VAAI i ata. Ua faaalia ai mala taitasi na aumaia e Ieova i luga o Aikupito. I le ata muamua o loo e vaai atu ai i le laau a Arona ua tāina ai le Vaitafe o le Naila. Ma sa liu toto ai loa le vai. Ua mamate iʻa ma ua amata ona elo le vaitafe.

Ona sosoo ai lea ma le faaosoina mai e Ieova o rane mai le Vaitafe o le Naila. Soo se mea lava ua maua ai—ogaumu, mea e palu ai falaoa, ma moega. Ina ua pēpē rane sa faaputuputu e tagata Aikupito i ni faaputuga se tele, ma ua elo ai le laueleele.

Sa ta loa e Arona le efuefu i lona tootoo ma sa liu utu ai. O mea ola ninii e tau feū. O utu o le mala lona tolu lena i Aikupito.

O isi mala uma, na o tagata Aikupito na lavevea ai, a e lei afaina ai Isaraelu. O lona fa, o lago lapopoa ia ua faatumulia ai fale o tagata Aikupito. O le lima o mala, sa lavea ai mea ola. O le tele o povi, mamoe ma ‘oti a tagata Aikupito sa mamate.

O le isi mea na sosoo ai na fetagofi Arona ma Mose i efuefu ma togi i luga i le ea. Sa tupu ai ni maʻi leaga i tagata ma manu. O le mala lona ono lena.

Ina ua uma ona sisii lea o lima o Mose i le lagi, ona aauina mai lea e Ieova o uatoʻa ma faititili. O se uatoʻa sili atu lea ona leaga i Aikupito.

O le mala lona valu o ni sē akerise se tele. Sa lei faapea muamua pe oo mai foi i le taimi nei ona tele faapena ni se akerise. Sa latou aina uma mea e lei faaleagaina e le uatoʻa.

O lona iva o mala o le pogisa. Na ufitia le nuu i le pogisa tele mo aso e tolu, ae sa i ai pea le malamalama i le mea na nonofo ai Isaraelu.

Mulimuli ane ona faapea atu lea o le Atua i ona tagata e sausau pou o faitotoa i le toto o se tamai ‘oti po o se tamai mamoe. Ona pasi atu lea o le agelu a le Atua i Aikupito. A iloa e le agelu le toto na te le fasiotia se tasi o i ai i lea fale. Ae o fale uma e le iloa ai se toto, e fasiotia e le agelu a le Atua ulumatua a tagata ma manu. O le mala lona sefulu lena.

Ina ua uma le mala mulimuli, ona faapea atu lea o Farao i a Isaraelu e ō. Ma i le po lava lena na amata ai loa la latou savaliga i fafo atu o Aikupito.