PE E te iloa le mea muamua na faia e Noa ma lona aiga ina ua latou o mai i fafo mai le vaa? Sa ia faia se taulaga po o se mea alofa mo le Atua. E pei o le ata o i lalo. Sa tuuina atu e Noa lana mea alofa i le Atua e faafetai atu ai i le Atua mo le faaolaina o lona aiga mai le lolo tele.

Pe e te manatu sa talia e Ieova lenei mea alofa? Ioe, sa ia taliaina. Ma sa ia tauto atu i a Noa o le a lē ia toe faaumatiaina le lalolagi i se lolo.

Ona matutu ai lea o le eleele, ma ua amata nei e Noa ma lona aiga se olaga fou i fafo o le vaa. Sa faamanuia ma tulei atu le Atua i a i latou: ‘Ia toatele lau fanau. Ma ia tuputupu ia toatele ai tagata e nonofo i le lalolagi.’

Peitai, afai e faalogo tagata i le lolo, atonu o le a latou fefefe neʻi toe tupu se isi lolo faapena. Sa tuuina mai loa e le Atua se mea e faamanatu ai i tagata e le toe oo se lolo i le lalolagi atoa. Pe e te iloaina le mea sa ia avatua e faamanatu ai i a i latou? O se nuanua.

E masani ona vaaia le nuanua i le lagi pe a susulu mai le la pe a uma ona timu. E tele ni lanu mananaia o le nuanua. Pe ua e vaai ea i ai? Pe ua e vaai atu ea i lena e tuu mai i le ata.

O le mea lenei sa tulei mai ai le Atua: ‘E le toe faaumatia foi tagata ma manu i se vai. Ou te tuuina foi laʻu nuanua i le ao. A ou vaaia ona ou toe manatua ai lea o laʻu feagaiga.’

O lea la, a e vaai i se nuanua o le ā o le a ia faamanatu mai a te oe? Ioe, o le feagaiga a le Atua na te le toe faaumatia le lalolagi i se lolo tele.