O IOSEFA sa manao e fia iloa pe o sauā pea ma lē alolofa ona uso e toa 10. Ona ia fai atu lea: ‘O outou o ni tagata vaavaai leaga.

Ua outou fia iloa mea matou te vaivai ai.’

‘Leai, o i matou o ni tagata faamaoni. O le au uso i matou. Sa toa 12, ua leai le tasi ae o le aupito itiiti o loo i le fale ma lo matou tamā,’ o la latou tala lea.

Sa faatagā lē talitonu i ai Iosefa i a i latou. Sa ia tuuina le uso e igoa i a Simeona i le fale puipui, ae tuu atu isi e o ma mea ai i lo latou aiga. Ae sa ia fai atu i a i latou: ‘Afai tou te toe o mai, aumai lo outou uso laitiiti.’

Ina ua latou foi atu i Kanana, sa taʻu atu e le au uso mea uma na tutupu i a Iakopo. Ua faanoanoa tele Iakopo. Na ia tagi ma faapea: ‘Ua le toe i ai Iosefa, ma o lenei foi ua leai atu Simeona. O le a ou le faatagaina outou tou te avea loʻu atalii laitiiti o Peniamina.’ Ae ina ua amata ona uma mea ai, ona tuuina atu loa lea e Iakopo ia Peniamina latou te o i Aikupito ia toe maua mai ni isi mea ai.

Ua vaai atu Iosefa ua o mai ona uso. Ua fiafia tele ia e vaai i lona uso laitiiti o Peniamina. Ae o le mea moni, e lei i ai lava se tasi ua na iloa o lenei tagata tāua o Iosefa. Ona fai loa lea e Iosefa se mea e tofotofo ai ona afa uso e toa 10.

Na ia faatonuina ana auauna ia faatutumu uma a latou taga mea ai. Ae na te lei faailoa atu i a i latou, sa ia tuu lana ipu ario faapitoa i le taga mea ai a Peniamina. Ina ua latou o ese atu i sina mamao i le auala, ona aauina atu lea e Iosefa ana auauna ia i latou. Ona fai atu lea o auauna a Iosefa: ‘Aiseā ua outou gaoia ai le ipu ario a lo matou matai?

‘Matou te lei gaoia sana ipu,’ o la latou tali lea. ‘Afai e maua lena ipu i soo se isi o i matou, ia fasiotia lena tagata.

Ona sue lea e auauna ato uma, ona latou maua lea o le ipu i le taga a Peniamina, e pei ona e vaai atu i ai. Ona fai atu lea o auauna: ‘E mafai ona o isi o outou, ae toe foi mai Peniamina ma i matou.’ O le ā le mea o le a faia nei e uso e toa 10?

Ona latou toe foi uma atu lea ma Peniamina i a Iosefa. Ona fai atu lea o Iosefa: ‘E mafai ona outou ō a e nofo Peniamina e fai ma aʻu pologa.’

Ona fai atu lea o Iuta: ‘Afai matou te toe foi e aunoa ma le tama, o le a oti loʻu tamā auā e alofa tele i ai o ia. O lea faamolemole, ia tuu aʻu e fai ma pologa, a e tuu atu le tama e alu.’

Ua iloa e Iosefa ua suia ona uso. Ua le toe sauā ae ua alolofa. Sei o tatou sueina po o le a le mea ua fai nei e Iosefa.