PE E te iloaina o ai o asiasi atu i ai Tina? O loo alu atu o ia e vaai i isi teine e nonofo i le nuu o Kanana. Pe mata e fiafia lona tamā o Iakopo i lenei mea? Ina ia tali i lenei fesili, taumafai e manatua le manatu o Aperaamo ma Isaako i fafine o Kanana.

Pe sa manao Aperaamo e faaipoipo atu lona atalii o Isaako i se teine mai Kanana? E leai. Pe na mananao Isaako ma Repeka e faaipoipo atu Iakopo i se teine mai Kanana? E leai. Pe e te iloaina ai se ā?

Talu ai o tagata i Kanana e tapuai i atua sese. E le o i latou o ni tagata lelei e avea ma ni tane po o avā, ma e le o ni tagata foi e ono avea ma ni uo lelei. O lea la e tatau ona tatou mautinoa sa lei fiafia Iakopo ina ua faauo atu lona afafine i teine Kanana.

E moni lava, sa tupu se faafitauli i a Tina. Pe e te iloa atu le tamaloa Kanana lena e i le ata o loo tilotilo atu i a Tina? O lona igoa o Sekema. I le tasi aso na asiasi atu ai Tina, sa faamalosi e Sekema Tina e taoto i lalo ma ia. E leaga lea, auā na o tane ma fafine ua faaipoipo e mafai ona taooto faatasi. O le mea leaga lena na faia e Sekema i a Tina a ua taʻitaʻi atu ai i ni faafitauli se tele.

Ina ua faalogo i ai tuagane o Tina i lenei mea sa tupu, ona feita ai lea o i latou. O le feita tele o Simeona ma Levi na o ai ma a la pelu i le aai ma pue faafuasei ai nei tamaloloa. O i laua ma o laua uso sa latou fasiotia Sekema ma isi tamaloloa uma. Sa ita Iakopo ina ua faia e lana fanau lenei mea leaga.

Na faapefea ona tupu lenei faafitauli? Talu ai ina ua faauo Tina i tagata latou te le usiusitai i tulafono a le Atua. O le a tatou le mananao e fai ni uo faapena, a ea?