I NI tausaga e tele ua mavae, sa toatele fanau a fanau a Noa. Sa fai foi fanau a ā latou fanau e toatele. Sa lei umi ae toatele tagata i le lalolagi.

O se tasi o nei tagata o le atalii o le atalii o le atalii o Noa o Nimarota. O ia o se tamaloa leaga na te tulia ma tapēina manu ma fasioti tagata. Sa ia faia foi o ia ma tupu i luga o tagata. Sa le fiafia le Atua i a Nimarota.

Sa tautala uma tagata i lena vaitaimi i le gagana e tasi. Sa manao Nimarota ia taofiofia faatasi latou ina ia pule ai ia. Sa ia fai atu i tagata e fai se aai ma fausia ai se olo i totonu. Vaai atu i a i latou i lena ata o loo fai ni piliki.

Sa le fiafia Ieova le Atua i lenei fale. Na finagalo le Atua ia o ese atu tagata ma ola solo i le lalolagi atoa. Peitai sa fai mai tagata: ‘O mai ia! Sei o tatou faia se aai ma se olo maualuga tele ia paʻi atu lona tumutumu i le lagi. Ona taʻutaʻua ai lea o i tatou!’ Sa mananao tagata mo se viiga mo i latou, ae le mo le Atua.

Sa taofia loa e le Atua tagata mai le fauina o le olo. Pe sa faapefea? E ala i le faafuasei lava ona faatautala tagata i gagana eseese ae ua le tasi. Na le toe malamalama loa le isi au faigaluega i isi. O le mafuaaga lea na faaigoa ai le aai o Papelu, po o Papelonia, o lona uiga “Fenuminumiaʻi.”

Sa amata loa ona o ese mai tagata mai Papelu. O vaega o tagata na tautatala i gagana tutusa sa o faatasi ma ola i isi vaega o le lalolagi.