia i Aikupito. O i ina na faatau atu ai o ia i a Potifara. E galue Potifara mo le tupu o Aikupito, e taʻua o Farao.

Sa galue malosi Iosefa mo lona matai o Potifara. Ma ina ua matua Iosefa, sa tuu atu i ai e Potifara le vaaiga atoa o lona aiga. Ae, ai se ā ua i ai nei Iosefa i le fale puipui? Talu ai ona o le avā a Potifara.

Sa tupu aʻe Iosefa ma avea ma tama aulelei, ma sa manao le avā a Potifara la te momoe. Peitai na iloa e Iosefa e leaga lenei mea, ma e le mafai ona ia faia. Sa ita tele le avā a Potifara ma pepelo ai i lana tane ina ua foi mai ma faapea atu: ‘O le tamaloa leaga lena o Iosefa sa taumafai o ia ma te momoe!’ Sa talitonu Potifara i lana avā, ma ua ita tele o ia i a Iosefa. Ma ave ai loa Iosefa e tuu i le fale puipui.

Sa tofia e le pule o le fale puipui Iosefa e vaaia isi pagota uma ona o ia o se tagata lelei. Mulimuli ane ona ita ai lea o Farao i lana tautu uaina ma lana fai mea ai, ma tuu atu i le fale puipui. I le tasi po sa fai ai ni a la miti faapitoa, ae sa la le iloa le uiga. I le aso na sosoo ai sa faapea atu ai Iosefa: ‘Taʻu mai i a te aʻu a oulua miti.’ Ma ina ua la taʻuina, na mafai e Iosefa faatasi ma le fesoasoani a le Atua ona faamatala le uiga o a la miti.

Sa fai atu Iosefa i le tautu uaina: ‘Toe tolu aso ona tatalaina lea o oe mai le fale puipui, ma toe fai oe ma tautu uaina a Farao. Afai e tatala atu oe, faamatala atu aʻu i a Farao, ma fesoasoani mai i a te aʻu ia ou alu ese mai lenei nofoaga.’ Ae i le fai mea ai, sa fai atu Iosefa: ‘Toe tolu aso ona tipiesea lea e Farao o lou ulu.’

I le lona tolu o aso na tupu ai e pei lava ona fai atu ai Iosefa. Na vavaeeseina e Farao le ulu o le fai mea ai. Ae na tatalaina le tautu uaina ma toe auauna mo le tupu. Peitai ua galo i le tautu uaina Iosefa! Sa ia lei taʻuina atu o ia i a Farao, ma sa nofo ai pea Iosefa i le fale puipui.