VAAI i a Mose lena ua sola ese mai Aikupito. Pe e mafai ona e iloa atu tamaloloa na e tuli iā te ia? Pe e te iloa le mafuaaga na laua fia fasioti ai Mose? Sei o tatou vaai.

Sa ola aʻe Mose i le fale o le tupu o Aikupito. Na avea o ia ma se tagata poto tele ma le maualuga. Na iloa lelei e Mose e le o ia o se Aikupito, ae o ona matua moni o ni pologa Isaraelu.

Ina ua 40 ona tausaga, na manatu ai Mose sei alu e vaai pe o faapefea mai ona tagata. Sa leaga tele le tausiga o i latou. Sa ia vaai o sasaina e le Aikupito se pologa Isaraelu. Ona tilotilo solo lea o Mose, ma ina ua ia iloa e leai se isi o tilotilo mai sa ia tāina loa le Aikupito, ma oti ai. Sa nana loa e Mose lona tino i lalo o le oneone.

I le aso na sosoo ai na toe alu ai Mose e vaai i ona tagata. Sa ia manatu e mafai ona ia fesoasoani i a i latou ia aua neʻi toe avea ma ni pologa. Peitai sa ia iloa ni tamaloloa Isaraelu se toalua o tauaʻi misa, ona fai atu lea o Mose i lē na sese: ‘Aiseā ua e fasia ai lou uso?’

Sa fai atu le tamaloa: ‘O ai na tofia oe e fai ma pule ma

faamasino?’ Pe o le a e fasiotia ea aʻu e pei ona e faia i lena Aikupito?’

Ua fefe nei Mose. Ua ia iloa ua maua e tagata le mea sa ia faia i le Aikupito. Ua iloa foi e Farao, ma sa ia aauina atu tagata latou te fasioti i a Mose. O le mafuaaga lena na tatau ai ona sola ese Mose mai Aikupito.

Ina ua tuua e Mose Aikupito, sa ia sola mamao i le nuu o Mitiana. O i ina na ia fetaui ai ma le aiga o Ietero, ma faaipoipo atu i lona afafine o Sepora. Na avea Mose ma leoleo mamoe ma sa ia tausia mamoe a Ietero. E 40 tausaga na ia ola ai i le nuu o Mitiana. Ua 80 ai nei ona tausaga. Ona oo lea i le tasi aso, a o leoleoina e Mose mamoe a Ietero, na tupu ai se mea uiga ese na suia ai le olaga atoa o Mose. Sue le itulau ma sei o tatou vaai po o le a lenei mea uiga ese.